Mateoba budata 27:1-66
27 Unadruburude joma sacerdotera nokorãrã, zorara puwurudebemabawara amba yi juresida krincha jurudaita, sawua beadaita Jesústa.
2 Maun tea, iyira tajuna karampe edesida noko Pilatoidu.
3 Maune Judas, Jesús sewadaba, kawuaside Jesúsʼra beadaibasita, krincha okarampe wansi sacerdotera nokorainu akuza zorarainu, mawua jenda diaita 30 moneda iyaa diada peadata.
4 Mombe anyaa jarasi: “Nekayiruata oburu muara, mara jida diasi baera kaun embera kayirua neẽã buta”. Mawue anya panusida iyaa: “Maunra buyaburu kawuabu, daibara kawua ẽ maunra”.
5 Mombeburu iya templode, maunra monedara balbue karampe, wansi mamaumba. Mombe ojuembari beisi.
6 Mamina sacerdotera nokoramba maunra monedara jurepeda karampe jarasida: “Biga ẽ bayi naun platara templode plata wuagabadamae amaenaita, naun platara diasida embera abauta wa sarrasi baera”.
7 Anyirai bedeada karampe edasida druata* mawua mama joudaita emberara jampebemaranta.
8 Maun karea idibasidu maun druara, trʉ̃gapanu Wa drua.
9 Mawua aripe berabarisi profeta Jeremíasdeba jaradapeadata, iya jarasi: “30 moneda jidasida, anya jarasida baera maunta diadaita embera abaubari, mainu diadaya asida israelitaramba,
10 maun plataba edasida druata, Jeowaba mua jarada kiranka”.
11 Mawue Jesúsʼra noko kawa edaunumasi, maune nokoba widisi: “¿Judíora nokoka bura?”. Jesúsba iyaa panusi: “Buya jaratabe”.
12 Mamina sacerdotera nokoramba akuza zoraramba iyi ũrũ nemejancha jarabarabasidera, iyara kare panu ẽ basi.
13 Aramaunta Pilatoba iyaa widisi: “¿Uri ẽka buara karenta jarabarabura bu ũrũra?”.
14 Mamina iya mia karesida panu ẽ basi. Nokora maumba krincha oamaesi.
15 Pascua fiestaza, nokobara emberaramba jaraburu emberanta ãĩ buebasi cárceldeba.
16 Maun ewade emberanta cárcelde chuasi jomaumba undukaudeta, maun trʉ̃ra Barrabásbasi.
17 Mawue Pilatoba emberara mama amba yi jurebarabua widisi: “¿Kaita cárceldeba ãĩ buemareabu marambara: Barrabásta o Jesús, Cristo apanuta?”.
18 Pilatobara kawua totosi Jesúsʼra jidasidata envidia karea.
19 Pilato, juezʼra jewedabarimae jewedabude, yi kimaba iyaa naun bedeata jarabuesi: “Neida orara kaun embera, kare kayirua neẽã buta. Idi kaimokarade undusi mua iyita, mombe maun kaimokaraba mejancha perasi mura”.
20 Mamina sacerdotera nokoramba, zorarabawarauba emberara kabanabura jarasi, wididamarea Barrabásta idu buedaita akuza Jesústa beadamarea.
21 Maune nokoba akuza anyaa widisi: “Naunra umenebemara, ¿kaita ãĩ buedamarea kangabu marabara?”. Anya panusida: “Barrabásta”.
22 Pilatoba anyaa jarasi: “Mawue, ¿Jesús, Cristo apanura sawua oi muara?”. Jomaumba panusida: “Bakurude jirabura”.
23 Nokoba anyaa jarasi: “¿karea mamina? ¿karea kayiruata oburu iyara?”. Mamina wuaburu jura jundrusida: “Bakuruma tachi jirabura”.
24 Emberarãrã wuaburu bugadru totosi, mawue Pilatoba kawuasi kare obe ẽãta, maun karea baniata jiraeda karampe jomaunra kirabita juwa sugusi, mombe jarasi: “Maramburu kawua oidua naun embera bebura, mura naunera eda ba ẽ bayi”.
25 Maun ũrĩpe jomaumba panusida: “Dai juwade amaera akuza dai wũãwũãra juwade amaera naun embera bebura”.
26 Mawue iya idu buesi Barrabásʼra, mombe iya Jesúsʼra ubisi akuza jarasi bakuruma tachi jirabudamarea.
27 Mawue gorogororaba, iyira edesida noko deidu akuza iyi kawa joma zebisida gorogorora.
28 Iyi wua weana karampe wua purruta jʉ̃bisida.
29 Akuza uruta kasida, mombe iyi buru ũrũ jumbisida adewara bakuruta buesida iyi juwa arare, mombe iyi na sankokode kube karampe ipida jarasida iyaa: “Sawuabupe judíora nokora”.
30 Maun tea dau idusida iyira akuza bakuru iya juwade erbadara jarina karampe maumba tawe jundrusida buruma.
31 Kombeburu iyi karea ipidabarabada tea, iya wua purru jumbadara wẽãsida mombeburu iyi wuata jumbisida jenda, tea iyira edesida bakuruma tachi jirabudaita.
32 Anyi mamaumba wane, ode undusida embera Cirenenebemata maun trʉ̃ra Simónbasi, mombe iyaa ajuersade atubisida bakuru Jesús jirabudaita.
33 Anyi jũẽsidade Gólgota apanu druaidu, maumba jarakirambu Calavera,
34 vino chirua zoaeda puerachuta diasida iyaa, iya seaku karampe do ẽ basi.
