Mateoba budata 5:1-48
-
BEDEA BIA KATUMANE JARADATA (1-48)
-
Jesúsba jaradia jundrubu (1, 2)
-
Kairanta sobiapanu (3-12)
-
Tãta akuza unata (13-16)
-
Jesúsʼra zesi Leyba jarabuta oita (17-20)
-
Jaradiabu bedea ara oi ũrũ (21-26), ãĩbai ũrũ (27-30), yi idubui ũrũ (31, 32), awuru naa nekare oi jarabu ũrũ (33-37), daucha kayirua oi ũrũ (38-42), nejurara kanga undubi ũrũ (43-48)
-
5 Jesúsba emberara kabananumunta undui, katuma wãzeidu wansi mombe mama jewedasi. Tea iyi kaidu panurasida kaidu wansida.
2 Mombe naunta jaradia jundrusi:
3 “Embera abauba kawuabuburu Daizeze kareba nesidabuta, maun emberara sobiabu, iyira Daizezeba zokaburude eda bai baera.
4 ”Sobia ẽã panurãrã sobiapanañi jenda, anyaa so zarea diadai baera”.
5 ”Yi ibiadebura sobiabu, mawuaburantru naun druade bai baera.
6 ”Embera abauba soiduba Daizezeba kangabuta okirambuburu sobiabu, Daizezeba diai baera iya kangabura.
7 ”Yi wuabemara so zuburia akubura sobiabu, mawuaburãrã bia edadai baera.
8 ”Yi kerempa panurãrã sobiapanu, anya Daizezeta undukawuadai baera.
9 ”Yi wuabemarambawara aduʼa baita jurupanura sobiapanu, anyira Daizeze warrara adai baera.
10 ”Daizezedeta opanu karea pewapanura sobiapanu, anyira Daizezeba zokaburude eda panai baera.
11 ”Yi mu karea i jura jarabudara, mu karea pewabudara, mu karea sewaneburuta jarabudara sobiabayi.
12 Sobia panaidua Daizezeba nembiata erbu baera maraita adewara profetara mara na badarasida kãwũã pewabarisida.
13 ”Marara tã kiranka panu. Tãta kuya ẽ buru zeri ẽ, maumba balbueibara emberara berabaribadare.
14 ”Marara una kirankapanu. Puwuruta katuma ũrũ buburu maunra jomaumba undupanu.
15 Emberamba lámpara koaburudera anaita koa ẽ, awuaraburu iya koabu iyi de unabita.
16 Abarika unaidua marasida, wuabemaramba akudamarea maramba kare nebiata opanuta, mawua mara Zeze untubema ũrũ ibia bedeadamarea.
17 ”Mura ze ẽ basi Moisés Leyba jarabuta awuara oita, mia profetaramba jarabuta awuara oita. Awuaraburu zesi mura nama jarabu oita.
18 Leyba jarabuta awuara oi naara, neẽã totoibara naara bajãta akuza egorota. Maumba nama Leyba jarabura joma aribaeyi.
19 Embera abauba Daizezeba jarabuta yi wika kiruidu oẽ buru akuza wuabemara iyide kiranka omarea jarabuburu, maunra Daizezeba zokaburudera eda ba ẽ bayi. Mamina yi Daizezeba zokabuta obura akuza maunta wuabemara iyide kiranka omarea jarabuburu, maunra Daizezeba zokaburudera eda bayi.
20 Maramba Ley ũrũ jaradiapanura audre akuza fariseora audre ijabuta undubida ẽ buru Daizezeba zokaburudera eda pana ẽ bayi.
21 ”Na badara naunta jarasida: ‘Mia bearãrã, yi mia beaburura juez kirambita ededayi, maumba kawua omarea’.
22 Mua mara jaraya maranta mara membeaume yiya kĩrũbuburu, maunra juezʼra na ededaibara akuza yi membea ũrũ imitia bedeabuburu, maunra juezʼra audre yizroma panura na ededaibara. Adewara yi membea naun bedeata jarabuburu: ‘Zeri ẽ bura’, maun emberara Gehena* pure pure barimae eibalbueseapanu.
23 ”Maun karea bua edera ofrendata altarʼeda,* mama kirambera bu membeaume buta bedea ara oibarata,
24 bua ofrenda diaibadara amae karampe, na bedea ara ode wara bu membeaume, mombe jenda zekarampe diara bua ofrenda diaibadata.
