Mateoba budata 11:1-30
11 Jesúsba iyi kaidu 12 panura, kare oita jaradiada tea, wansi wuabemara puwurueda jaradiade.
2 Juan buru koebariba iyi cárcelde bude, uri kawuasi Jesúsba kare onumuta, maun karea zokasi iyi kaidu panuranta,
3 Jesúsʼa naunta widimarea: “¿Buka jari zeya adapeadara o awuruta zeita jũãĩbara?”.
4 Aramaunta Jesúsba anyaa jarasi: “Waidua, mombe Juanʼa jaraidua maraba undubarabuta akuza urimbarabuta:
5 Atiara yi undu ẽã bubara undubarabu, yi wambe ẽã bura jenda wambu, lepraba kayapanurãrã jenda biasida, yi uri ẽã bubara jenda urinsi, yi beidarãrã jenda piradrusi akuza pobrerambara bedea biata urinsida.
6 Sobiapanu jari mu ũrũ kare bedea neẽã ijampanurãrã”.
7 Anyi madogode Jesúsʼra emberara bedea jundrusi Juan ũrũ, mombe naunta jarasi: “¿Karenta aku wansi desiertoedara marambara? ¿Yumakera zarea neẽãbu puandruba ya edebuta cha bakuru kiranka?
8 Mawuera, ¿sawuabuta undukirambasi marambara? ¿Yumakera wua bia jumbuta? Warinubaira wua bia jumpanurãrã nokora dedabu.
9 Mawuera marara, ¿karema wansida mainura? ¿Profetata akude? Maramba maunta undusida, mamina maunra badu profeta ẽ.
10 Daizeze Bedeabara iyi ũrũ naunta jarabu: ‘Muara zoka bueyi mu ángelta bu na wamarea, iyara bu wai ota ara owañi na’.
11 Emberaranera undudaka Juan buru koebaride untabura, embera abauta Daizezeba zokabude kare ẽ kirankabuburu, maun emberara audre yi zroma Juan buru koebarira.
12 Juan buru koebari ewarideba emberarambara soiduba jurupanu Daizezeba zokabu ewaride eda baita, yi maun soiduba jurupanurambara undupanu.
13 Profetaramba akuza Moisés Leyba Juan zei ũrũ jarabarisi akuza karenta berabarita.
14 Unkuruba ijana ẽ baimina ‘Elías zeya adapeadara iyibasi’.
15 Kirankita uridua naun bedeata.
16 ”Idibema emberarara naun kirankabu: Plazade wũãwũãramba anyibawara jemebua jarapanu kiranka:
17 ‘Daiba flauta sobia zasidadera, marara bairada ẽ basi, daiba trambi beidara ũrũ zasidadera, marara jengada ẽ basi’.
18 Maun kiranka, Juanʼra ayunabu akuza vino do ẽ, mawuasidu emberaramba iyi ũrũ jarapanu: ‘Demoniota abu iyara’.
19 Mamina zesi Embera Warrata, maunra nekobu akuza vino dobu, maune emberaramba jarapanu: ‘Nekomia iyira akuza vino domia, amba jewedabu nokoita plata cobra trajapanurabawara akuza emberara nekayirua opanurabawara’, mamina emberambara krincha bia erbuta undubibu iyi sawuabudeba”.
20 Jesúsba iya milagro odamae emberaramba nekayirua obuta amaena ẽ basi baera naunta jarasi, mamabemara:
21 “Kareamba zuburiai Corazín akuza Betsaida druadebemarãrã, naunra druade milagro odata Tiro puwurude akuza Sidón puwurude osidaburu, mamabemambara wua badata junseabasi akuza itarrata jiraedada karampe maun ũrũ jewedaseabasi undubita idubusidata anya nemitia odara.
22 Warinubai Daizezeba kãwũã oi ewari zeburudera audre bia wañi Tirodebemaranta akuza Sidóndebemaranta maraira.
23 Capernaúmʼnebemara, ma joñi marara, krincharaindua marara yi zroma baita, ¿karea? Naun puwurude milagro odapeadaranta Sodoma puwurude kãwũã osidaburu idibasidu bakasi.
24 Warinubaira Daizezeba kãwũã oi ewari zeburudera audre bia wañi Sodomanebemaranta maraira”.
25 Maun ewaridera Jesúsba, naunta jarasi: “Zeze, bajã noko akuza naun drua noko, jomaura kirambita mura bu ũrũ ibia bedeakirambu, bua naunta kãwũã merasi baera yi burubiaranemba akuza yi nekare mejancha kawuaburanemba merasi, mamina buara wũãwũãra kirankabudeba mera ẽ basi maunra.
26 Kãwũã oita yibia basi baera buita Zeze”.
27 Adewara jarasi: “Mu Zezebara muara nekare joma diaburu, yi Zezeburu undukawuabu yi Warrara akuza yi Warraburu undukawuabu yi Zezera, adewara yi Warraba kangaburu iya kangabua undukawuabiseabu yi Zeze sawua chura.
28 Mara joma mejancha trajaburanta, yi mejancha krincha zroma opanuranta akuza yi mapae panuranta muma zeidua enaunaita.
29 Mu kaidubema baidua mura embera bia, mu sodera mura yi zromata krinchabu ẽ akuza mu kaidu panuburu aduʼa panañi.
30 Mu kaidubema baira zare ẽ baera”.
