Matthew 6:1-34
6 “Angọ dii, benebene kịmịotu seribẹbẹ akị ị́ pịrịmụ yọ kị duonị ebimịẹkụmọ; bịsẹbara á mọ mịẹ daba, ámịnị kẹnị gbẹẹ kpọ kọn ánị agọnọ Daụ duo nanagha fa.
2 Anịduonị, ị́mịnị ye* dịẹ bụụdọọnye nanawẹrịemi kịmị* pịrịmịnị ifiesẹ, ekpekpe gbelekụmọ, agọnọbeniyaị mịẹmịnị otubo dii mịẹkụmọ, ámịnị kịmịotu pịrị tokonimụ yọ kị duonị bẹnịị yetolumọmịnị yọbo* mọ, ụwọụbo mọ atimi mịẹmịnị. Gesiimị, ị gbaa á pịrị, ámịnị ba Ayiba bara duo kẹnị gbẹẹ kpọ nanagha fa.
3 Anịa, ị́mịnị ye dịẹ bụụdọọnye nanawẹrịemi kịmị pịrịmịnị ifiesẹ, pebidá iné amabaramị iné kọnọbara mịẹmịnị ye nimikụmọ.
4 Anịkị kẹnị ụbọ kpọ ị́mịnị ye dịẹ bụụdọọnye nanawẹrịemi kịmị pịrị bara nimigha fa. Bịsẹbara ị́ mọ mịẹ daba, iné agọnọ Daụ nẹ, yebosẹ ẹrịmịnị owei bị* ị́ gbẹẹmịnị.
5 “Bá ámịnị tẹẹmịnị ifiesẹ, agọnọbeniyaị mịẹmịnị otubo dii mịẹkụmọ. Kịmịotu pịrị ẹrịmụ yọ duonị, ámịnị kịmịotu bẹnịị yetolumọmịnị yọbo* mọ, opu ụwọụ-akabo mọ ka tịẹtimi tẹẹbịbị mịẹ dịsẹmịnị. Gesiimị, ị gbaa á pịrị, ámịnị ba Ayiba bara duo kẹnị gbẹẹ kpọ nanagha fa.
6 Anịa, ámịnị tẹẹmịnị ifiesẹ, ánị bụnụbulu* duo sụọ, bá ogugo teridá tẹẹ ánị tọrụ ẹrịgha agọnọ Daụ pịrị. Bịsẹbara á mọ mịẹ daba, yebosẹ ẹrịmịnị Daụ bị á gbẹẹmịnị.
7 Bá tẹẹmịnị ifiesẹ, akpọ otubo* kẹnị egberi kọn barịị barịị gbaamịnị bara dii mịẹkụmọ. Ámịnị biin egberiama gbaa daba, Ayiba ánị tẹẹbịbịbo naamịnị bara kị irorowẹrị mịẹmịnị.
8 Anịduonị á dii mịẹkụmọ, á daụ bị ánị dọụwẹrịemi yebo nimidẹ kị ámịnị tẹẹ ụ yarịmịnị.
9 “Bei ánị tẹẹmụ baramị:
“‘Wo Daụ nẹ agọnọemi owei, pebidá iné ẹrẹmị tọntọntimi.*
10 Pebidá iné Daabụọ bị bo. Iné dọụbara agọnọma emibara kị, bei kiriogbo kpọ bịsẹbara paa.
11 Wo ereinma fịmụ fịyaị* kọn wo pịrị.
12 Bá omịnị sei akị wo mịẹ otubo* bụọmọdẹ bara kị, ị́ kpọ wo mịẹ seibo* kọn wo bụọmọ.
13 Wo bụọmọ dadiye asụọkụmọ, bá bulusei owei bara kpọ duo wo zụọ.’
14 Ámịnị zịnịotu mịẹkiri yebo kọn á bụọmọ daba, ánị agọnọ Daụ kpọ ánị mịẹkiri yebo kọn á bụọmọmịnị.
15 Anịa, ámịnị zịnịotu mịẹkiri yebo kọn á bụọmọgha ifiesẹ, ánị agọnọ Daụ kpọ á bụọmọgha fa.
16 “Ámịnị mọụn-korumịnị ifiesẹ, agọnọbeniyaị mịẹmịnị otubo pọwẹịgha bara kọn ánị andẹbo* wẹrịmịnị bara diimịẹkụmọ. Kịmịotu ámịnị mọụn-korumịnị bara nimi ámọ dọụmịnị kị duonị, ámịnị bịsẹbara kọn ánị andẹbo* wẹrịmịnị. Gesiimị, ị gbaa á pịrị, ámịnị ba Ayiba bara duo kẹnị gbẹẹ kpọ nanagha fa.
17 Ánịa, ámịnị mọụn-korumịnị ifiesẹ, pulou kọn ánị tịbịbo sirii, bá ánị andẹbo* kpọ sụrụ.
18 Ánịkị kịmịotu ámịnị mọụn-korumịnị bara nimigha fa, ánị agọnọ Daụ bẹtịbị kị nimimịnị. Bịsẹbara ámọ mịẹ daba, ánị agọnọ Daụ nẹ, yebosẹ ẹrịmịnị owei bị* á gbẹẹmịnị.
19 “Ánị yelaa yebo kọn kiriogboma gbaịnkụmọ, ekaịn mọ agbẹn mọ sụọ apaaemi, bá furuotu kpọ furu apaaemi.
