Mateoba budata 9:1-38
-
Kayaba piradrube ẽãbuta bebisi (1-8)
-
Jesúsba Mateoa jarabu iyi kaidubema bamarea (9-13)
-
Ayuno ũrũ widipanu (14-17)
-
Jairo kauta bebisi; embera wera abauba Jesús wuata tobarisi (18-26)
-
Jesúsba bebisi dauberreaburanta ume akuza bedeabe ẽã buta aba (27-34)
-
Mejancha waraganumu yikora, wika panu yi jurepe barirãrã (35-38)
9 Jesúsʼra jambade bari karampe wansi Capernaúmʼena, iyi warida druaeda.
2 Iyi jũẽburude emberaramba Jesúsma wesida embera kayaba piradrube ẽã buta. Maunta Jesúsba kawuasi anya mejancha ijambuta Daizezera, maun karea jarasi maun embera kayabua: “Krincha orara warra, bua nekayirua odara joma perdonadogo”.
3 Maune Ley ũrũ jaradiapanuramba anyi bitapai mawuasida: “Jipa wawia ẽ naumba Daizezera”.
4 Jesúsba kawuabasi baera anyi sawua krincha kupanuta, jarasi: “¿Karea kayiruatru krinchabarabu marara?
5 ¿Karenta audre zare baipe? ¿Daya ‘iyaa jaraita, iyi kayiruara perdonasita’ o ‘piradrumarea jaraita mombe wamarea’?
6 Mamina maramba akudamarea Embera Warrabara zarea erchuta wuabemara perdonaita...”. Maune iya yi kayabua jarasi: “Piradrura, buyi camilla* jiraeda karampe wara deda”.
7 Mombe iyira piradru karampe deda wansi.
8 Mawua berabari, emberaramba anyirai bia aku akudru totosi, mombe biga diasida Daizezea, warinu mejancha zareata diasi baera emberara.
9 Jesúsba undusi Mateora nokoita plata cobra trajabari oficinane jewedabuta, mombe jarasi iyaa: “Mu kaidubara”. Aramaunta Mateora piradru karampe wansi iyi kaidu.
10 Tea juneane Jesúsʼra Mateo deda nekonumasi, maune zesida emberara nokoita plata cobra trajapanuranta akuza nekayirua opanuranta, mombe amba jewedasida Jesúsbawara nekoita akuza iyi kaidu panurabawara.
11 Mamina fariseoramba maun undui Jesús kaidu panura widisida: “¿Karea mara Nokora* nekonumu kaunra nokoraita plata cobra trajabarirabawara akuza nekayirua opanurabawara?”.
12 Jesúsba urinsi baera anya mawua taeta, anyaa jarasi: “Yi kayabu ẽãra nesida ẽ médicoeda waira, mamina yi kayapanurãrã waimbara.
13 Mawuera kawuaidua naumba bedeabara karenta jarakirakuta, ‘muara kangabu soborekea akudamarea wuabemaranta, mawua sacrificio awa ẽ’. Mura zesi baera nekayirua opanuranta akude, yi kerempa panuta akui kaude”.
14 Maune, Juan kaidupanuranta zesida Jesúsma bedeata widita: “Daira ayunapanu akuza fariseorasida ayunapanu mamina, ¿karea bu kaidupanurãrã ayunana ẽ?”.
15 Jesúsba panusi anyaa: “Embera aba juwa jidanumunera, yi neundukawuarãrã neẽ karea sopuabara baira, anyira amba panu baera yi juwa jidaime, ¿bumabi? Mamina zeyi ewari yi juwa jidaitabura wua anyibawara ba ẽ baita, mauneburu ayunanañi anyira.
16 ¿Kaiba wua yiwidiba remendanumuñi wua sorera? Wua sorera tuduzuabi baera wua yiwidiba, mawuara wuaburu zobea wãñi wua sorera.
17 ¿Kai emberamba nenduwuru cuero* sorede eda tui vino yiwidira? Iya mawua ora nenduwuru cuero sorera jenza wañi, vino yiwidisida wea wañi. Awuaraburu emberarambara vino yiwidira neduwuru cuero yiwidide eda buepanu, mawua ãrĩ ẽ bayi yi neduwuru cuerosida, mia vinosida wea wa ẽ bayi”.
18 Iyi wabida bedeanumu weda, noko abauta deguesi, sankokode kube karampe jarasi Jesúsʼa: “Naun umandau edara beisi baibara mu kaura, mamina wana mu kaidu, bua iyita tombaritara jenda piradruyi iyira”.
19 Aramaunta Jesúsʼra piradru karampe wansi iyi kaidu akuza iyi kaidu panurasida wansida kaidu.
20 Maune embera wuera aba Jesús ambudeare degue karampe iyi wuata tombaritasi, naumba embera wuerara 12 añobabasi waba kayabuta.
21 Iya iyibitabai krinchabasi baera: “Mua iyi wuata wiña tombaritara, mua kawuabu mura be totoita”.
22 Jesúsba jenda akuburude iyima aku karampe, jarasi: “Krincha orara kauzake bura bedogo, bua warinu Daizezeta ijansi baera”. Maune maun wuerara be totosi.
23 Tea, Jesús noko deda jũẽside, undusi flauta zabarirata akuza embera mejancha jenga barabuta.
24 Maune Jesúsba jarasi: “Ãĩ waidua, wũãwũã zakera bei ẽ, kãĩnumu iyira”. Maun bedea karea emberãrã ipidasida.
25 Kombeburu emberara ãĩ wambi karampe Jesúsʼra wũãwũã zake chuidu jũẽ totosi. Mombeburu iyi juwata jidasi, maune wũãwũã zakera piradru totosi.
26 Mombe maun bedeara jomaumba uri kawuasida maun druadera.
27 Jesús wainta taide, dauberreaburanta ume jurasida: “David warra, so borekeara dai karea”.
28 Jesús embera deidu jũẽburude dauberreaburamba pewa jũẽsida, maune Jesúsba anyaa widisi: “¿Marambara warinu ijambuka mua marara bebita?”. Anya panusi: “Noko, warinu ijampanu bua bebita”.
29 Aramaune anyi dabuta tombari karampe jarasi: “Maramba warinu ijampanuburu beyi”.
30 Aramaunta anyara undu totosi, mamina Jesúsba anya jarasi: “Kaubaidua naunta wuabemara jarakadaita”.
31 Maun dedauba wana tea anyara mamabema druade jomaura jarakasida.
32 Anyi wanside emberaramba Jesúsʼidu wesida embera demonio abuba bedeabe ẽã buta.
33 Maun tea Jesúsba maun emberamba demonio abuta ãĩ bue karampe bedeabisi. Emberaramba anyirai bedea toto karampe jarasida: “Dayirambara kãwũã undukabasi Israeldera”.
34 Fariseoramba jarasida: “Iyara demoniora noko karebata erchu baera kãwũã ãĩ buebu demoniorãrã”.
35 Jesúsbara puwururaza akuza deza deza jaradia wansi, iyara jaradia wansi judíora amba yi jurebariza* akuza jaradia wansi bedea bia Daizezeba zokaburude sawua bai ũrũ, adewara bebikuabasi emberara kayabeta.
36 Jesúsba emberara unduburuza sopua akubasi, akubasi baera ovejara kaiba akui neẽã panura kiranka akuza pokua panuta.
37 Mawue Jesúsba iyi kaidupanura jarasi: “Mejancha waraganumu yikora, mamina wikapanu yi jurepe barirãrã.
38 Maumba wididua naumba ne u yibaria audre zokamarea kairamba jurepeita”.
