Mateoba budata 24:1-51
-
CRISTO ZEI EWARIDE KARE UNDUDAITA (1-51)
24 Jesús templodeba ãĩ wanta taide, iyi kaidupanuramba temploma juwa susida iya akumarea.
2 Mawue Jesúsba anyaa jarasi: “Kaun templo maramba akukupanura joma ãrĩ wañi, joma teguezoa wañi nekare namanumura”.
3 Iyi Olivo katumane jewedabude, iyi kaidupanuramba anya awauba orra karampe widisida: “Daia jarada, ¿sombede berabari bua jaradara? akuza ¿karenta undudai bu zeburudera? adewara ¿karenta berabari naun druade nekare berabarinumu joma jomburudera?”.
4 Jesúsba anyaa jarasi: “Jurakawua panaidua yãrã yi sewabi ẽ baita,
5 emberara mejanchauta zeyi mu trʉ̃ zokapanuta, anya jarayi: ‘Cristo mura’, mombe embera mejanchauta sewakuadayi.
6 Maramba uriñi drua awuara awuaraka yõbarabuta. Mamina jurakawua panaidua akuza peraraindua, za mua jaratabera warinu berabariyi mamina nekare berarinumu joma joira wabida araba ẽ.
7 ”Emberara anyirai yõbarabayi, nokorasi anyirai yõbarabayi, bayi jarrabata akuza drua ureta badumae.
8 Naunra bedea zromara bari mamapai ẽ bayi awuaraburu audre zeyi zuburiara.
9 ”Mu odepanu karea pewanañi marara akuza beadayi adewara embera mejanchauba juradayi.
10 Embera mejanchauba idubudayi Daizeze ũrũ ijambadara akuza anyirai yi sewadayi adewara yi juradayi.
11 Mejanchauta zeyi profeta kiranka mombe emberara mejanchauta sewakuayi.
12 Embera kayiruarãrã audre eaba wañi, maumba yi kanga ẽã wanañi.
13 Mamina yi maun joma joñiena awuantaburura endruyi.
14 Akuza bedea bia Daizezeba zokai ũrũ jaradiadayi naun drua jomaune emberaramba urinamarea, maun tea joma joñi nekare berabarinumura.
15 ”Kombeburu maramba unduyi Daizezeba drua jidadamae piradru edaunumuta nekare daya igara chuta akuza nemarikua chuta, maunra profeta Danielba jarabarisi (yi naun leburubara biʼia krinchaibara karenta jarakirakuta).
16 Maun berabarinumu undubudade, yi Judeade panurãrã waidua katumaena.
17 Embera abauta untrebuburu,* uda zerara nekare edeita dedauba,
18 embera abauta meabuburu, biga bayi iyi wua jurepeda wa ẽ baita deda.
19 Kareamba zuburiai maun ewadera biogo panurãrã akuza wũãwũã judebema erpanurãrã.
20 Badua yiwididua, mara miru wãi ewaride, kue ewaride wana ẽ baita mia sábado* ewaride.
21 Embera budeba unta zuburiara unduzeburu mamina zeyi ewari emberara audre zuburiaita, maunra undudaka mombe wua berabari ẽ bayi.
22 Mia abau emberanta endru ẽ bayi Daizezeba maun ewarita mesera jobi ẽ buru, mamina Daizezebara maun ewarira mesera jobiyi iya jidakuada karea.
23 ”Mawue emberaramba maraa jaradara: ‘Zachu Cristora’ mawua ẽ buru jaradara: ‘Jariduchu Cristora’, ijaraindua maunra.
24 Zei baera emberara Cristo apanuta akuza profetara apanuta, maunrambara milagrora mejancha oyi akuza nekare zromata emberara sewakuaita akuza sewakiranañi Daizezeba jidakuadarasida.
25 Kãwũã weda jaraku mua mara.
26 Maun karea, maraa jaradara: ‘Desiertoidu chua’, waraindua mamara. Mawua ẽ buru jaradara: ‘Deda miruchua’, maunebida ijaraindua.
27 Embera Warrara zeyi ba purewabari kiranka.
28 Nekare bei tabumaera aguilarãrã josoa barabayi.
29 ”Maun ewaride, emberara mejancha zuburianumana tea, aramaunta bisiara paringua totoyi, jedekora una ẽ bayi, chindaurãrã jurzuayi bajãnemba, nekare joma untunumura ure urenumubariyi.
30 Bajãne nekarenta undudayi undubibuta Embera Warrara zeita, mombe emberara naun druadebemara mejancha zuburia sentidayi. Jãrãra ũrũ undudayi Embera Warrara mejancha zareabara uruta akuza Noko kiranka.
31 Trompeta jingua zaburude, iyara iyi ángelerãrã zokakuayi iya jurukuadara naun drua jomaunebuta amba juredaita.
32 ”Naun yizata jarayi mua, naunemba kawuadamarea. Higuera bakuru pononumunera akuza yi kidua pawaranumunera, marambara kawuapanu poagara arakaitabata.
33 Abarika marambida maun joma berabarinumuta undui, kawuapanaidua Embera Warrara kaita basita.
34 Mua joma za jaraku bedeara aripe berabariyi idibema emberara bei ẽ weda.
35 Mu bedeara ewari jomaune bayi, bajãta druaume neẽã waimina.
36 ”Maun ewari sombede zeira mia ángeleramba mia mu yi Warraba kawua ẽ awuaraburu mu Zezeburu kawuabu.
37 Noé ewaride berabarinumana kiranka, abarika berabariyi Embera Warra zeburudera.
38 Maun ewaride kue zroma zei naweda emberara nekopanasi, nekare dopanasi, yumakerara mia kãĩpanasi, waya wuerarãrã yibariramba kima diapanasi, maune Noéra jambade eda barisi;
39 anya urina ẽ basi baera kue zroma zeside joma makinisi. Maun kiranka bayi Embera Warra zeburude.
40 Yumakeraranta ume oide bayi, maunebemara abara ededayi, waya ababemara amaenañi.
41 Wuerara ume molinone nemba barabayi, maune abara ededayi, ababemara amaenañi.
42 Maun karea urumapanaidua, marambara kawua ẽ baera mara Nokora sombede zeita.
43 ”Bari jaraita, de yibariba kawuachuburu nezrugamiara kare umandaude zeita diamasi, mawuara iyira uruma chuayi maun nezrugamia iyi deda jue ẽ bamarea nezrugaita.
44 Maun karea marasida jurakawua panaidua. Maramba kawua ẽ baera kare umandaude zeita Embera Warrara.
45 ”¿Kaipe nezoka kerempabura akuza bia krinchabura? ¿Kaipe maun nezoka, nokoba jurudara, wuabema nezokara nekobimarea nekobari umandaude?
46 Maun nezokara sobia bayi iyi nokoba jaradata obuta undu zera.
47 Iya nekare bia joma erbura iyi nezoka juwa edre bueyi joma akumarea.
48 ”Mamina ewari aba maun nezokaba so kayirua krinchara: ‘Nokora atia ze ẽ numina’.
49 Akuza iyiume ambaburata pokuabuburu adewara bari nekobuburu akuza itua dobuburu itua domiarabawara,
50 mawuanumune iyi nokora zeyi iya kawua ẽ ewaride akuza iya kawua ẽ umandaude,
51 maun karea jipa zuburiabiyi iyira akuza amba bueyi jari emberara wuabemara sewabubawara adewara mama jengayi akuza kare oi kawua ẽ taibayi kĩrũbiba.