20 Anịa ánị yelaa yebo kọn agọnọ ka gbaịn, bịsẹ yọmị, ekaịn mọ agbẹn mọ laa sụọgha fa, bá furuotu kpọ laa sụọmú furugha fa.
21 Tuumị, iné adụdụ bị, iné yelaa yebo emi yọ ka timimịnị.
22 “Iné angọmị, tọrụ kị tukpamị. Anịduonị iné tọrụbo kẹnị yọ kị diimịnịaba,* iné angọsẹ gaan kị paamịnị.
23 Anịa, iné tọrụbo kẹnị yọ diighaba,* iné angọsẹ duku kị timimịnị. Iné angọma emi tukpa bị bo duku daba, bịsẹ dukumị kọkọ kụrọemi.
24 “Kịmị laa odubo-gbaa* maa kịmị pịrị apaagha; ómịnị kẹnị ụbọ tarị akị kẹnị ụbọ dẹịnmịnị, anịghakpọ ómịnị kẹnị ụbọ mọ naịn akị kọọ ụbọ dẹịnmịnị. Ị́mịnị laa odubo-gbaa* Ayiba mọ, bá nana-yeama mọ pịrịgha fa.
25 “Anịduonị ị gbaa á pịrị: Fịmụ fịyaị, boumụ ye, bá tụamụ bịdẹ duonị kpeke-kpekekụmọ. Ụndụ bị yelaa fịyaị dẹịn a? Bá angọ bị yelaa tụabịdẹ dẹịn a?
26 Ebibara agọnọma emi ofonibo dii; ámịnị fịyaị gboro, bá souwẹrị akị yegbaịn-warị amú gbaịngha kị gbaa kpọ, ánị agọnọ Daụ bị á gbalịmịnị. Ámịnị yelaa ofonibo dẹịn a?
27 Ánị ovurumị, kpeke-kpekemịnị yọ duonị laa kẹnị miniti akị wó ụndụma tụamụ ụbọ emi a?
28 Tetuu kị duonị ámịnị tụamụ bịdẹ duonị kpeke-kpekemịnị a o? Wẹrị bouma sọụmịnị odedebo duo ye tolumọ akị, ámịnị fịrị kpọ wẹnịgha bá bịdẹ kpọ gbein angọ pịrịgha;
29 anịa ị gbaa á pịrị, Solomon biin ebi yeama kị nanawẹrị kpọ, wó tụatimi bịdẹbo ebi odedebo* laagha.
30 Tetuu kị duonị ámịnị kala peibulu nanawẹrịemi a o? Bei tịẹkirimị, bouma sọụ daba, deinbaịmị ikparịwẹrị á pịrị yọụnmọmịnị yebo kpọ Ayiba mọ mịẹ ebimọmịnị aba, ómịnị tụabịdẹ kọn ámịnị kị pịrịgha fa bara ámọ tọnmị?
31 Anịduonị benebene kpeke-kpekewẹrị, ‘Omịnị teekị fịmịnị a?’ Anịghakpọ ‘Omịnị teekị boumịnị a?’ Bá ‘omịnị te bịdẹ kị tụamịnị a?’ bara biikụmọ.
32 Akpọ otubo* ánị ịkịọụsẹ akị bei yebo kị dọụmịnị. Anịa, ánị agọnọ Daụ bị, ámịnị bei yebosẹ dọụwẹrịemi bara nimiwẹrịemi.
33 Anịduonị, ifiebosẹ Ayiba Daabụọ mọ, bá wó tọrụyọma kịrịị-emi yebo mọ ka kị ánị ụndụma bọlọụdaa. Bịsẹbara ámọ mịẹ daba, ómịnị kọọ yebosẹ kọn á pịrịmịnị.
34 Anịduonị, deinbaị apaamụye duonị kpeke-kpekekụmọ. Deinbaị kpọ wó bụụdọọnyeama kị nanamịnị. Ereinbosẹ amịnị bụụdọọnyeama kị nanawẹrịemi.
Gbaatụayọama
^ Anịghakpọ “dieneni diepreyeama.”
^ Anịghakpọ “ingo-otu.”
^ Greek bẹẹlịmị, “synagogue-bo.” Egberi ụngbọụ tuuama dii.
^ Anịghakpọ “Daụ nẹ kịmị ẹrịgha yọ inyenrinmịnị owei bị.”
^ Greek bẹẹlịmị, “synagogue-bo.” Egberi ụngbọụ tuuama dii.
^ Anịghakpọ “okpobulu.”
^ Greek bẹẹlịmị, “zịnị ibe otu.”
^ Anịghakpọ “iné ẹrẹ mịẹ ebimọ; iné ẹrẹ mịẹ yalịyalị.”
^ Greek bẹẹlịmị, “breadị.”
^ Greek bẹẹlịmị, “saabo.”
^ Greek bẹẹlịmị, “wo bara ma saafịwẹrị otubo.”
^ Anịghakpọ “korobo.”
^ Anịghakpọ “korobo.”
^ Anịghakpọ “korobo.”
^ Anịghakpọ “Daụ nẹ kịmị ẹrịgha yọ inyenrinmịnị owei bị.”
^ Anịghakpọ “ebibara yọ ẹrịmịnịaba.”
^ Greek bẹẹlịmị, “ebibara yọ ẹrịgha, bá bulusei-emi aba.”
^ Anịghakpọ “odubo-gbaan.”
^ Anịghakpọ “odubo-gbaan.”
^ Anịghakpọ “flawerbo.”
^ Greek bẹẹlịmị, “zịnị ibe otu.”
