Mateoba budata 6:1-34
-
BEDEA BIA KATUMANE JARADATA (1-34)
6 ”Maramba nekare obudade oraindua wuabemaramba bari bia akudamarea, maramba mawua odara Daizeze untubemamba kareba ẽ bayi marara.
2 Embera karebaburude wuabemara jarakarara.* Sewata nembia opanurane kiranka orara. Anyara judíora amba yi jurebumae* akuza ode nembiata opanu anyi ũrũ ibia bedeadamarea, maunrambara maunemba unta nembia unduda ẽ bayi.
3 Awuaraburu bua wuabemara karebaburudera, yãrã jarakarara maunta.
4 Mawua bua embera abauta karebasiburu kaiba kawuada ẽ bayi, mamina Daizezeba joma akubu baera, iya nembiata diayi maumbari.
5 ”Abarika, mara yiwidiburudera sewata nembia opanurane kiranka oraindua, anyira judíora amba yi jurepanumae piradru yiwidipanu akuza ode, bari wuabemaramba akudamarea. Anyira bari maumba sobiapanañi, mamina kaunemba wua undu ẽ bayi.
6 Mamina bu yiwidiburudera bu cuarto cerra karampe Daizezea yiwidira, iyira mia kaiba undu ẽ mina iya joma akubu, maun karea iya nembiata diayi bua.
7 Mamina, bu yiwidiburudera iyabauta badua jararara, Daizezea yiwidibe ẽã panuramba obu kiranka. Anya krinchapanu baera daara yiwidipanuburu urinta Daizezeba.
8 Kaunra kiranka panaraindua, Daizezebara kawuabu baera maramba karenta nesidabuta, maramba iyaa widi naweda.
9 ”Yiwidibudadera kãwũã yiwididua:
”‘Zeze untubema, daiba widipanu jomaumba wawia akudamarea bu trʉ̃ta.
10 Widipanu bua zokai ewarita zemarea akuza widipanu bua kangabuta berabarimarea untu akuza nama egorodebida.
11 Widipanu idibema yikota diamarea;
12 widipanu daiba nemitia odata perdonamarea. Wuabemaramba dai zuburiabibudade maun perdonabu kiranka.
13 Karebara nemitia oẽ baita akuza endrubira Satanásdeba’.
14 ”Maramba wuabemaramba nemitia odata perdonara, mawuara Daizeze untubemabida perdonañi maramba nemitia obura.
15 Mamina maramba wuabemaramba nemitia odata perdona ẽ buru, mawuara Daizezebara maramba nemitia obura perdona ẽ bayi.
16 ”Ayunabudadera sewata ayunapanurane kiranka oraindua, anyara anyi kiranemba undubipanu sopuapanuta akuza zuburiapanuta mawua wuabemaraba kawuadamarea ayunapanuta. Mamina anyira bari maumba sobiapanañi, maunemba wua undu ẽ bayi.
17 Mamina bu ayunaburudera bu budata ara ora akuza kirata zugura.
18 Mawua miomba kawuada ẽ bamarea bu ayunabuta, awuaraburu Daizezeba kawuamarea, iyira miomba undu ẽ mina iyara joma akubu, iya bua nembiata diayi.
19 ”Naun druade jururaindua nembia erbaita, namara polillaba akuza mongosia karampe ãrĩseabu baera akuza zrugaseapanu baera.
20 Awuaraburu zarea oidua Daizezeba kangabuta oita, mauntru mia polillaba mia mongosioba jombi ẽ bayi akuza zrugada ẽ bayi.
21 Warinubaira emberambara audre jurubu iyima nekare biata.
22 ”Dayira dabura lámpara kirankabu, unata diabu dayaa. Maumba dayi dabuba nembiata akububuru erbayi una daya nesidabuta.
23 Mamina, bu dabuba nemitiata akububuru, mawuara bura paringuadebayi. Kareamba mitia bai dayi unanebadata paringuade bidaburu.
24 ”Mia abau emberanta trajabe ẽ embera umeitara, iya aba kangaburude jurayi ababemara. Mawua ẽ buru abau are kerempa bayi mombe abaume kerempa ba ẽ bayi. Maumba embera abauba plata erbaita audre jurububuru, maun emberambara Daizezeba zokabura obe ẽ bayi.
25 ”Maumba mʉ̃a mara jaraya: Aukara krincha oraindua, maramba kare koi karea akuza kare doi karea akuza kare jui karea. Warinubaira dayi zokai baita audre yibia yikoira akuza kare jui erbaira.
26 Kirankita akuidua ibanaranta, anyira ne u ẽ, mia neẽ anyi yiko sama wuagaita, mamina Daizeze untubemambara nendiabu anyira. Marara, ¿audre valebu ẽka maunraira?
27 ¿Dayira daara baika krincha zroma obudeba?
28 Adewara neẽ karea krincha oita kare wua jui kareara, krinchaidua neponora sawua pawarabuta, anyira zarea traja ẽ akuza mia wua kasu ẽ.
29 Mamina mia Salomónsida mawua kirawarea wua ju ẽ basi plata mejancha erbasimina.
30 Chirua oidebura Daizezebara biʼia pawarambibu nruema neẽã totoimina akuza tubude babuedaimina. Marara Daizezebara audre bia yobiyi, maramba audre ijampanuburu.
31 Maumba krincha oraindua kare koi karea, kare doi karea akuza kare jui karea.
32 Emberara Daizeze odebu ẽãratru krincha opanu maun kareara. Daizeze untubemambara bia kawuabu maramba nesidabuta maun joma.
33 ”Daizezeba zokaira akuza iya jarabu oira audre yibia baibara maraintara, mawua opanuburu joma erpanañi maunra nembiara.
34 Nruema kare berabari karea aukara krincha zroma oraindua, nubida awuru bedea zromata undudai baera, warinubaira nruemaza bu baera bedea zromara.
