Matthew 25:1-46
25 “Agọnọ Daabụọ bị, tụkpa-ama sibewẹrị mú ayoro-yei laa yọ amúmịnị oia owei-nimigha ereama bara k’emi.
2 Sọnrọn ayẹbẹ, sọnrọn ba kịlịkịlị-emi.
3 Ayẹbẹ yaịbo pulou sibegha bara ka kị ánị tụkpabo sịbẹmị,
4 anịa kịlịkịlị yaịbo ánị tụkpabo sibe bá pulou kọn ye atụa sibemị.
5 Ayoro-yei naa boghatimi alaadẹ ifiemị, ásẹẹ sịyaịn kẹrịwẹrị bụnụfamị.
6 Anịa deinbirimị, kịmị okokaịmị: ‘Ayoro-yei bị bodẹ! Kịmịsẹ wẹrị paabo ụ laa.’
7 Bịsẹ ifiemị, owei-nimigha erebo seritịẹwẹrị ánị tụkpabo tọlọmọmị.
8 Ayẹbẹ yaịbo gbaa kịlịkịlị yaịbo pịrịmị, ‘Wó tụkpabo viin dọụmịnị duonị, ánị puloumị zụa kọn wo pịrị.’
9 Kịlịkịlị yaịbo gbaamị: ‘Pulou bị wosẹ laagha kpọ paaemi, anịduonị yẹrịmịnị otubo dọụ múdá zụa fẹị angọ pịrị.’
10 Ámịnị fẹị yọ amúmịnị ifie kị ayoro-yei bị bomị. Angọtọlọmọdẹ owei-nimigha erebo, ụ mọ mọ́ erenana oge teimịnị warịma sụọmị, bá ogugo kpọ kaịmị.
11 Alaghatimi kọọ owei-nimigha erebo bowẹrị gbaamị, ‘Nanaowei, Nanaowei, ogugo fini wo pịrị!’
12 Ụ gbaa á pịrịmị, ‘Gesiimị, ị gbaa á pịrị, ịmịnị á nimigha.’
13 “Anịduonị, ifiebosẹ letimi. Tuumị, ámịnị erein mọ, ifie mọ nimigha.
14 “Kẹnị kịmị yọụpaa zịnị ibe amú dọụmịnị duonị, wó odubo-otubo tịịn bẹnịmọwẹrị, wó nanawẹrịemi yebo kọn á pịrị kekere bara k’emi.
15 Ómịnị ánị nanawẹrịemi kụrọ kị diiwẹrị sọnran talẹntị* akị kẹnị ụbọ pịrị, maamụ akị zịnị ụbọ pịrị, bá kẹnị akị kọọ ụbọ pịrịwẹrị yọụpaamị.
16 Sọnran talẹntịbo nana owei bị ifie famọgha bara wo sịlịbo akị fọụ yọụwẹrị zịnị sọnran talẹntị-ama nanamị.
17 Bịsẹbara kị maa talẹntị nana owei kpọ wó maa talẹntịbo akị fọụ yọụwẹrị zịnị maa talẹntị-ama nanamị.
18 Anịa kẹnị talẹntị nana owei bị, wó tịbịowei sịlị* kọn kiri ka dibimị.
19 “Timi alaadẹmị, ánị tịbịowei bowẹrị, ánị barama wó sịlịbo biimị.
20 Sọnran talẹntịbo nana owei bị zịnị sọnran talẹntị-ama akị tụa bo ụ laawẹrị gbaamị, ‘Nanaowei, ị́mịnị sọnran talẹntị ka kị ị pịrịmị, anịa dii, ịmịnị sọnran talẹntị arere* nanamị.’
21 Wó nanaowei bị gbaa ụ pịrịmị: ‘Ebi bá eti akị tụa agbẹị-emi odubo-owei, ị́ mịẹ kamị! Biingha yeama kpọ, ị́mịnị eti akị tụa agbẹị-emi bara mịẹdịa duonị, ịmịnị biin yeama akị ị pịrị diimịnị. Wẹrị bo iné nanaowei mọ pọwẹị gbelei.’
