Mateoba budata 1:1-25
1 Naun librora Jesús ũrũ nemburabu iyira zesi Davideba akuza iyira zesi Abrahánemba.
2 Abrahánʼra Isaac zezebasi;Isaacʼra Jacob zezebasi;Jacobʼra Judá zezebasi akuza Judá membera zezebasi;
3 Judára Pérez zezebasi akuza Zérah zezebasi, anyi papara Tamarbasi;Pérezʼra Hezrón zezebasi;Hezrónʼra Ram zezebasi;
4 Ramʼra Aminadab zezebasi;Aminadabʼra Nahsón zezebasi;Nahsónʼra Salmón zezebasi;
5 Salmónʼra Boaz zezebasi, yi papara Rahabasi;Boazʼra Obed zezebasi, yi papara Rutbasi;Obedʼra Jesé zezebasi;
6 Jeséra noko David zezebasi;
Davidʼra Salomón zezebasi, yi papara Urías kimabasi;
7 Salomónʼra Rehoboam zezebasi;Rehoboamʼra Abías zezebasi;Abíasʼra Asá zezebasi;
8 Asára Jehosafat zezebasi;Jehosafatʼra Jehoram zezebasi;Jehoramʼra Uzías zezebasi;
9 Uzíasʼra Jotán zezebasi;Jotánʼra Acaz zezebasi;Acazʼra Ezequías zezebasi;
10 Ezequíasʼra Manasés zezebasi;Manasésʼra Amón zezebasi;Amónʼra Josías zezebasi;
11 Josíasʼra Jeconías zezebasi akuza Jeconías membera zezebasi, maunrãrã tosida judíora Babiloniaena jida ededai na.
12 Judíora Babiloniaena jida edekuada teara, Jeconíasʼra Sealtiel zezebasi;Sealtielʼra Zorobabel zezebasi;
13 Zorobabelʼra Abiud zezebasi;Abiudʼra Eliaquim zezebasi;Eliaquimʼra Azor zezebasi;
14 Azorʼra Sadoc zezebasi;Sadocʼra Aquim zezebasi;Aquimʼra Eliud zezebasi;
15 Eliudʼra Eleazar zezebasi;Eleazarʼra Mattán zezebasi;Mattánʼra Jacob zezebasi;
16 Jacobʼra José zezebasi, Joséra María kimabasi, Maríaba tosi Jesúsʼra, Cristo apanuta.
17 Abrahán memberanemba David memberainu bayedara jomaune 14 membera burura berabarisi, adewara Davideba 14 membera burura berabarisi judíora Babiloniaena jida edesidade akuza judíora Babiloniaena jida edekuadadeba Cristoidu bayedara 14 membera burura berabarisi.
18 María biogoi naara naunta berabarisi. Maríara juwa jidaita basi Joséume, mamina anyi juwa jidai naa Maríara Daizeze jaure zareadeba biogo besi.
19 José, María kima baira* embera biabasi, iyara Maríara emberara daidu dauperamabasi, maun karea krinchasi miomba kawua ẽãne idubuita.
20 Mamina iya maun joma krinchada tea Jeowa ángelba kaimokarade iyaa jarasi: “José, David warra, perarãrã bu kima María edeita bu deda, wũãwũã iya abura jaure zareadeba abu baera.
21 Wũãwũã zake iya abura yumakera, Jesús trʉ̃gaibara bua iyira, iya endrubi baera Daizeze puwurura nekayiruadeba”.
22 Naunra joma kãwũã berabarisi aripe berabarimarea, Jeowaba iyi profetadeba jarabaridata:
23 “Embera wera yizakekirura biogo karampe yumakera zaketa toyi, maun trʉ̃ra Emmanuelbayi”, iyi trʉ̃bara jarakirambu “Daizezera dayirabawarabu”.
24 Maunta, Josébara uruma karampe osi Jeowa ángelba jaradata maun karea iyi kimara iyi deda edesi.
25 Mamina iyara erkãĩ ẽ basi wũãwũã toyeda, mombe maun wũãwũãra iya trʉ̃gasi Jesús.
Bed’ea biobʉbari
^ Maun ewaridera judíorabara emberara yi bedea panura kima kiranka akupanasi.
