Mateoba budata 7:1-29
7 ”Wuabemara ũrũ imitia bedeabuta iduaribidua, mawua wuabemarasida mara ũrũ imitia bedeada ẽ bamarea.
2 Maramba wuabemara ũrũ imitia bedeadara wuabemarasida mara ũrũ iyaba imitia bedeadayi akuza maramba wuabemara sawua edabudeba, wuabemarabida maranta iyaba edadayi.
3 Bu daujãnẽ bakuruta abuburu, ¿karea akui buara bu membeaba nejarra iyi daujãnẽ abura?
4 ¿Sawua jarai bua bu membea ‘iduaribira bu daujãnẽ nejarra abuta mua ãĩ buemarea’ buya buyi daujãnẽ bakuruta abuburu?
5 Na akura buyikuza sawuachuta akunumai kaude bu membeaba iyi daujãnẽ nejarra erbuta sawua ãĩ bueita.
6 ”Nekare Daizezedebemanta usara diaraindua akuza mara perlara* chinara diaraindua anyara maunra bari ũrũ biradugaseabu baera akuza maranta orraedaseabu.
7 ”Widida ũrũ wididua Daizezea diamarea maramba nesidabuta, mawuara iya diaya maunta, iyita juruda ũrũ juruidua, mawuara maramba nesidabura undudaya, widida ũrũ wididua iyaa puerta ewamarea, mawuara iya ewaya.
8 Warinubaira bua nekarenta widira, maunta diadayi akuza bua nekare jurura maunta unduyi akuza bua ewamarea widira ewadayi.
9 Mara wũãwũãba panta diamarea widira marambara dia ẽ bayi mongarata, ¿bumabi?
10 Akuza iya bedata widira maramba damata diada ẽ bayi, ¿bumabi?
11 Awuaraburu marambara nemitia opanumina mara wũãwũãba widibudadera nembiata diapanu, mamina Daizeze untubemambara, ¿audre diaseabu ẽka maramba nesidabura?
12 ”¿Marambara sawua edamarea kangabu marara? Iyaba edaidua wuabemarasida maramba kangabu kiranka, maunta omarea jarabu baera Moisés Leyba akuza profetaramba budade.
13 ”Beieda edebu ora yizroma akuza yi puertasida. Emberara mejanchauta eda wampanu mamara mamina marara eda waidua puerta zakede.
14 Maun puerta ora pensuabu mamina maumbara ewari jomaune babiyi akuza maun puertara wikauba undupanu.
15 ”Profeta apanura yi sewabiraindua, anyara bari ũrũra undubibu oveja kiranka panuta kare kayirua oẽãta. Mamina warinubaira anyi sora usapa kiranka chu.
16 Anyira undu kawuadayi anyi sawuachudeba, maramba saunta neta biata kawuabari kiranka yi bakurudeba, bumabi maramba uva juruburudera mawua jurupanu ẽ urude eda, abarika higo juruburudebida.
17 Adewara bakuru bia bara neta biata diabu, mamina bakuru zeri ẽãbara neta zeri ẽãta diabu.
18 Bakuru bia bara neta zeri ẽãra dia ẽ, abarika bakuru zeri ẽãbara neta biara dia ẽ bayi.
19 Bakuru zeri ẽãra tudape tubude eda eibalbuedaibara.
20 Maumba sewata Daizeze ũrũ bedeapanurãrã undu kawuadayi anyi sawua panunemba.
21 ”Joma yi Daizeze ode bua apanurãrã eda ba ẽ bayi Daizezeba zokaburudera, awuaraburu mu Zeze untubemamba zokabuta opanurantru.
22 Maun ewade mejanchauba muaa mawuanañi: ‘Noko, noko, ¿bua kirambebu ẽka daiba bu trʉ̃ta zokasita profetara kiranka bedeaita akuza bu trʉ̃ta zokasida ẽka demoniora ãĩ bueita adewara bu trʉ̃nemba mejancha milagro osida ẽka?’.
23 Mamina maun ewade mua anyaa jarayi: ‘Mara Daizezeba zokabudepanura ẽãra, jampeaidua, unduka mua marara’.
24 ”Mamina yi mua jaraburude bura, jari embera bia krincha karampe iyi de mongara ũrũ parãna kiranka bayi.
25 Ewari aba kue zromata zesi, mejancha puandrunumesi akuza do zromata berabarisi mamina iyi dera tega wa ẽ basi, mongarama biʼia parãnumasi baera.
26 Mamina yi mua jaraburude bu ẽãra, jari embera bia krincha ẽã iyi de ibu ũrũ parãna kirankabu.
27 Ewari aba kue zromata zesi nangu zromaena mombe do zroma zeburuba edesidera”.
28 Naunra bedea Jesúsba jaradiakuadara, emberara soidu jũẽsi, iya biʼia jaradiasi baera.
29 Anyi nejaradiabarira neira awuara jaradiabasi, iya jaradiabura Daizezedeba zebasi baera.
Bed’ea biobʉbari
^ Maunra borokoa uruyachu, biʼiakiru akuza oro kiranka valechu. Maunra undupanu pusade.