22 Maa talẹntịbo nana owei kpọ zịnị maa talẹntị-ama akị tụa bo ụ laawẹrị gbaamị, ‘Nanaowei, ị́mịnị maa talẹntị ka kị ị pịrịmị, anịa dii, ịmịnị maa talẹntị arere* nanamị.’
23 Wó nanaowei bị gbaa ụ pịrịmị: ‘Ebi bá eti akị tụa agbẹị-emi odubo-owei, ị́ mịẹ kamị! Biingha yeama kpọ, ị́mịnị eti akị tụa agbẹị-emi bara mịẹdịa duonị, ịmịnị biin yeama akị ị pịrị diimịnị. Wẹrị bo iné nanaowei mọ pọwẹị gbelei.’
24 “Kunumọmị, kẹnị talẹntị nana odubo-owei bị bo ụ laawẹrị gbaamị: ‘Nanaowei, ị́mịnị ye atọrụkẹrịgha kịmị, iné gborogha yeama kị soumịnị, bá zịnịotu fọụndẹ witi-ama kị bẹnịmọmịnị.
25 Anịduonị ịmịnị malafawẹrị iné talẹntị kọn kiri ka dibimị. Kẹrị, bei iné sịlịmị.’
26 Wó nanaowei bị ụ parụwẹrị gbaa ụ pịrịmị: ‘Ị́mịnị bulusei bá suu-emi odubo-owei, ịmịnị ine gborogha yeama kị soumịnị, bá zịnịotu fọụndẹ fịyaị-ama kị bẹnịmọmịnị bara ị́mịnị mọ nimiwẹrịemi, mọ a?’
27 Bịsẹbara aba, ị́mịnị ine sịlị* kọn bankị atụamụ timimị, anịkị ị waịbo ifiemị ịmịnị arere* nanamụ timimị.
28 “‘Wẹrị wó bara duo sịlị kọndá, akị oia talẹntị nanawẹrịemi owei pịrị.
29 Nanawẹrịemi kịmịsẹ, zịnị yaị tụa ụ pịrịwẹrị omịnị biin yaị nanamịnị. Anịa nanagha kịmịsẹ, wó nanawẹrịemi dọlọ kpọ akị wo bara duo kọnsiinmịnị.
30 Á wẹrị bei ye-apaagha odubo-owei gbein akị duku tirima tụa. Óminị bịsẹ yọ ka timi you, bá wó akabo fịmịnị.’
31 “Kịmịtọbọụ yaị bị kụrọ kọn bomụ ifiemị, angelịbosẹ ụ mọ mọ bomịnị. Bá ómịnị wó dụba pẹrẹ-ịkasịma tịtẹmịnị.
32 Ibebosẹ kọn wó tọrụyọma bẹnịmọmịnị. Bá anịna gbalịowei, anịnabo mọ oboribo mọ pụmọmịnị bara kị, ómịnị mọ kọn kịmịawọụbo pụmọmịnị.
33 Ómịnị anịnabo kọn wó amabara anga bụọmọmịnị, bá oboribo kọn wó kọnọbara anga bụọmọmịnị.
34 “Pẹrẹ bị gbaa wó amabara angama emi otubo pịrịmịnị: ‘Ị Daụ tarịama kọn pịrịdẹ otuama, á bodá, akpọ tẹmẹsẹ tọlọmọ á pịrịwẹrịemi Daabụọ duosụọ.
