Mateoba budata 18:1-35
18 Maune Jesús kaidupanuranta iyi kawa zeda karampe widisida: “Daizezeba zokabude eda bairanera, ¿kaita audre yizroma?”.
2 Aramaunta Jesúsba wũãwũã zaketa aba trʉ̃eda karampe, anyi enzadra kusi.
3 Mombe jarasi: “Maramba kãwũã krinchabuta awuara krinchada ẽ buru akuza wũãwũãra kiranka panu ẽ buru, kawuapanaidua eda pana ẽ baita Daizezeba zokaburudera.
4 Maumba maranebemamba naun wũãwũãne kiranka audre bu ẽãta undubibuburu Daizezeba zokaburudera mauntru yizroma bayi.
5 Adewara embera naun wũãwũã zake kirankabuta mu bari wara akuza maunta bia edadara, munta bia edaburu kirankabu maumbara.
6 Embera naun wũãwũã kirankabuba iya ijambuta iduaribira embera abauba aña obu karea, maun embera nekayirua obuitara audre bigabayi mongara zromata iyi ochidauma tajuna karampe pusa enzadra doi balbuedamarea.
7 ”Emberara awurua kayirua obikirambura bia wa ẽ bayi, warinubaira bu kaiba awurura kayiruade baebikirambura, mamina yi maun obibura bia wa ẽ bayi.
8 Maun karea bu juwaba mawua ẽ buru bu jirumba, buaa nekayiruata obikirambuburu tuta karampe jingara balbuera, audre yibiabayi juwa mosoa akuza jiru mosoa zokai endruita, juwa joma akuza jiru joma erbude tubude jipa bawaibadabara.
9 Adewara bu dabuba nekayiruata obikirambuburu enda karampe jingara balbuera, audre bigabayi bei ẽã endruita junzaba dabu neẽã bumina, dabu ume erbude Gehena* pure pure barimae bawaibadabara.
10 Jurakawua panaidua naunra eberara wũãwũãra kiranka panuta bia edada ẽ baita, anyi akupanura ángelera ewari jomaune mu Zeze untubema kawapanu baera.
11 --
12 ”Embera abauba oveja 100 erbudebemanta aba aduara, ¿karenta oi iyara? ¿Yi 99 buta amae karampe juru wai ẽka yi aduadata?
13 Iya maun ovejata undura, audre sobiayi yi 99 ovejara adua ẽ badaira.
14 Abarika mu Zeze untubemabida kanga ẽ naunra emberara wũãwũãra kiranka panuramba iyi ota idubudamareara.
15 ”Membea abauba iya odadeba buta zuburiabisiburu, umepeide bedeara iyiume akuza iyaa kawuabira karenta aña osita, iya bu bedeata urira marara jenda aduʼa panañi.
16 Mamina iya bu bedeata uri ẽ buru, tea bu kaidu edera emberanta aba mawua ẽ buru ume, mawua iyibawara bedeadaita akuza embera umemba mawua ẽ buru umbeauba kawuadamarea maramba karenta jaradata.
17 Mamina iya maunra bedeata ũrĩ ẽ buru, congregaciónʼa* jarara, mamina iya congregación bedeasida uri ẽ buru, maun emberara Daizeze ode bu ẽ kiranka* akura akuza nokorainta plata cobra trajabu kiranka akura.
18 ”Daizezeba iduaribiburudera marambida iduaribibara, Daizezeba iduaribi ẽ buru, marambida iduaribida ẽ baibara.
19 Akuza maranebema umenta bedea abarika zedara Daizezea yiwidita nekare zromabari, kawua panaidua maunra warinu diaita mu Zeze untubemambara.
20 Embera ume mawua ẽ buru umbea mu bari amba yi jureburudera, mura anyibawara bayi”.
21 Pedroba Jesús orra karampe widisi: “Jesús, mu membeaba munta zuburiabira, ¿sombebayeda perdonaibara mua maunra? ¿7 vecebayeda?”.
22 Jesúsba panusi: “Mua jara ẽ 7 vece bayeda perdonaibarata, awuaraburu 77 vecebayeda.
23 ”Daizezeba zokabura naun kirankabu: Noko abauba krinchasi widita iyi nezokaramba debebuta pagamarea.
24 Iya cobra jundruside iyidu wesida nezoka denariode* 60 millón debebuta.
25 Iyi nezokaba maun sawua pagai neẽ basi baera, nokoba jarasi nendobuedamarea yi kimaume akuza yi wũãwũãranta adewara iya nekare joma erbadata mawua pagamarea iyaa debebadata.
26 Mamina maun nezokara iyi noko na sankokode kubepe zuburia widisi: ‘Jũãrane noko, joma pagayade mua’.
27 Maun nokora soborekeasi maun karea mombe idu wambisi maun nezokara akuza iyaa debe badara wua widi ẽ basi.
28 Maun nezoka mamaumba wanside undusi awuru nezokata iyiume trajabuta, maunra iyaa debebasi 100 denario mamina iya maunra ochidauma jida karampe jarasi: ‘Joma pagara bua mua debebura’.
29 Iyiume trajabura sankokode kubatoto karampe jarasi: ‘Jũãrane pagayade mua’.
30 Mamina iya uri ẽ basi naun embera bedeara awuaraburu cárcelda edebisi iyaa debebuta ma pagayeda.
31 Wuabemara nezokaramba maun bedea uri kawuaside kĩrũsida mombe jara wansida anyi nokoa.
32 Mawuara anyi nokoba wemarea jarasi maun emberara mombe iyaa jarasi: ‘Kare embera kayirua bura, bu mua zuburia bedeasidera mua jarasi wua widi ẽ baita bu mua debebura.
33 ¿So zuburia akui barasi ẽka bua iyira, mua bu so zuburia akuda kiranka?’.
34 Iyi nokora maun karea mejancha kĩrũsi baera jarasi cárcelde eibalbuedamarea joma pagayeda iyaa debebuta.
35 Maun nokode kiranka edayi mu Zeze untubemabida marara, maramba soiduba perdona ẽ buru mara memberamba obuta”.
Bed’ea biobʉbari
^ Nawedara Gehenane eibalbuepanasi basurara, mamina Jesúsba maun yizata zokasi jara urimbita embera jipa beita.
^ Naumba jarakirambu yumakerara congregación akubarirata, naun textoume akura Deuteronomio 19:16, 17.
^ Lit. “embera naun druadebema kiranka”.
^ Lit. “naunra 10 mil talento”. Akura Mateo 20:2ba nota abuta.
