Mateoba budata 22:1-46
22 Akuza Jesúsbara awuru yizaranemba jaradiasi, iya jarasi:
2 “Daizezeba zokabura naun kirankabu: Noko abauba fiestata osi yi warrata juwa jidasi baera.
3 Nokobara zokabuesi iyi nezokaranta emberara jaramarea fiestaeda jũẽnamarea, mamina maunra emberarara jũẽna ẽ basi.
4 Maun tea iyi nezokarãrã audre zokabuesi na zokabuedaira, mombe naunta jarasi: ‘Yi zedaira jaraidua, “yikora yi wima. Maunra beasi mu tororata akuza mu paka biaranta, joma yi aribaema. Zeidua fiestaeda”’.
5 Mamina maunra bedea uri ẽã wansida unkuruta mea, unkuruta wansida anyi negosioeda trajade.
6 Maune unkuruba noko nezokaranta jidada karampe, poda karampe beasida.
7 ”Aramaunta nokobara kĩrũ karampe zokabuesi iyi gorogororanta, maunrambara maunra emberara mia beamiaranta makena karampe, babuesi anyi puwurura.
8 Maunare iyi nezokara jarasi: ‘Fiesta odaira joma yi aribaema, mamina mua emberara trʉ̃kuadarãrã trʉ̃ ẽ baibarabasi.
9 Maun karea waidua oabauidu mombe trʉ̃idua emberara ode panuta fiesta eda juenamarea’.
10 Maunra nezokarambara juru wansida emberarata fiestaeda juenamarea, maune basi embera biaranta akuza embera biara ẽãta. Mawua maun fiestaedara emberara mejanchauta jũẽsida.
11 ”Nokoba iya trʉ̃ kuadara aku jũẽside, undusi embera abauba, fiestaeda wua ju waimbarata ju wa ẽ basita.
12 Maun karea iya jarasi: ‘Naun fiestade wua juimbarara, ¿karea jun ze ẽ basi buara?’. Mamina iyara kare panu ẽ basi.
13 Aramaunta nokobara iyi nezokara jarasi: ‘Kaun emberara juwata jirume juna karampe ãĩ edeidua paringuaeda, iyira mama jengayi akuza kare oi kawua ẽ taibayi kĩrũbiba’.
14 ”Daizezebara embera mejanchauta trʉ̃bu, mamina embera wikauta jidabu”.
15 Fariseorãrã awururabawara bedea abarika zesida Jesús aña bedeabidaita.
16 Anyara anyi kaidu panuranta akuza Herodes kaidu panuranta zokabuesi naun bedeata jaramarea: “Noko,* daibara kaupanu buara warinuta jarabuta akuza warinuta jaradiabuta Daizeze ũrũ, adewara buara bia kawuabu emberara sawua krinchabura, maumba juru ẽ anyi sawua sobiabita.
17 Bumara, ¿noko Romanebemamba plata widibura diaibaraka? O ¿dia ẽ baibara?”.
18 Mamina Jesúsbara anyi sawua krinchabura bia undu kawuabasi baera, naunta jarasi: “Sewata kãwũã embera bia kiraka kube marara, ¿karea aña bedeabikiraku maramba mura?
19 Mua undubidua kare plataba pagadaita”. Maune anya denario monedata aba wesida.
20 Mawue iya panusi: “¿Naun monedabara kai kirata abu akuza kai trʉ̃ta erchu?”.
21 Anya panusida: “Noko Romanebema”. Aramaunta iya jarasi: “Mawuara, noko Romanera noko Romanebema diaidua, mamina Daizezedera diaidua Daizezea”.
22 Maun uri, anyira yiya aku akudrusida akuza wua kare jarada ẽ basi, mombe wansida.
23 Iyabau ewaride zesida saduceoranta, maunrambara beidara jenda piradrui ũrũra ijana ẽ basi, mawue anya widisida:
24 “Noko, Moisésba jarasi: ‘Yumakera aba wũãwũã neẽã beisiburu, yi membeata juwa jidaibara maun pendraume, anya wũãwũãbaraburura yi membea beida wũãwũãra kiranka akudamarea’.
25 Daide eda basi yumakeraranta 7, maunrãrã yi memberabasi. Yi naabemara juwa jidasi mamina wũãwũã neẽ beisi, maumba pendrara yi ararebemaume mia kãĩsi.
26 Tea abarika berabarisida yi 7 panurasida.
27 Tea beisi yi yuwuerasida.
28 Mawuara jenda piradruburu ewaridera, ¿kai kimabai maun yuwuerara? Anyi jomaunta maun yuwueraume juwa jidasiburu”.
29 Jesúsba panusi: “Marara aña bedeabarabu, marambara undukawuada ẽ Daizeze Bedeara mia Daizezera kareamba zareabarabura.
30 Jenda piradruburudera yumakerarãrã akuza yuwuerarãrã juwa jida ẽ bai baera, awuaraburu anyira ángelera untu panu kiranka panañi.
31 ¿Lebari ẽka marambara? Daizezeba jenda piradrui ũrũ naun jarabaridara:
32 ‘Mura Abrahán Daizeze, Isaac Daizeze akuza Jacob Daizeze’ iyira beidara Daizeze ẽ, awuaraburu zokaipanura Daizeze”.
33 Jesúsba sawua jaradiabu urinai, emberara yiya aku akudrusida.
34 Fariseoramba urinsidade saduceorambara Jesús bedeara panu auda ẽ basita, maun karea anyira jomaunta bedea abarika zesida.
35 Maunranebema abauba biʼia kawuabasi Ley ũrũ, maun karea kriña bedeata widisi Jesúsba aña panumarea:
36 “Noko, Leyba zokabudebemara, ¿saunta audre yibia?”.
37 Jesúsba panusi: “‘Daizeze Jeowara kangara jipa bu soiduba, nekare joma bua obudeba akuza bu krinchaiduba’.
38 Naunta yi naarabema akuza Leydera naunta audre yibia.
39 Yi maun arebemara naara jarada kirankachu, naunta iyi: ‘Kangara wuabemarãrã buyikuza kangabu kiranka’.
40 Naunra umenemba zesi Moisés Leyba jarabura akuza profetaramba jarabura”.
41 Tea fariseora ambabarabude, Jesúsba anyaa widisi:
42 “¿Maramba karenta krinchapanu Cristo ũrũra? ¿kai warra iyira?”. Anya panusi: “David warra”.
43 Iya widisi: “Mawuera, ¿karea Davidbara jaure zareadeba, Noko asi iyaa? Davidba jarasi:
44 ‘Jeowaba jarasi mu Nokoa: “Jewedara mu juwa arare bu nejurarãrã bu juwa edre baebiyeda”’.
45 Davidba, Cristota Noko asiburu, ¿sawua iyi warra baibasi?”.
46 Mia abauba panu ẽ basi iya wididara. Akuza mamaumba unta miomba bedea widida ẽ basi.
Bed’ea biobʉbari
^ Lit. “Jaradiabari”.
