Mateoba budata 23:1-39
23 Mawue Jesúsba emberara mejanchabua akuza iyi kaidupanura jarasi:
2 “Naunra Ley ũrũ jaradiabarirambara akuza naunra fariseorambara, krinchapanu anyara Moisésba jaradiabada kiranka jaradiapanuta.
3 Anya nekare omarea jaraburura joma oidua marambara, mamina anyide kiranka oraindua, anyara oẽ baera anya jarapanura.
4 Anyara jurupanu nekare zareata obidaita emberara akuza jarapanu emberara maunta odamarea, mamina maunebemara anyara mia abauta kareba oita panu ẽ.
5 Anya nekare joma onumura onumu bari emberaramba akudamarea. Adewara anyi neida berabari ẽ baita caja zake anyi datrude abura akuza anyi juwade abura audre unta owana akuza anyi wuade mimizoa abura drazoa owana.
6 Yizromara jeweda nekobarimaera anyitru jewedakira akuza judíora amba yi jurebarimaera* anyitru kirambita jewedapanu.
7 Akuza anyi plaza ode wanera kangade saludadamarea adewara rabí adamarea.
8 Mamina wuabemara jarabiraindua marara rabí, abapaibu baera mara Nokora* akuza manyiraira marara yi membera.
9 Akuza naun druade mia abauta zeze araindua, abapaibu baera mara Zezera, bajãne buta.
10 Akuza mia abaua jarabiraindua marara líderta, mara Líderʼra abapaibu baera, Cristota.
11 Awuaraburu manyirai audre yi zromabara obaibara wuabemaramba jaraburuta.
12 Embera abauta wuabemarai yi zromata krinchabuburu, maunra Daizezeba kare ẽ kiranka akuyi, mamina yi kare ẽ kirankabura, Daizezeba yi zroma babiyi.
13 ”Kareamba zuburiai mara Ley ũrũ jaradiabarirãrã akuza fariseorãrã, sewata embera bia kiranka panu marara. Marambara eda wambi ẽ baera emberarãrã Daizezeba zokabudera, mia marasida eda wa ẽ akuza yi eda wakirapanurasida eda wambida ẽ.
14 --
15 ”Kareamba zuburiai mara Ley ũrũ jaradiabarirãrã akuza fariseorãrã, sewata embera bia kirankapanu marara. Naun drua purraibara akuza pusasida kirabaribara embera abau karea, mombe iyi maranebema baburudera audre nekayiruata obu maraira, maun karea maranta Gehenaena* waimbaraburu iyisida waimbara Gehenaena.
16 ”Kareamba zuburiai marara dauberrea panu kiranka panu baera, maramba jarapanu: ‘Embera abauba nekare oya ara templobari maunra kare ẽ mamina embera abauba oro templodenumubari nekare oya ara oibara maumbara warinu’.
17 Kawua ẽã duanu kiranka panu marara akuza dauberrea panu kiranka, warinubaira, ¿karenta audre yibia? ¿Bari orota o yi temploba oro wuaga erbuta Daizezeita?
18 Adewara maramba jarapanu: ‘Embera abauba altarbari* nekare oya ara kare ẽ maunra mamina embera abauba ofrenda altardebu karea nekare oya ara warinu oibara maunra’.
19 Dauberreabu kiranka panu marara warinubaira, ¿karenta audre yibia? ¿Ofrendata o altarde ofrenda wuaga erbuta Daizezeita?
20 Maun karea embera abauba altar karea oya asiburu bari altar kareaburu oya abu ẽ awuaraburu nekare maun ũrũ jomabu kareabida oya abu.
21 Embera abauba templo karea oya asiburu bari templo karea oya abu ẽ awuaraburu Daizeze kareabida oya abu, maunra iyi de baera.
22 Embera abauba bajã karea oya asiburu bari maun karea oya abu ẽ, awuaraburu Daizeze jewedabari karea oya abu akuza maun ũrũ jewedabu kareabida.
