Mateoba budata 12:1-50
-
Jesúsba zokabu sábado ewarira (1-8)
-
Embera juwa aba bagubuta bebisi (9-14)
-
Nezoka Daizezeba kangata (15-21)
-
Demonioranta ãĩ buebu Daizeze jaure zareadeba (22-30)
-
Nekayirua perdonabe ẽãta (31, 32)
-
Yi netadeba kawuadayi saunta bakuru biata (33-37)
-
Jonás berabarida kiranka berabariyi (38-42)
-
Demonio emberaneba ãĩ wãna jenda zeburude (43-45)
-
Jesús papata akuza yi memberaranta (46-50)
12 Ewari aba sábado ewaride, Jesúsʼra ne u* utabu enzadra berabarisi, maune iyi kaidubemarãrã jarra deguesi. Aramaunta anyara maun ne udebemanta buaeda karampe kosida.
2 Maunta undui fariseoramba Jesúsʼa jarasida: “¿Undu ẽka buara bu kaidubemaramba sábadode oẽ baibarata obarabura?”.
3 Aramaunta Jesúsba jarasi: “¿Urimbari ẽka marambara Davidʼba akuza iyi kaidubemaramba jarra degueside kare odara?
4 David iyi kaidububawara Daizeze deidu jũẽnsidadera, kosida mama pan Daizeze na buebadata.
5 Akuza urimbarisida ẽka Moisés Leyba jarabuta, sacerdote templode badarambara sábado ewarira badu ewari kiranka akupanasita, mawuasidu maunra Daizezeitara kayirua ẽ basi.
6 Mamina mua mara jaraya namabu embera aba templo audre yibiata.
7 ‘Muara kangabu soborekea akudamarea wuabemaranta, mawua sacrificio awa ẽ’, maramba naun bedeaba karenta jarakirambuta biʼia urinsidaburu, zuburiabida ẽ bakasi yi kare kayirua oẽ panuranta.
8 Kawuapanaidua embera Warraba zokabuta sábado ewarira”.
9 Mamaumba wana tea iyira wansi judíora amba yi jurebarima.*
10 Mama basi yumakera juwa aba bagubuta, maune Jesústa jida ededamarea fariseoramba naunta widisida: “¿Sábado ewaridera kayaberãrã bebiseabuka?”.
11 Jesúsba anyaa jarasi: “Mara ovejata sábado ewaride zobeade uwãra, ¿bari akunumaika marambara kareba ẽã?
12 Mamina emberara audre valebu ovejaraira, maumba kayirua ẽ sábado ewaride nembia oira”.
13 Aramaunta Jesúsba embera kayabua jarasi: “Bu juwata wuara”. Naun emberamba iyi juwa wuaburudera jenda betotosi.
14 Mamina fariseorãrã bedea abarika zesida Jesús beadaita.
15 Maunta uri Jesúsʼra mamaumba wansi, maune embera mejanchauta iyi kaidu wansida, iyara maunra emberara bebikuasi.
16 Mombe jarasi mia abaua jarada ẽ marea kaita iyira.
17 Mawua aripe berabarisi profeta Isaíasdeba jarabaridata:
18 “Naunra mu nezoka mua kanga, mua jidasi iyira, iyara mura sobiabibu, mua mu jaure zareata iyaa diayi mombe iya emberara jaradiayi saunta biata akuza saunta zeri ẽãta.
19 Iyira bedeaka ẽ bayi mia jura bedea ẽ bayi, mia abauba urina ẽ bayi odera iyi nemira.
20 Iyara cha bakuru bua wambodobura bueta ẽ bayi mia lámpara kibodobura kia ẽ bayi, maunta mawua oyi joma nekare añanumu ara oyeda.
21 Emberarambara iya karebaita ijanañi”.
22 Maune erjuensida Jesúsʼidu embera aba dauberreabuta akuza bedea be ẽã buta demonio abu karea, Jesúsbara iyira bebisi, aramaunta iyara jenda undusi akuza bedeasi.
23 Maunta undui emberara yiya aku akudrutotosi, mombe jarasida anya: “¿Naun ẽka David warrara?”.
24 Maunta uri fariseoramba jarasida: “Naumbara demoniorãrã ãĩ jurekuabu Satanásdeba,* demoniora nokodeba”.
25 Jesúsba anya karenta krinchabuta kawuabu baera naunta jarasi: “Gobiernone panuranta anyirai bedea abarika zeda ẽ buru, anyira bia wa ẽ bayi akuza puwuru abaude emberaranta mawua ẽ buru memberanta anyirai bedea abarika panu ẽ buru, bia wã ẽ bayi.
26 Maun kiranka, Satanásba ariwia Satanásta ãĩ buebuburu, mawuara iyikuzabida bedea abarikabu ẽ, iya maunta ora, iya zokabura, ¿sawua bia zokai?
27 Adewara mua demonioranta Satanásdeba ãĩ buebuburu, ¿mara kaidu panurambara kaideba ãĩ buepanu? Maun karea mara kaidu panurambara jaradayi maramba jarabarabura aña chuta.
