Matthew 16:1-28
16 Farisi-otubo mọ Sadusi-otubo mọ Jesus dadimụ yọ duonị, mú bịsẹ yọma ụ laawẹrị, ómịnị Ayiba ẹrẹ kọn lelei mịẹ á dịa bara gbaa ụ pịrịmị.
2 Ómịnị á parụmị: “Buboru koro daba, ámịnị gbaamịnị, ‘agọnọ-tọrụ bị kwekwe-emi duonị, deinbaịmị erein tọrụ bị ebimịnị,’
3 bá pekei laa daba, ámịnị gbaamịnị, ‘agọnọ-tọrụ bị kwekwe anịa duku-emi duonị, mị ereinmị osuo koromịnị bá edidi kpọ koromịnị.’ Ámịnị agọnọ-tọrụma paamịnị leleibo asụọtuu-nimiwẹrị tuugbaamịnị, anịa mị tịẹkirima paamịnị leleibo asuotuu nimiwẹrị tuugbaagha.
4 Bulusei bá Ayiba abarasiindẹ otuama ifiebosẹ lelei kị dọụmịnị. Anịa bụrụ-owei Jonah paamọ tamamaa ye bụọmọ daba, ámịnị zịnị lelei ẹrịgha fa.” Bịsẹbara ụ mọ gbaasiindẹmị, ómịnị paakị wẹnị ána barasiinmị.
5 Tuuduo-otubo bẹịnmọ angama mú ifiemị, ámịnị laa breadị tụa sibegha.
6 Jesus gbaa á pịrịmị: “Ánị tọrụbo finidá, Farisi-otubo mọ Sadusi-otubo mọ breadị mịẹ vudomịnị ye duo angọdii.”
7 Ámịnị gbaa zọzọ pịrịmị: “Omịnị kẹnị breadị kpọ sibegha kị tọn.”
8 Jesus ánị gbaamịnị ye nimi duonị, ómịnị gbaa á pịrịmị: “Kala peibulu nana otu, tetuu kị duonị ámịnị kẹnị breadị kpọ sibegha bara gbaa zọzọ pịrịmịnị a o?
9 Ámịnị mọkpọ naa ine gbaamịnị egberima sụọtuu-nimigha, anịghakpọ sọnran breadịbo kọn 5,000 owei-ama gbalị ifiemị, kọọwẹrị á pịrị sibe kanabo* ámọ ukiegha?
10 Bá sọnọma breadịbo kọn 4,000 owei-ama gbalị ifiemị, kọọwẹrị á pịrị sibe kanabo* ámọ ukiegha?
11 Tetuu kị duonị ịmịnị breadị egberi gbaagha bara ámịnị mọ nimigha o? Anịa Farisi-otubo mọ Sadusi-otubo mọ breadị mịẹ vudomịnị ye duo angọdii.”
12 Bịsẹ ifie kị Jesus tuuduo-otubo, ómịnị Farisi-otubo mọ Sadusi-otubo mọ breadị mịẹ vudomịnị ye bẹmọgha bara nimimị. Anịa ánị tolumọmịnị yebo kị duo angọdii bara kị ụ mọ gbaamịnị bara nimimị.
13 Jesus mú Sẹsẹria Filippai ete laa ifiemị, ómịnị wó tuuduo-otubo biimị: “Kịmịtọbọụ yaị bị te ụbọ bara kị kịmịotu mọ gbaamịnị a?”
14 Ámịnị ụ parụmị: “Zụa otu gbaa amọ, ị́mịnị John kịmị akị benibilemọ-owei, zụa ba ị́mịnị Elijah bara kị gbaamịnị, zịnịotu ba ị́mịnị Jeremiah anịghakpọ bụrụ-otubo akẹnị ụbọ bara kị gbaamịnị.”
15 Ómịnị waị á biimị: “Ịmịnị te ụbọ bara kị ámọ tọn ma?”
