Mateoba budata 10:1-42
10 Jesúsba iyi kaidubemara 12 panuranta amba juredasi mombe anyaa diasi zareata demoniora apanuta ãĩ buedamarea akuza kaya panuranta bebikuamarea.
2 Naunrabasi 12 apóstolerãrã: Simón iyabauta Pedro apanuta akuza Andrés yi membeata; Santiago Zebedeo warrata akuza yi membea Juanta;
3 Felipeta akuza Bartolométa; Tomásta akuza Mateota, iyira nokoita trajabasi; adewara Santiago Alfeo warrata akuza Tadeota;
4 Simón zokeabuta akuza Judas Iscarioteta, (naumbara tea sewasi Jesústa).
5 Jesúsba iyi kaidu 12 panuranta zokasi, mombe anyaa jarasi: “Awuru druaeda waraindua, mia Samaria puwuruedabida waraindua.
6 Awuaraburu Israel puwurude ovejara kiranka adua panuranta pae ẽã juruidua.
7 Naunta jaraka waindua ‘Daizezeba zokai ewarira arakaitaba’.
8 Kayaberãrã bebikuaidua, beidarãrã jenda piradrubidua, lepraba kayaberãrã bebikuaidua, ãĩ jurekuaidua demoniorãrã. Maraa nekare bari diasidaburu wuabemarabida bari diaidua.
9 Manyi kurru jumbaridera ederaindua platata, orota mia cobreta.
10 Adewara ederaindua bolso nekare wuagabarira mia wua ume ederaindua, mia jirune jumbarita, mia bakuruta, yi mejancha trajabuara yikora diadai baera.
11 ”Mara puwurueda wamburude juruidua yi Daizeze Bedea urikirambuta, mombe maun deda baidua mara wañiena.
12 Embera deda wamburudera saludaidua yi dedapanura.
13 Maranta dei wambidara yi dedabemaraintara yibiabayi, mamina dei wambida ẽ buru yibia ẽ bayi anyitara.
14 De abaude mawua ẽ buru puwuru abaude maranta deibaribida ẽ buru mia urina ẽ buru mara bedeata, jiru nĩãwe karampe waindua mamaumbara.
15 Warinubaira Daizezeba kãwũã oi ewari zeburudera audre bia wañi Sodomanebemaranta akuza Gomorradebemaranta maun puwuruira.
16 ”Marara dausarea panaibara dama kiranka, mamina maun awuara kare kayirua neẽã panaibara palomara kiranka. Mua marara ovejara kiranka zokabuei baera usapara enzadra.
17 Jurakawua panaidua marara, marara juez na ededai baera akuza judíora amba yi jurebarimae* ubeadai baera.
18 Marara mu karea gobernadorera na akuza nokora na ededayi, maunemba Daizeze ũrũ jaradiaseabayi marambara anyaa akuza emberara naun druadebemara.
19 Mamina maranta juez na edebudadera krincha oraindua kare jarai karea mawua ẽ buru sawua jarai kareara, mara bedeaibaradeburu kawua jaradai baera karenta jaraita.
20 Maunera marantru bedea ẽ bai baera mara Zeze jaure zareatru bedeayi marambari.
21 Adewara yi membeabara ariwia beabiyi yi membeara, yi zezebida yi warrata, adewara yi wũãwũãrambara yibarirãrã juradai baera beabidayi.
22 Emberarambara marara juradayi mu karea, mamina maun jõma joñiena awuantaburura endruyi.
23 Mara pewabudadera miru waindua awuru puwurueda, Embera Warra zeyedara marambara ma purrada ẽ bai baera Israel puwurura.
24 ”Estudiantera yi profesor audrebu ẽ, mia nezokara iyi zokabari audrebu ẽ.
25 Estudiantera bari yi profesor kiranka buba sobia baibara akuza yi nezokara bari iyi zokabu kiranka buba sobia baibara. De yibarita Satanás* trʉ̃gasidaburu sawua mawua jarada ẽ bai iyi deda panurãrã.
26 Mawuara marara karea peradaira neẽ, warinubaira nekarenta meranumuburu maunra badu ewaride untu zeseabu akuza nekarenta jara ẽã buburu maunsida badu ewaride kawuaseapanu.
27 Mua maraa paringuade jaraburura unane jaraidua marambara akuza mua mara kuwurude jaraburura jomaua jarakaidua.
28 Peraraindua mara beaseabu karea anyara mara ewari jomaune baira jãrĩ ẽ bai baera awuaraburu peraindua mara jipa beaseabu karea Gehenane.
29 Ibana zake gorrionʼra ume nendobudadera moneda abau bari nendopanu, ¿maramambi? Mamina naunra ibana zakerãrã mia abauta uda zeburudera Daizezeba kawua ẽãra ze ẽ.
30 Akuza iyira mara burude buda abusida yi juachama.
31 Maun karea marara peraraindua warinubaira naunra ibana zake gorrionʼira marara mejancha valepanu.
32 ”Embera abauta jomaura kirambita muarebuburu, mu Zeze kirambita musida iyiare bayi.
33 Mamina embera abauta jomaura kirambita muarebu ẽ buru, musida mu Zeze kirambitara iyiare ba ẽ bayi.
34 Krincharaindua mura emberaranta aduʼa babieda zesita, maunita ze ẽ basi mura, awuaraburu anyi yõbieda zesi mura.
35 Mura zesi baera manyirai yi jurabita. Yi warrara yi zezeume kĩrũñi, yi kaura yi papaume kĩrũñi, yi ãĩgura yi pakoreume kĩrũñi.
36 Mawua, mara nejurara mayi dedabemabayi.
37 Embera abauba yi zezeta mawua ẽ buru yi papata muira audre kangabuburu, maun emberara mu kaidubema baide bu ẽã, yi wũãwũãta mawua ẽ buru yi kauta mu audre kangabuburu maunsida mu kaidubema baidebu ẽã.
38 Embera abauta mu karea zuburia baitabu ẽ buru akuza mu kaidubu ẽ buru maunra mu kaidubema baidebu ẽã.
39 Embera abauba nekare obuburu bei ẽ baita maun emberara beiyi, mamina yi mu karea iyi bebu diabura maunra bei ẽ bayi.
40 ”Embera abauba maranta bia edara, maumbara muta bia edaburu kirankabu akuza yi mu bia edaburura yi mu zokadata bia edaburu kirankabu.
41 Embera abauba profetata bia edara, maun emberara profetara nembia diabadata diadayi akuza embera abauba yi kerempabuta bia edara yi kerempabua nembia diabadata diadayi.
42 Mamina mua mara jaraya: Embera abauba mu kaidubemara wika panumina bania kuranzata juediara maunra nembia undu ẽãra ba ẽ bayi”.
