Matthew 19:1-30
19 Jesus bei egberibo gbaasiindẹmị, ómịnị Galilee duo seriwẹrị Jordan tọrụ bẹịnmị, bá wẹnị Judea efin* bẹịnmọma múmị.
2 Biin kịmịama wó atuuduo múmị, ómịnị bịsẹ yọmị ánị dọọnbo zụọmị.
3 Farisi-otubo Jesus dadimụ yọ duonị, bo ụ laawẹrị ụ biimị: “Owei-kịmị paadẹ yesẹ ka kị ba ụ taa nanagha fa bara gbaawẹrị, a duopaamọmụ yọmị ebi-emi a o?”
4 Ụ gbaa á pịrịmị: “Á tẹmẹ owei bị bọlọụsẹ, ere mọ owei mọ ka kị á tẹmẹ bara ámịnị naamọ googha wẹrịma?
5 Bá gbaamị: ‘Bei tuu kị duonị, owei kịmị ụ daụ mọ yin mọ abarasiinwẹrị ụ taa mọ inyenrinmịnị,* bá ámịnị bo kẹnị angọ ka paamịnị.’
6 Anịduonị, ámịnị ba maa kịmị apaagha fa anịa bo kẹnị angọ ka paadẹ. Bịsẹ yọ duonị Ayiba kọn kẹnị gbeleimọdẹ yemị, kẹnị kịmị kpọ ụ pumọkụmọ.”
7 Á gbaa ụ pịrịmị: “Tetuu kị duonị, kịmị wó nanawẹrịemi ere paamọ dọụmịnịaba, ómịnị ba á nanagha fa fun kọn á pịrị bara Moses mọ gbaa ma o?”
8 Jesus gbaa á pịrịmị: “Bọlọụ ifiemị bịsẹbara fa, anịa ánị tịbịkụrọ yọ kị duonị, Moses ámịnị ánị erebo paamọ bara gbaamị.
9 Anịa ị́ gbaa á pịrị, iné nanawẹrịemi ere, zịnị kịmị mọ bụnụghatimi ị́mịnị á paamọwẹrị, zịnị ere nana daba, ị́mịnị sei mịẹdẹ.”
10 Tuuduo-otubo gbaa ụ pịrịmị: “Taa mọ yei mọ egberimị bịsẹbara k’emi aba, ere nana agbẹịgha kị tọn.”
11 Jesus gbaa á pịrịmị: “Kịmịsẹ kị laa bịsẹbara mịẹmụ bara fa, anịa bịsẹ dịẹpreye nanawẹrịemi otubo bẹtịbị kị laa mịẹmịnị.
12 Zụa kịmịama á ziiwẹrịemi bara duonị laa ere nana apaagha,* zụa otu ba kịmịawọụ kị á mịẹwẹrị laa ere nana apaagha.* Zụa ba agọnọ Daabụọ kị duonị ere nanagha fa yọ sẹlẹ angọ pịrịmịnị. Laa bịsẹbara mịẹmụ kịmịsẹ, mịẹ.”
13 Jesus bara kọn kala awọụbo agbana bá tẹẹ á pịrịmụ yọ duonị, kịmịama kala awọụama kọn Jesus yarịmị, anịa wó tuuduo-otubo á darịmọmị.
14 Jesus gbaa á pịrịmị: “Kala awọụbo ị dọụbomịnị yọmị á tịẹmọkụmọ, tuumị agọnọ Daabụọ kọn á timi-timi otubo kị pịrịmịnị.”
15 Ómịnị wó bara kọn ána gbana-siindẹmị, paakị bịsẹ yọ duoserimị.
16 Anịa kẹnị kịmị bo ụ laawẹrị gbaamị: “Nanaowei, ịmịnị te ebi kị mịẹwẹrị fagha fagha ụndụ nanamịnị a o?”
17 Jesus gbaa ụ pịrịmị; “Tetuu kị duonị ị́mịnị ebi gbelemọ ye kọn ị biimịnị a o? Kẹnị ụbọ bẹtịbị kị ebi-emi. Anịa ị́mịnị ụndụ nana dọụmịnịsẹ, pẹlẹgha bara olokobo diimịẹ.”
18 Kịmị bị ụ biimị: “Te olokoama o?” Jesus gbaa ụ pịrịmị: “Ị́mịnị kịmị baakụmọ, tiri amú zịnị ụbọ mọ angakụmọ, furukụmọ, ekpe iseri kpọ tịẹkụmọ,
19 ị́ daụ mọ yin mọ diidụbamọ, bá iné angọ tarị bara ka kị iné ọvị-ụbọ kpọ tarị.”
20 Kịmị bị gbaa ụ pịrịmị: “Ịmịnị bei yebosẹ mịẹmịnị; teeki mọkpọ kọọemi a o?”
21 Jesus gbaa ụ pịrịmị: “Ị́mịnị yebosẹ mịẹ kịrịịmọ dọụmịnị aba, iné nanawẹrịemi yebo yẹrị, bá sịlịbo kọn ụya otubo pịrịdá ina tuuduo. Ị́ bịsẹbara mịẹ daba, ị́mịnị agọnọma yelaa yeama nanamịnị.”
22 Kịmị bị egberi naa ifiemị, buluịmbẹlẹgha bara wẹnị serimị, tuumị ómịnị biin yeama kị nanawẹrịemi.
23 Jesus gbaa wó tuuduo-otubo pịrịmị: “Gesiimị, ị gbaa á pịrị, pẹrẹ-kịmị agọnọ Daabụọma sụọmụ yọmị bọụbọụgha fa.
24 Mọkpọ ị gbaa á pịrị, konubiri-undoku* noun opolo duo bụọmụ yọmị bọụbọụ akị, pẹrẹ-kịmị Ayiba Daabụọ duosụọmụ yọ dẹịn-emi.”
25 Tuuduo-otubo egberi naa ifiemị, angọbọụwẹrị gbaamị: “Te ụbọ kị laa zụọbụọmọye nanamịnị a o?”
26 Jesus gbẹẹn á diiwẹrị gbaamị: “Kịmịawọụ tọrụyọmị kụrọemi, anịa Ayiba tọrụyọmị benebene kụrọemi ye fa.”
27 Peter gbaa ụ pịrịmị: “Dii! Omịnị wo nanawẹrịemi yebosẹ abarasiinwẹrị iná tuuduodẹ, te arere kị wo laamịnị a o?”
28 Jesus gbaa á pịrịmị: “Gesiimị, ị gbaa á pịrị, yebosẹ mịẹ ayamọmụ ifie laa daba, Kịmịtọbọụ yaị bị wó gbene-gbene pẹrẹ ịkasịma tịtẹmịnị. Ámịnị ine tuuduomịnị otubo kpọ oi-maa pẹrẹ-ịkasị fịnị atịtẹwẹrị, ụgụlapẹlẹ Israel oi-maa ziituu fịnịbo pịrịmịnị
29 Anịa kịmị nẹ ine ẹrẹ kị duonị, warịama, bịna-oweiama, bịna-ereama, daụ, yin, awọụ anịghakpọ ogboama abarasiindẹ kịmịsẹ, sọnransi* dẹịn ifie-ama ka kị bịsẹ yebo nanamịnị, bá fagha fagha ụndụ kpọ nanamịnị.
30 “Anịa, biin kịmịama nẹ bei tịẹkirima bọlọụ-emi otubo tuu bụọmịnị, bá tuu-emi otubo bọlọụ bụọmịnị.