16 Simon Peter ụ parụmị: “Ị́mịnị kị Christ bị, inyenrinmịnị Ayiba Tọbọụ bị.”
17 Jesus gbaa ụ pịrịmị: “Simon, Jonah tọbọụ, pọwẹị ị́ laa. Tuumị, kịmịtọbọụ* bei ye kọn ị́ dịagha, anịa ine agọnọ Daụ kị bei ye kọn ị́ dịamị.
18 Mọkpọ ị́ gbaa ị́ pịrị: Ị́mịnị kị Peter, bá ịmịnị ine itu kọn mị okuta agọnọ ka kẹrịmịnị. Dụwẹị-ogugu ogugobo* kpọ, laa ụ dẹịnmọgha fa.
19 Ịmịnị agọnọ Daabụọ igodo-gbịsabo kọn ị́ pịrịmịnị. Ị́mịnị kirima kaịmịnị yesẹ agọnọma kaị bụọmọdẹ. Bá ị́mịnị kirima finimịnị yesẹ, agọnọma fini bụọmọdẹ.”
20 Anịa Jesus kpookpoo bara, ómịnị kị Christ bara mịẹ zịnịotu pịrị nimikụmọ bara gbaa á pịrịmị.
21 Bịsẹ ifie duobosẹ, Jesus, ómịnị Jerusalem amúwẹrị Jew karịbụọ tịbị-otubo mọ, tịbị ịkịankụn-otubo mọ, bá oloko tolumọ-otubo mọ pịrị ụyamọ, bá á pịrị baawẹrị tarụkaramọ erein laa daba Ayiba ụ tịịn serimịnị bara gbaa á pịrịmị.
22 Anịa Peter ụ kọn aka múwẹrị gbaa ụ pịrịmị: “Nanaowei, bịsẹbara gbaakụmọ, bịsẹ apaaye benebene ị́ paamọgha fa.”
23 Jesus toun taan Peter gbeinwẹrị,* gbaa ụ pịrị: “Satan ine tọrụyọ duo seri! Ị́mịnị ị mịẹ adalaịmọ kị dọụmịnị, tuumị iné iroroyemị Ayiba duo bogha, anịa kịmịawọụ kị duo bomịnị.”
24 Jesus gbaa wó tuuduo-otubo pịrịmị: “Ina tuuduo dọụmịnị kịmịsẹ, angọpii, bá wó ụyafị tịn* sibedá pẹlẹgha bara ina tuuduo.
25 Wó ụndụ kị zụọ dọụmịnị kịmịsẹ, fịị kị fịịmịnị. Anịa, ịmịnị kị duonị fịị ụbọ bị, waị ụndụ nanamịnị.
26 Kịmị akpọma emi yebosẹ nanawẹrị wó ụndụ tangbei daba, te arere kị kọkọ ụ laamịnị a o? Anịghakpọ teeki ụ mọ kọn wó ụndụ dei apaaemi a o?
27 Kịmịtọbọụ yaị bị wó Daụ kụrọ ka kị bomịnị, wó angelị-otubo kpọ ụ mọ mọ bomịnị. Bá ómịnị kịmịotu mịẹ yebo kị diiwẹrị á gbẹẹmịnị.
28 Gesiimị, ị gbaa á pịrị, bei yọma tịẹ-emi otubo, zụa yaị fịịghatimi bọlọụ Kịmịtọbọụ yaị bị wó Daabụọ kọn bomụ ifiemị ẹrịmịnị.”
Gbaatụayọama
^ Anịghakpọ “baskẹtị.”
^ Anịghakpọ “baskẹtịbo.”
^ Anịghakpọ “mẹnẹ mọ asịịn mọ; mẹnẹ mọ isọmọ mọ.”
^ Anịghakpọ “Hades ogugobo.” Egberi ụngbọụ tuuama dii.
^ Anịghakpọ “Jesus tounbẹlẹwẹrị.”
^ Egberi ụngbọụ tuuama dii.