35 Untu bakuruma tachi jirabuda tea, iya wua ũrũ jumbadata akuza diabari jumbadata koekuada karampe, suerte osida anyirai dedekaita.
36 Mombe mama jewedasida aku erbara baita.
37 Adewara iyi buru ũrũ bedeata bu jirabusida, jarachuasi: “Naunra Jesús, judíora noko”.
38 Mombe iyi kawa untu bakuruma tachi jirabusida nezrugamiaranta ume, aba juwa arare, aba juwa ankare.
39 Yi mama berabaribururãrã, iyi karea ipidasida akuza ijura bedeasida.
40 Mombe jarabarabasi: “¿Bubasi ẽka templo ãrĩ bue karampe jenda ewari umbeade parãña anumanara? Buyikuza endrurame, buta warinu Daizeze Warraburu ubaera kamaumbara”.
41 Sacerdote nokorãrã, Ley ũrũ jaradiabarirabawara akuza zorarabawara iyaba ipidasida iyi karea mombe jarabarabasi:
42 “Iya wuabemaranta karebasiburu, ¿karea iyikuzara kareba ẽpe? Israelde iyita nokoburu; ¿karea ubae ẽ kamaumbara? Mawuantru ijañi daibara.
43 ¿Daizezeta ijambu ẽka iyara? Daizezeba karebakirambasiburu iyita, ¿karea kareba ẽ? ¿Iyi ẽka jarabadara ‘Daizeze Warra mura?’”.
44 Nezrugamiara iyi kawa jirabadarabida imitia jarasida iyira.
45 Umatipauba a las 3 bayeda, naun druara joma paringua totosi.
46 A las 3 numune, Jesúsba nemi jingua jurasi: “Éli, Éli, ¿láma sabakhtháni?”. Maumba jarakirambu, “Zeze, Zeze, ¿karea doba amaeburu bua mura?”.
47 Anya maun uri, unkuru mama badaramba, anyirai mawuasida: “Elíasta trʉ̃numina naumba”.
48 Anyidebema abauta wemba totosi esponjama, mombe maunta somberaedasi vino origeamane. Bakurudeku karampe Jesúsʼa diasi domarea.
49 Mamina wuabemaramba jarasida: “Iduaribira che kaunra, Elíasta zei kawuaita iyi karebaita”.
50 Jesúsʼra jenda mejancha jurasi, mombe wua uñaba ẽã totosi.
51 Maune wua zroma templode jirabadara, enzadra koa totosi untuba eidubayeda, mombe druara ure urenumubarisi akuza mongara zromarãrã todozoatotosi.
52 Maumba bewara dera ewa ewadru totosi, Daizeze ode badara beida kakuara ewarade tadazoasi.
53 Maunra, embera mejanchauba undusida. (Jesús jenda piradruda tea unkuru emberara bewara deare berabaridarãrã, Jerusalén puwurueda wansida).
54 Gorogorora nokoba akuza iyiume badaramba akubarabasi Jesústa, maune anya undusida drua ure zesita akuza nekare mejancha berabarisita, maun karea mejancha perasida anyira. Mombe jarasida: “Kaura warinu Daizeze Warrabasi”.
55 Wuerara mejanchauba Jesúsʼra kopaya zesida Galileadeba iyi karebadaita, maunrambara jingauba akubarabasi.
56 Maunrane eda basi María Magdalenata akuza awuru Maríata maunra Santiago akuza Josés papabasi, adewara chuasi Zebedeo warrara papata.
57 Kiubodoare, zesi embera mejancha plata barabuta Arimateadeba, maun trʉ̃ra Josébasi, iyisida Jesús kaidubema ba zesi.
58 Maun yumakerara bedeasi Pilatoume Jesús kakua widita, mombeburu Pilatoba jarasi maunʼa diadamarea Jesús kakuata.
59 Mawue Joséba Jesús kakua ede karampe, wua lino bia jaigu ẽã chuba buraedasi.
60 Maunta iyi druade bewãra de yiwidi odamae amaesi, maunra iya peñata koru zokadabasi, maun tea mongaraba tapa zokasi, mombe wansi.
61 Mamina María Magdalenara ababema Maríaume ariwia panesi bewara de kirambita jeweda.
62 Maunra berabarisi sábadoita nekare obarabaside, maun nruema sacerdotera nokoranta akuza fariseoranta amba yi juresida Pilatoidu.
63 Mombe iyaa jarasida: “Noko, daiba kirambepanu kaun sewaneburu omiabara iyi zokai bueda jarabarisita: ‘Ewari umbea baburude jenda piradruyi mura’.
64 Mawuera kãwũẽna jarada ewari umbeabayeda aku wanamarea iyi wuagadapeadamae, iyi kaidu panuramba zrugaseapanu iyi kakuara, mombe emberara jaraseapanu: ‘Iyira beidata jenda piradrusi’. Maun sewaneburutru audre yi zromabayi iya na jaradaira”.
65 Pilatoba anyaa jarasi: “Edeseapanu gorogororanta mara kaidu; mombe biʼia tapanumuidua iyi wuaganumumaera”.
66 Mawue anyira wansida, mombe biʼia tapanumusida mongaraba iyi wuaganumumae akuza gorogororanta amaesida mama.
Bed’ea biobʉbari
^ Lit. “embera egoroba nekare parabu, druata”. Mama trajapanasi baibara yi maun opanuranta.