23 ”Kareamba zuburiai mara Ley ũrũ jaradiabarirãrã akuza fariseorãrã, sewata embera bia kirankapanu marara, marambara diezmonera diapanu menta kiduata, eneldo kiduata akuza cominota, mamina Leyba wuabemara bia edamarea jarabura, wuabemara so zuburia akumarea jarabura akuza Daizezeare kerempa bamarea jarabura oda ẽ marambara. Maunta kirandua ẽ baibara marambara diezmo diai nesidamina.
24 Marara dauberreabu kiranka panu, marambara vasode suna baedara sanbu mamina camellota mibu kiranka panu.
25 ”Kareamba zuburiai mara Ley ũrũ jaradiabarirãrã akuza fariseorãrã, sewata embera bia kiranka panu marara, marambara copara akuza platora ũrũburu sugupanu mamina mara sodera nezrugaitru krinchabu akuza mara sobiabibutru obu.
26 Fariseo, bura dauberreabu kirankabu, naarara copata akuza platota eda sugura mawua ora, jaigua ẽã beyi yi ũrũbemasida.
27 ”Kareamba zuburiai mara Ley ũrũ jaradiabarirãrã akuza fariseorãrã, sewata embera bia kiranka panu marara, marara bewara de atia pintada kirankabu* naunra ãĩra biʼiakiru mamina edara bewara buwuru awasi akuza jaigua awasi.
28 Maun kiranka, emberara naara embera bia kiranka panu marara mamina manyi sodera sewaneburutru bu akuza nekayiruatru bu.
29 ”Kareamba zuburiai mara Ley ũrũ jaradiabarirãrã akuza fariseorãrã, sewata embera bia kiranka panu marara, marambara profetaraita bewara deta opanu akuza bewarade biʼiakiruta parãpanu embera biarainta.
30 Akuza jarapanu: ‘Daita basiburu dai zorara ewaride, karebada ẽ bakasi profetara beadamareara’.
31 Manyi mawua budeba undubibu marara, profetara beada wũãwũãranta.
32 Maun karea manyi naabemaramba ojundrudata joma aribaeidua.
33 ”Damanemba zedara marara, Gehenane* kãwũã obudadera, ¿sawua endrui marara?
34 Maun karea, maunra zokabueyi profetaranta, embera buru biaranta akuza nejaradiabariranta, maunranebema unkurura beadayi, unkuruta bakurude untu jirabudayi, unkuruta judíora amba yi jurebari mae* ubeadayi akuza unkuruta puwurura za pewanañi.
35 Naun druade embera biara beida wara maramba pagayi, Abeldeba Zacarías Baraquías warraidubayeda, iyira maramba beasida templo kirambita akuza altar kawa.
36 Mua mara jarayi idibema emberaramba joma pagaita naun kãwũã berabaridara.
37 ”Emberara Jerusaléne panura, marambara profetarãrã beapanu akuza emberara mama zokapanurãrã mongaramba beapanu, maunra amba zebikirambasi mara wũãwũãrãrã, eterre wueramba iyi eterre zakera amba jurebari kiranka iyi i edre. Mamina marambara kangada ẽ basi maunra.
38 Mamina Daizezebara naun templora doba amaeñi.
39 Mura naunemba unta marambara wua unduda ẽ bai baera, naun bedea jaradayeda: ‘Jeowa, bu trʉ̃nemba zebura buara bia akubu’”.
Bed’ea biobʉbari
^ Lit. “sinagogas”. Amba yi jurepanasi Daizezea yiwidita akuza Daizeze ũrũ kawuaita.
^ Lit. “Jaradiabari”.
^ Nawedara Gehenane eibalbuepanasi basurara, mamina Jesúsba maun yizata zokasi jara urimbita embera jipa beita.
^ Jarakirambu sacrificio obadata.
^ O “calba pintadada kirankabu”.
^ Nawedara Gehenane eibalbuepanasi basurara, mamina Jesúsba maun yizata zokasi jara urimbita embera jipa beita.
^ Lit. “sinagogas”. Amba yi jurepanasi Daizezea yiwidita akuza Daizeze ũrũ kawuaita.