25 ”Bu nejuramba buta juez na edera, zarea ora ode wane iyiume bedea ara odaita. Maunta oẽ buru bura juezba cárcelde eda bueseabu.
26 Mamina kawuabara, buta mama eda wara mamaumbara bura endru ẽ baita joma pagayeda.
27 ”Maramba kirambebu baibara Daizeze Bedeaba naunta jarabuta: ‘Ãĩbarara’.
28 Mamina maunra bari mama pai chu ẽ. Embera abauba yuwueranta mejancha akububuru, mombe maun embera wueranta erkãĩta krinchabuburu, maun yumakerara ãĩbasi iyi sodera.
29 Maun karea bu dabuba nekayiruata obikirambuburu ãĩ bue karampe jinga balbuera, audre bigabayi dabu aba neẽã baita bu kakua joma Gehenaena edeibadabara.
30 Abarikabu juwaraba buaa nekayiruata obikirambuburu tuta karampe jinga balbuera, mawua juwa aba baita yibiabayi bu kakua joma Gehenaena edeibadabara.
31 ”Adewara jarabu: ‘Yumakeramba yi kimata idubura, diaibara karta yi idubusi abarita’.
32 Mamina mua maraa jaraya: Yumakeramba yi kimata Daizezeba kanga ẽãne mia erkãĩ ẽ* buta idubura, ãĩbabiseabu yi kimara akuza yi maun yuwueraume mia kãĩburura ãĩ badogo.
33 ”Adewara mara na badara jarabarisida: ‘Nekare oya adata oẽã numerara. Jeowaita nekare oya adara ora warinu’.
34 Mamina mua maraa jarayi: Maunta oraindua, mia bajã karea oya araindua mama jewedachu baera Daizezeta Noko kiranka.
35 Mia naun drua bari oya araindua, Daizezeba iyi jirura mama buebu baera, mia oya araindua Jerusalénbari, maunra Daizeze puwuru baera;
36 mia oya arara bu buru karea, buara bu budara mia ababida torroa totobi ẽ baera, mia paima totobi ẽ baera.
37 Awuaraburu maramba ‘oya asiburu’ oidua warinu, mamina ‘oẽã asiburu’ oraindua, naun awuara jarara maunra yi kayiruadeba zebu.
38 ”Akuza kirambepanu Daizeze Bedeaba jarabarisita: ‘Embera abauba mara dabuta pora, iyi dabusida abarika poidua. Embera abauba mara kidata aba entara abarika iyi kidasida entaibara’.
39 Mamina mua mara jarayi: Embera kayiruaume bedeade yõraidua awuaraburu iya mara kirama tachira, iduaribidua yi ababema kirasida tachimarea.
40 Adewara embera abauba buta tribunalʼeda edera, bua camisa jumbuta erkedai karea, idu diara bua wua ũrũ jumbusida.
41 Embera abauba buta ajuerzade zokara iya omarea jaradatru orara, awuaraburu iya widida audre ora.
42 Embera abauba nekarenta widira diara akuza presta widibuburu prestara.
43 ”Adewara jarasida: ‘Kangara wuabemara akuza jurara bu nejurarãrã’.
44 Mamina mua mara jaraya, kangaidua mara nejurarãrã akuza mara pewapanu karea yiwididua.
45 Mawua undubidayi marara Daizeze untubema wũãwũãranta. Iyara bisiara unabibu baera embera bia ũrũ akuza embera kayirua ũrũ, adewara kueta zebibu embera bia ũrũ akuza embera kayirua ũrũ.
46 ¿Kare nembiata undui marambara mara kangapanutru kangabuburu? ¿Mawua opanu ẽka emberara nokoita plata cobra trajapanurambida?
47 Maramba bari bia edapanuburu mara memberanta mawuara kare nebiata opana ẽ bayi, embera Daizeze odebu ẽ bida mawua opanu baera.
48 Mawuera warinu kangabuta undubidua Daizeze untubemamba undubibu kiranka.
Bed’ea biobʉbari
^ Nawedara Gehenane eibalbuepanasi basurara, mamina Jesúsba maun yizata zokasi jara urimbita embera jipa beita.
^ Jarakirambu sacrificio obadata.
^ Griegode pornéia. Akura glosariota.