28 Mamina mua demonioranta ãĩ buebuburu Daizeze jaure zareadeba, kawua panaidua Daizezeba zokabu ewarira arabasita* maramba kawua ẽ na.
29 Adewara, embera abauta yumakera mejancha zarea barachu deda nezrugakirambuburu, bumabi maun deda nezrugaira na tajuimbara maun yumakeranta mawuatru zrugaseabayi nekare iya deda erbuta.
30 Yi mumebu ẽãra, mu nejura, adewara emberaranta muma zemarea kareba ẽ buru, maumbara jurekuabu emberara muma zeibadata.
31 ”Maun karea mua mara jarayi, badu nemitia emberamba oburura akuza awuru ũrũ imitia jaraburura perdonanañi, mamina Daizeze jaure zarea ũrũ ikayirua jarara, mauntru perdonana ẽ bayi.
32 Bari jaraita Embera Warra ũrũ ikayirua bedeadara, Daizezeba perdonañi maunsida mamina Daizeze jaure zarea ũrũ ikayirua bedeara, mauntru perdona ẽ bayi mia atia mia ura zeide.
33 ”Maramba bakuruta bia aku erpanuburu, neta biata diayi mamina bia akuda ẽ buru neta biara dia ẽ. Yi netadeba akudayi maramba maunra bakuru bia basi kawuaita.
34 Damanemba zesi marara, ¿sawua nembiata jarai marambara, marara embera kayiruaburu? Dayara dayi sodebuta jarabu baera.
35 Embera biabara iyi sode nekare bia erbuta jarabu, mamina embera so kayiruabara iyi sode nekayirua erbuta jarabu.
36 Mua akuza naunta jarayi mara, Daizezeba kawua oi ewari zeburudera emberara kawua odayi anya nekare aña jarada karea.
37 Maramba kare jarapanunemba embera bia adayi marara akuza maramba kare jarabudadeba jaradayi kayirua osita”.
38 Ewari aba unkuru Ley ũrũ jaradiabariramba akuza fariseoramba Jesúsʼidu wana karampe widisida: “Noko,* nekare zromata ora bua daia undubita bura Daizezeba zokasita”.
39 Jesúsba anyaa panusi: “Kerempa panu ẽ embera idibemarara, nekayiruatru opanu maumba jurupanu nekare biatru undubidamarea, mamina maunra unduda ẽ bayi, awuaraburu undudayi Jonás berabarida kiranka berabarita.
40 Abarika Jonás beda zroma biteda bada kiranka ewari ubeabayeda* Embera Warrasida joudayi ewari ubeabayeda.
41 Idibema emberaranta Nínivedebemabawara jenda piradruburude Daizezeba kawua oi ewaride, maunera Nínivedebemarambara undubidayi nekare aña obarabadata idibemaramba. Jonásba jaradia bada karea anya nemitia obadara idubusida baera, mamina namachu Jonás audre yi zromata.
42 Daizezeba kãwũã oi ewaridera jenda piradruyi noko wera Sabadebemata emberara idibemarabawara, mombe idibemara jarayi karenta aña osidata. Iyira jingauba zesi baera Salomónba krincha bia jarabu urinta. Mamina namachu Salomón audre yi zromata.
43 ”Demonio abauta emberanemba ãĩdogodera maumbara jurudogo iyi sama enauinta mamina undu ẽ.
44 Mombe iya jarabu: ‘Jenda wañi mu deda muyi na badama’. Iyi mainu jũẽburudera undubu mio neẽãnumuta akuza joma ara obarinumuta.
45 Maun tea maun demoniobara juru wañi 7 demoniora iyi audre mitiachuta mombe mama paneñi anyira, maumba yi embera maun abura audre zuburiayi na badaira, maunta berabariyi idibema embera kayiruarãrã”.
46 Iyi emberara bedeanumuena yi papata yi memberaume ãĩ ewarade edaubarabasi iyiume bedeakirampanasi baera.
47 Maunta abauba Jesúsʼa jarasi: “Ãĩ ewarade edaubarabu bu papata bu memberabawara, bume bedeakirampanu anyira”.
48 Mombe Jesúsba iyaa panusi: “¿Kaita mu papa akuza kairanta mu membera?”.
49 Maunta iyi kaidupanurama juwa su karampe jarasi: “Akura, kaunranta mu papa, kaunranta mu memberara.
50 Joma yi mu Zeze untrebemamba jarabude butru mu membea akuza mu papa”.
Bed’ea biobʉbari
^ Naun ne ura nawedara zokapanasi pan oita.
^ Lit. “sinagogas”. Amba yi jurepanasi Daizezea yiwidita akuza Daizeze ũrũ kawuaita.
^ Lit. “Belcebú”. Naumba jarakirambu demoniora nokota.
^ Lit. “mara ũrũ basi” o “mara kawabasi”.
^ Lit. “Jaradiabari”.
^ Lit. “ewari umbea akuza diamasi umbea”.
