Mateoba budata 26:1-75
-
Sacerdoteramba beakiranpanu Jesústa (1-5)
-
Yuwera abauba aceite tuapuabuta Jesús buru ũrũ weabu (6-13)
-
Última Pascua odata akuza Judasba sewadata (14-25)
-
Jesúsba diamasi yiko ozokadata (26-30)
-
Jesúsba jarasi Pedroba jaraita iyira undukata (31-35)
-
Getsemaníne yiwidibu (36-46)
-
Jesúsʼra jidasida (47-56)
-
Tribunal zromane kawua osida (57-68)
-
Pedroba jarasi Jesúsʼra undukata (69-75)
26 Maun jara berabarida tea, nruema Jesúsba iyi kaidupanura jarasi:
2 “Maramba kawuapanu ewari umepei waekuta Pascua ewari zeira akuza maune Embera Warrara bakuruma tachi jirabudayi beadaita”.
3 Maune sacerdotera nokoranta akuza zorara puwurudebemaranta amba yi juresida sumo sacerdote Caifás deda, de ewarade.
4 Anyira bedea abarika zesida Jesús sawua sewai ũrũ.
5 Maune jarasida: “Fiesta ewaridera obe ẽ dayirambara, emberara mejanchauta bugadrudai baera”.
6 Jesúsʼra basi Betaniane, Simón lepraba kayabada deda,
7 maune yuwuera abauba kuguru zake omane, abasi aceite tuapuabuta, maunra mejancha valebasi. Maunta weasi Jesús buru ũrũ iyi nekonumuena.
8 Jipade kanga ẽ basi Jesús kaidubemarambara maunra. Maun karea jarasida: “¿Karea kãwũã ewarade ãrĩburu kaura?
9 Kaunta nedobuesidaburu plata mejancha diakasida mawua pobrera diaita”.
10 Jesúsba kawuaside anyi mawua bedea barabuta, jarasi: “¿Karea maunta jarabarabu marambara? Naun yuwuerambara mubari nekare biata osiburu.
11 Marambara pobrerãrã ewari jomaune mara kawa erbayi, mamina mura ewari jomaune marambawara ba ẽ bayi.
12 Naun yuweramba mu ũrũ aceite tuapuabuta weasidera, mawua osi mu bei ewari karea.
13 Naun drua jomaumae jaradiadayi bedea biara, maunebida jaradayi naun wueramba oda ũrũ, mawua kirambedayi iyi ũrũ”.
14 Apóstolera 12bude basi Judas Iscarioteta, iya aku wansi sacerdotera nokoranta,
15 mombe anyaa jarasi: “Mua maraa Jesústa jida diara, ¿sombe diadai marambara?”. Anya jarasida 30 moneda* diadaita.
16 Maunemba unta Judasbara krincha jundrusi sombede jida diaita Jesúsʼra anyaa.
17 Pan Yi Waribibari Neẽãbu Fiesta ojundruside Jesús kaidubemaranta iyidu zesida, mombe widisida: “¿Buara Pascuara sama omarea kangabu?”.
18 Iya jarasi: “Waidua puwurueda, juruidua Fulanota mombe iyaa jaraidua: ‹Dai Nokoba* jarabuesia: “Mu bei ewarira arakaitaba. Muara Pascua ewarita bu deda oyi mu kaidubemabawarauba”’”.
19 Jesús kaidubemarambara iya jaradade osida akuza nekare joma osida Pascua ewarita.
20 Diamasiare Jesúsʼra iyi 12 apóstolerabawara amba jewedasi.
21 Anyi nekobarabude, Jesúsba jarasi: “Maranebema abauba mura mu nejurara jida diayi”.
22 Maunta uri, Jesús kaidubemarãrã mejancha sopuasida, mombe jomaumba jarasida: “Noko mu ẽ bumabi”.
23 Jesúsba panusi: “Naun plato jogoade mume juwa buebuta iyi.
24 Warinu, Embera Warrara beiyi, Daizeze bedeade maunta jarabu baera mamina kareamba zuburiai Embera Warra iyi nejurara jida diadara, maun emberara biga bakasi toda ẽ basiburu”.
25 Judasba Jesús iyi nejurara jidadiai na, naunta widisi: “Rabí, ¿bumabi mu ẽ?”. Jesúsba iyaa jarasi: “Bua biʼia kauchu”.
