Mateoba budata 20:1-34
20 ”Daizezeba zokaira naun kirankabu: Embera uva ne u erbuba diapeda juru wansi emberaranta iyita trajadamarea.
2 Iya anyaa jarasi denario moneda aba diaita ewari aba trajaburubari, mombe anyi bedea abarika zeda karampe zokakuasi trajadamarea.
3 Diapeda a las 9 babodoare iyira wansi akuza ne nendobadama, mama undusi emberara trajo neẽã panuranta.
4 Maun karea anyaa jarasi: ‘Maransi waidua muita trajaita mua mara pagayi maramba ganaburuta’.
5 Mawue anyira wansida, yi uva ne u yibarira akuza wansi a las 12 babodoare emberara jurude akuza wansi a las 3 babodoare emberara jurude, maune maunra emberarambida iyabauta jarasi.
6 Adewara kewarare a las 5 babodoare iya undusi unkuruta piradru edaubarabuta mombe widisi anyaa: ‘¿Karea marara neiwari traja ẽã kiu?’.
7 Anya jarasida: ‘Kaiba trajo diada ẽ basi baera’. Iya jarasi: ‘Mawuara waidua marasida muita trajaita’.
8 ”Ewari kiuburude, uva yibaribara iyi deda wuabemara trajo diabarita trʉ̃ karampe jarasi: ‘Trʉ̃kuara trajabarirãrã pagaita, naara pagara yi tea juneainu zedaranta, tea juneane pagara yi naara zedaranta’.
9 A las 5 babodoare, traja juena peadaranta trʉ̃sidadera anyi aba abakaua moneda denario aba diasida.
10 Maun karea yi naa traja juenapeadarambara krinchasida anyara audre diadaita, mamina pagasidadera moneda denario abapai diasida.
11 Anyaa maun diasidadera anyira kĩrũ bedeasida uva yibariume.
12 Anya jarasida: ‘Naunra tea zedarãrã hora abapai trajasida mamina daira bisia edre juazoa trajasida kiuyeda, ¿mawuasidu buara iyaba diaika daira?’.
13 Mamina anyidebema abaua jarasi iya: ‘Mua bura bia edaburu, mua bua jarasi denario moneda aba diaita, ¿mawua ẽka?
14 Bua diadapeadata jida karampe wara, maunra iyaba bua diada kiranka diakirambu tea zedabida.
15 ¿Mua nekare bia erbura muya kangade zokabe ẽka? o ¿bura so kayiruabuka mua kãwũã anyita bia edabu karea?’
16 Maun kiranka, yi zroma kiranka panurãrã tea juneainu panañi, yi kare ẽ kiranka panurãrã naa panañi”.
17 Anyi Jerusalén puwurueda wanze wane Jesúsba iyi kaidu 12 panuranta amba jureda karampe, ode wane naunta jarasi:
18 “Dayirãrã Jerusalénʼena wanze wa mama Embera Warrara diadayi sacerdotera nokoa akuza Ley ũrũ jaradiabarira mama jaradayi beadamarea.
19 Akuza emberara awuru puwurudebemara jida diadayi, mombe ipidayi anyira iyi karea, ubeadayi akuza bakuruma tachi jirabudayi beadaita, maunta ewari umbea baburude jenda piradruyi”.
20 Mawue Zebedeo warrara papaba Jesústa orrasi iyi warrara umebawarauba maune sankokode kube karampe iyaa ne widisi.
21 Mawue Jesúsba jarasi: “¿Karema zesi?”. Iya jarasi: “Mu warrara umea jarada bu kawa jewedadamarea bua zoka jundruburude, aba juwa arare aba juwa ankare”.
22 Jesúsba panusi: “¿Kawua kupanuka marambara karenta widikura? ¿Marambara doseapanuka mua copa* doira?”. Anya jarasida: “Doseapanu”.
23 Iya jarasi: “Marambara doyi mua copa doitanumura mamina mu ẽ yi jaraira kaita mu juwa arare jewedaita mawua ẽ buru mu juwa ankare, yi mama jewedairãrã mu Zezeburu jurusi mama jewedadamarea”.
24 Yi wuabemara Jesús kaidu 10 panuramba maun bedea uri kawuasidade mejancha kĩrũsida maunra membera ume panura ũrũ.
25 Mamina Jesúsba anyi joma amba jureda karampe anyaa jarasi: “Maramba kawuapanu nokora naun druadebemarambara emberara anya kangade obuta akuza embera wuabemara zokaseabubara anya kangade zokaseabuta emberara.
26 Mamina manyiraira mawua duana ẽ baibara awuaraburu maranta yi zroma bakirambuburu odaibara wuabemaramba jarabuta.
27 Akuza maranebemanta naara bakirambuburu wuabemara nezoka baibara.
28 Maunta osi Embera Warrabara iyira ze ẽ basi iyita akudamarea awuaraburu wuabemara akueda zesi mawua emberara mejanchauta endrubita iyi bebudeba”.
29 Anyi Jericódeba wane emberara mejanchauba pewansida.
30 Maune o kawa jeweda panasi dauberrea panuranta ume, maune urinsida Jesústa kawa berabari wanta, maun karea jurasida: “Noko, David warra so borekea akura daira”.
31 Maun karea emberaramba keasida anyira, mombe jarasida chupeadamarea mamina anyira chupeadai kaude audre jurasida: “Noko, David warra so borekea akura daira”.
32 Maun karea Jesúsʼra piki edaunumatotosi, anyita trʉ̃ karampe widisi: “¿Karenta omarea kangabu marambara?”.
33 Anya panusida: “Noko, karebara daiba unduita jenda”.
34 Jesúsʼra anyi karea mejancha so borekea karampe anyi dabuta tobarisi, aramaunta anyi dabura neneẽã totosi mombe wansida Jesús kaidu.
Bed’ea biobʉbari
^ Daizeze Bedeadera yi audrera copabara jarakirambu ẽ copa arata awuaraburu jarakirambu Daizezeba zokabuta oita.
