Mateoba budata 8:1-34
8 Katumainu chuadata jenda zeburudera emberara mejanchauba pewansida iyira.
2 Maune zesi embera aba lepraba kayabuta,* iya Jesús kirambita sankokode kubepe jarasi: “Noko, mua kawuabu buara mura bebiseabuta, bua kangaburu”.
3 Maun karea Jesúsba tombari karampe iya jarasi: “Muara bura bebikirambu”, aramaunta iyi lepraba kayabadara betotosi.
4 Mamina Jesúsba iyaa jarasi: “Kaumbara jomaua jarakaita naunta, na wara sacerdoteidu mombe Moisésba jarada ofrendata edera, mawua sacerdoteramba kawuadamarea bura warinu besita”.
5 Iyi Capernaúmʼena jũẽburude gorogorora noko abauba orraedasi, karebata widita.
6 Iya jarasi: “Noko, mu nezokara mejancha kayanumumba camanemba piradrube ẽ”.
7 Aramaunta Jesúsba jarasi: “Mu kainu jũẽburude bebiyi mua”.
8 Mamina gorogorora nokoba jarasi: “Mawua ẽ Noko, mura kare ẽ bu mu deidu jũẽira, awuaraburu bari jarara mu nezoka bemarea mawuara iyira beyi.
9 Warinubaira muabida obu mua omarea jarapanuta akuza mu gorogororasida mua zokaseabu, mua anya ‘wamarea’ jarara wambu anyira, mua ‘zemarea’ jarara zebu anyira, abarika mu nezokabida mua ‘nekare omarea’ jarara, oyi iyara”.
10 Maunta uri, Jesúsʼra mejancha sobiasi akuza iyi kaidupanura jarasi: “Israeldera muara unduka embera naune kiranka Daizeze ũrũ mejancha ijambura.
11 Emberara mejanchauta jingauba zedaya,* Daizezeba zoka jundruburudera anyibawara jewedadaya Abrahánta, Isaacta akuza Jacobta.
12 Mamina Daizezeba zokai ewaride baibadarãrã paringuaeda jurekuadayi, mama jengadayi akuza kare oi kawua ẽ taibayi kĩrũbiba”.
13 Maun tea Jesúsba gorogorora nokoa naunta jarasi: “Jenda wara bu deda bua wididara aripe berabariyi, bua Daizeze ũrũ mejancha ijambuta undubisi baera”. Maun audre ẽãne iyi nezokara betotosi.
14 Pedro deidu jũẽburude Jesúsba undusi Pedro pakorera, camane tabuta kuwamiaba.
15 Maune Jesúsba iyi juwata tombarisi maumba iyi kuwamiara neẽ totosi, aramaunta piradrutoto karampe Jesúsʼita nekare ototosi.
16 Kewarare, emberara mejanchauba Jesúsma wesida wawaberanta, mombe Jesúsba anya bedea aba jaraburuba ãĩ totobisi demoniorãrã adewara yi zuburiapanuranta bebikuasi.
17 Naunra mawua berabarisi aripe berabarimarea profeta Isaíasdeba jaradapeadata: “Iya edesi dayira kayata akuza dayira puata”.
18 Jesúsba emberara mejanchabuta undui, iyi kaidupanura jarasi iyita kirara edemarea.
19 Mombe Ley ũrũ jaradiabariba Jesústa orra karampe mawuasi: “Noko* bu wamburuma wañi musida”.
20 Mamina Jesúsba panusi iyaa: “Zorrorabara erchu anyi sama kãĩra abarika ibanarabida, mamina Embera Warrara neẽ sama kãĩra”.
21 Akuza maune Jesús kaidupanura abauba iyaa jarasi: “¿Noko, na mu zezeta joueda wanseabuka mura?”.
22 Jesúsba iyaa panusi: “Mu kaidubara badua, mombe iduaribira beida kiranka panuraba wuagadamarea beidarãrã”.
23 Jesúsʼra iyi kaidu panurabawara jambade bari karampe wansi.
24 Maune nangu zromata deguesi, mombe baniaba jambara birabusawasi, mamina Jesúsʼra kãĩnumasi.
25 Jesúsʼidu wana karampe anya bedea zuburia jarasida: “Karebara noko, beiyi dayirãrã”.
26 Mamina Jesúsba jarasi anyaa: “Kareamba ija ẽ marambara, ¿karea peranumu marara?”. Mawue piradrutoto karampe jarasi puandrua akuza pusa pikiadamarea mawuera joma pikinumatotosi.
27 Anya jipa ijana ẽ basi baera anyirai mawuasida: “Kare emberanta kãwũãchu naunra, puandruba akuza pusaba urichu iya jaraburura”.
28 Puwuru Gadara doya baburude emberara ume demonioba wawachume daucha zesi, anyira bewara wuaganumuareba untu zesida. Emberara maun o arera berabarikirade ẽ basi, naunra emberara anyi wawadogodera mejancha yõtotopanasi baera.
29 Mombe Jesúsʼa jurasida: “Daizeze Warra iduaribira daira, ¿wabida ẽ weda zuburia oita zesika bua daira?”.
30 Maune ara jinga nekobarabasi chinaranta.
31 Mawuera demonioramba Jesúsʼa zuburia mawuasida: “Bua daita ãĩ jurekuaiburu eda wambira daira kaunra chinarane”.
32 Mawue Jesúsba jarasi: “Eda waindua”, mawuera anyira emberaranemba ãĩ wa karampe chinarane eda eima wansi, mombe chinarãrã jogoaeda uma wankuasi mama joga beikuasida.
33 Maune yi china akubarirãrã miru wembasida. Mombe anya jara wansida puwuruidu karenta berabarisita akuza demonioramba wawabadara kare berabaridasida.
34 Mawuera emberaramba juru wansida Jesús undudaita, anya undubudade Jesúsʼa jarasida wamarea anyi druadeba.