26 Anyi nekobarabude Jesúsba panta jiraedasi mombe yiwidisi, maun tea pan buekua karampe iyi kaidubemara dedekasi mombe jarasi: “Koidua, naumba mu kakuata jarakirambu”.
27 Maun tea vino copade buta jiraeda karampe yiwidisi adewara anyaa dedekasi, mombe jarasi: “Jomaumba doidua naunra,
28 naumba mu wata jarakirambu baera, ‹naun waba bedea abarika zebisi’ Daizezeta iya jurukuadarambawara akuza emberara mejanchauta karebayi, maunemba yi kayirua odapeadarãrã perdonanañi.
29 Mua naun vino idi dodara wua do ẽ bayi, vino yiwidi doyeda mu Zezeba zokaburu ewaride”.
30 Maun tea Daizezea trãsida, mombe wansida Olivo katumainu.
31 Maune Jesúsba jarasi: “Idi diamasi mu sawua berabariburu karea, marambara nei aña odayi, Daizeze Bedeade jarabu baera: ‹Poyi muara yi oveja akubarira akuza yi ovejarãrã jarasoadayi’.
32 Mamina mu jenda piradruda tea mara na wañi Galileaeda”.
33 Pedroba jarasi: “Bu sawua berabari karea wuabemaramba aña odaimina, mura bume kerempabayi”.
34 Jesúsba iyaa jarasi: “Nane diamasi eterre berui na jarama umbea jarayi bua mura undukata”.
35 Pedroba jarasi: “Mu bume beibaramina, muara jara ẽ bayi bura undukata”. Wuabemara Jesús kaidupanurabida iyaba jarasida.
36 Tea Jesúsʼra iyi kaidubemarabawara wansi Getsemaníena, mama iya jarasi: “Mura zawa yiwidi wañi, nama jeweda juaidua”.
37 Maune edesi iyi kaidu Pedrota akuza Zebedeo warraranta ume. Maune Jesúsʼra sopua sentitotosi adewara mejancha krincha zroma ototosi.
38 Iya jarasi: “Mura mejancha krincha zroma oku, maumba bei kiranka sentiku. Nama piki juaidua akuza mu daucha uruma panaidua”.
39 Tea anyideba jingatotosi iyira mombe sankokode barrukuba wa karampe yiwidisi: “Zeze buma bigaburu munemba ãĩ buera naun copata, mamina bua kangabutru berabaribira mua kangabuta berabaribi kaude”.
40 Tea iyi jenda zeburude undu zesi iyi kaidubemarãrã kãĩguebarabuta mombe Pedroa widisi: “¿Hora ababayedabida juabe ẽ basika marambara mu daucha uruma?
41 Uruma panaidua akuza badua yiwidipanaidua nekayirua yi edebi ẽ baita, warinu, mara krinchadera okirambu mamina mara kakuara zarea neẽãbu maun oira”.
42 Tea akuza jenda wansi Jesúsʼra, mombe yiwidisi: “Zeze naun copa doi awuara nekare oita wua neẽburu, bua kangabuta berabaribira”.
43 Iyi jenda zeburude undusi anyira dapea barabu baera kãĩ totobarabasita.
44 Jesúsba anyi amae karampe akuza jenda yiwidi wansi mombe iyabau bedeata jarasi.
45 Tea Jesúsʼra iyi kaidubemara panuinu zesi mombe anyaa jarasi: “¿Marara aduʼa kãĩguepanuka kare berabari ẽ kiranka? Urikuanaidua, Embera Warra embera kayiruara jida diadaira arakaitaba.
46 Piradruidua, wandru, mu jidadiai emberara arakaitaba”.
47 Maune iyi waidi bedeanumuena zesi Judasta 12 apóstoleranebemanta, iyi kaidu zesida emberaranta mejancha, maunrambara kuchota akuza garroteta apanasi, anyira sacerdote nokoramba akuza zorara puwurudebemaramba zokasi.
