Mateoba budata 4:1-25
4 Maun tea Daizeze jaure zareaba Jesúsʼra krinchabisi desierto eda wamarea, mawua Satanásba nekayiruata obimarea.
2 Jesúsʼra ewari 40 bayeda neko ẽã basi maumba jarra deguesi.
3 Mama Satanásta iyaa yi undubi karampe jarasi: “Buta warinu Daizeze warraburu, naun mongarata yiko* babira”.
4 Aramaunta iya panusi: “Daizeze Bedeaba jarabu: ‘Emberara bari yiko awauba abu ẽ, awuaraburu Daizeze Jeowaba joma jarabudeba’”.
5 Aramaunta Satanásbara Jerusalén templo kinbuidu kubusi Jesúsʼra.
6 Mombe jarasi: “Buta warinu Daizeze warraburu namaumba utotora, ¿Daizeze Bedeaba jarabu ẽka?: ‘Zokayi iyi ángeleranta buta karebamarea’ akuza ‘anya bariedadayi bura mawua buta neida berabari ẽ bamarea’”.
7 Aramaunta Jesúsba jarasi: “Mamina akuza jarabu: ‘Kriña nekarenta orara, bari Daizeze Jeowaba karebaseabu kawuaita’”.
8 Maunare Satanásbara edesi katumaena, mama undusi puwurura naun drua jomaunebuta akuza nembiara naun druadebura.
9 Mombe iyaa jarasi: “Mua naunta joma bua diayi, mu na sankokode kubera akuza muaa ibia bedeatara”.
10 Jesúsbara jarasi: “Wara namaumbara, Daizeze Bedeaba jarabu baera: ‘Jeowaburu ibia bedeara akuza iya jarabuta ora’”.
11 Aramaunta Satanásʼra wansi, maune ángeleranta zesida Jesús karebadaita.
12 Maun tea, Jesúsba urinside Juan jidasidata, wansi Galileaeda.
13 Mamaumba, Capernaúmne besi, Nazaretdeba wana tea. Maun druara pusa kawabu, Zabulón druade akuza Neftalí druade.
14 Naunra mawua berabarisi profeta Isaíasba naun bedea jaradata aripe berabarimarea:
15 “Emberara Galileadebemara, Zabulónebemara, Neftalídebemara, pusa kawa Jordán juwa ankare panura.
16 Naunra puwuru duamumaera ewarira paringuanumasi, maune mejancha unanumuta undusida. Paringuanumasi baera maumba bei eda edebasi anyira, mamina maune undusida unata”.
17 Maunemba unta Jesúsba jaradia jundrusi naun bedeata: “Idubuidua maramba nekayirua opanura, Daizezeba zokaira arakaitabasi baera”.
18 Tea iyi Galilea doya jirabide undusi emberaranta ume atarrayaba beda bea panuta, anyira beda beamiarabasi baera. Abara Simónbasi iyabauta Pedro apanasi, yi ababemara Andrésbasi, anyira yi membeabasi.
19 Mombe iya jarasi: “Mu kaidu zeidua, mua jaradiayi emberara sawua juruita maramba beda jurubari kiranka”.
20 Aramaunta anyi atarraya idubuda karampe kaidu wansida.
21 Ara wandeare Jesúsba undusi Santiagota akuza yi membea Juanta, naunrara Zebedeo warrarabasi, anyara yi zezebawarauba atarrayata ara obarabasi jambade, maune Jesúsba trʉ̃si anyita.
22 Aramaunta anyi jamba amae karampe akuza yi zeze amae karampe wansida iyi kaidu.
23 Jesúsba jaradia wansi Galileade, judíora amba yi jurebariza* akuza jaradia wansi bedea bia Daizezeba zokaburude sawua bai ũrũ, adewara bebikuabasi emberara kayabeta.
24 Siriadera jomaumba uri kawuasida iyi ũrũra, maun karea emberarambara erjuempanasi kayaberanta, wawaberanta, kapuria kayaba wawaberanta akuza kayaba pira ẽã beranta, maunranta bebikuabasi Jesúsbara.
25 Maun karea Jesús kaidu wansida emberara Galileadebemaranta, Decápolis,* Jerusalén, Judea akuza Jordán kirarebemaranta.