35 Tuumị, ịmịnị mọụnkẹrịtimi ifiemị, ámịnị ye akị ị pịrị fịmị; ịmịnị beni bou dịsẹtimi ifiemị, amịnị beni kọn ị pịrị boumị. Ịmịnị igeni-owei atimi ifiemị, ámịnị ị kẹrịakịmị;
36 ịmịnị paatuu* atimi ifemị, ámịnị bịdẹ akị ị pịrị tụamị. Ịmịnị dọọntimi ifiemị, ámịnị tọrụtụa ị diimị. Bá ịmịnị ikoliwarị atimi ifiemị, ámịnị bo ị diimị.’
37 Anịa kịrịịye mịẹ otubo ụ biimịnị: ‘Nanaowei, te ifie kị ị́mịnị mọụnkẹrịwẹrị omịnị fịyaị kọn ị́ pịrị fị ma, anịghakpọ beni bou dịsẹwẹrị beni kọn ị́ pịrị bou ma?
38 Ị́mịnị te ifie ka igeni-owei apaawẹrị, omịnị ị́ kẹrịakị ma o? Anịghakpọ paatuu atimiwẹrị omịnị bịdẹ kọn ị́ pịrị tụa ma?
39 Te ifie ka ị́mịnị dọọn, bá ikoliwarị atimi omịnị bo ị́ dii ma o?’
40 Pẹrẹ bị á parụmịnị, ‘Gesiimị ị́ gbaa á pịrị, ámịnị bei yebo mịẹ ine bịnaotubo zaụdẹịn ụbọ kpọ pịrị duonị, mịẹ ịmịnị kị pịrịmị.’
41 “Anịa, ómịnị gbaa wó kọnọbara angama emi otubo pịrịmịnị: ‘Ámịnị weribịbị gbeledẹ otu, ine tọrụyọ duo seridá, mú mịẹ Dẹvụlụ mọ wó sei tẹmẹbo mọ pịrịwẹrịemi viingha fa fẹnịbụrọụ duosụọ.
42 Tuumị, ịmịnị mọụnkẹrịtimi ifiemị, ámịnị ye akị ị pịrị fịgha; ịmịnị beni bou dịsẹtimi ifiemị, amịnị beni kọn ị pịrị bougha.
43 Ịmịnị igeni-owei atimi ifiemị, ámịnị ị kẹrịakịgha; ịmịnị paatuu* atimi ifiemị, ámịnị bịdẹ akị ị pịrị tụagha; ịmịnị dọọn bá ikoliwarị atimi ifiemị, ámịnị bo ị diigha.’
44 Bịsẹ otubo kpọ ụ biimịnị: ‘Nanaowei, ị́mịnị te ifie kị mọụnkẹrị, beni bou dịsẹ, igeni-owei atimi, paatuu atimi, dọọn bá ikoliwarị atimi omịnị baratụa ị́ pịrịgha o?’
45 Ómịnị á parụmịnị: ‘Gesiimị ị́ gbaa á pịrị, ámịnị bei yebo mịẹ ine bịnaotubo zaụdẹịn ụbọ kpọ pịrịgha duonị, mịẹ ị kpọ pịrịgha.’
46 Bei kịmịbo bẹseri bẹseri fịị ka sụọmịnị.* Anịa kịrịịye mịẹ otubo fagha fagha ụndụ kị nanamịnị.”
Gbaatụayọama
^ Kẹnị Greek talẹntị oku 20.4 kg (654 ounces). Egberi ụngbọụ tuuama dii.
^ Greek bẹẹlịmị, “silver sịlị.”
^ Anịghakpọ “sụọyọ.”
^ Anịghakpọ “sụọyọ.”
^ Greek bẹẹlịmị, “silver sịlị.”
^ Anịghakpọ “sụọyọ.”
^ Anịghakpọ “ebi bịdẹ nanawẹrị tụagha ifiemị.”
^ Anịghakpọ “ebi bịdẹ nanawẹrị tụagha ifiemị.”
^ Anị, ụndụ nanagha fa kị gbaamịnị. Greek bẹẹlịmị, “pẹlẹ tangbei ka sụọmịnị.”