48 Judasba anyaa jarasi iya karenta oita mawua kawuadamarea saunta: “Mua ningaburuta maunta jidaidua”.
49 Aramaunta Jesúsʼidu wa karampe naunta jarasi: “Kua Rabí” maune ningatasi.
50 Maune Jesúsba widisi: “¿Karema zesi bura?”. Aramaunta emberara kabananumuba Jesústa orraeda karampe jidasida.
51 Maune Jesús kaidubema abauba kuchota jiraeda karampe sumo sacerdote nezoka kuwuruta urapetatasi.
52 Jesúsba iya jarasi: “Merara bu kuchora, yi kuchoba mia beabura kuchoba beiyi.
53 Mua mu Zezea widiseabu atia zokamarea ángeleranta mil audre,* ¿kawua ẽka bua maunra?
54 Mamina mua maunta widira, ¿sawua aripe berabari Daizeze Bedeade berabariya abura?”.
55 Maune Jesúsba kabananumua jarasi: “Marara muinu zesida kuchoeda akuza garroteda dayima nezrugamiata jidadai kiranka. Mua Templode ewariza jeweda jaradiabasidera marambara, ¿karea jidada ẽ basi?
56 Mamina naun joma kãwũã berabariburu profetaramba budata aripe berabarimarea”. Maune iyi kaidubemarara miru wemba wansida mombe iyita doba amaesida.
57 Emberarambara Jesúsʼra sumo sacerdote Caifás deda erjuensida, mama amba yi jurepanasi Ley ũrũ jaradiabariranta akuza zoraranta.
58 Pedrobara jingauba pewa wansi Jesúsʼra, sumo sacerdote de ewaraidu mombe mama jewedasi nezokara mama panurambawara kawuaita karenta berabaribasita.
59 Sacerdotera nokoramba akuza judíora tribunal zromane buramba jurupanasi sawua sewidata jaraita Jesús ũrũ, mawua beadamarea.
60 Mamina unduda ẽ basi anyara, embera mejanchauba sewidata jarasidamina. Maune embera umemba
61 jarasida: “Naun yumakeramba jarasi: ‹Muara Daizeze dera tegabueseabu mombe ewari ubeade jenda parãseabu’”.
62 Maune sumo sacerdoteba piradrutoto karampe widisi: “¿Kare panu ẽka buara? ¿Karenta krinchabida naunra emberaramba bu ũrũ jaranumu kareara?”.
63 Mamina Jesúsbara kare jara ẽ basi. Mawue sumo sacerdoteba jarasi: “Warinuta jarara, ¿bura Cristoka? ¿Daizeze warraka? Bua maunta jara ẽ buru, buara Daizeze na sewa neburuta jaranumañi”.
64 Jesúsba jarasi: “Bua jaratabeta iyi, mamina mua mara jarayi: Marambara nanemba unta undudayi Embera Warrara Daizeze zareabarabu juwa arare jewedabuta akuza jãrãra ũrũ uruta”
65 Sumo sacerdoteba iyi wua koenta karampe jarasi: “Naumba kayiruata jaraburu Daizeze ũrũ, wua kare jaraira neẽ, mara jomaumba uritabeda iya kare kayirua jaratabera,
66 ¿karenta krinchabu marambara naun ũrũra?”. Anya jarasida: “Beadaibara kaunra”.
67 Aramaunta emberarambara iyira kirama dau idusida mombe chinsida akuza kirama tachisida,
68 adewara jarasida: “Bua bura Cristo abu baera jarada kaiba deguebisita”.
69 Maunenara Pedrora de ewarade jewedabasi, maune embera wera mamabema nezokaba iyaa jarasi: “Busida Jesús Galileadebema kaidu wambasi”.
70 Mamina iya jomaunra na merasi, mombe jarasi: “Muara kawua ẽ bua yi karesida jaranumura”
71 Maunta, iyi de ewaradeba wantakude, embera wuera abauba undusi, mombe wuabemara mama panura jarasi: “Naun emberara Jesús Nazareno kaidu wambasi”.
72 Pedroba akuza merasi, iya jarasi: “Mua warinu jaraku Daizeze na kaun emberara undukata”.
73 Maun daara ẽãne emberara mama panuramba orrasida Pedrora, mombe jarasida: “Warinu busida anyidebema, bu sawua bedeabuba kawuabibu”.
74 Maunebida Pedrobara merasi,* iya jarasi: “Warinu, Daizeze na jaraku mua undukata kaun emberara”. Maun audre ẽãne eterreta berusi.
75 Maune Pedroba kirambesi Jesúsba iyaa na jaradata: “Eterre berui na jarama umbea jarayi bua mura undukata”. Mombe ewaraeda wa karampe mejancha jengasi.
