Mateoba budata 19:1-30
19 Iyi bedea berabarida tea Jesúsʼra wansi Galileadeba, mombe Jordán kirabari karampe juensi Judea kawa.
2 Maune emberara mejanchauta iyi kaidu wansida, mombe Jesúsba mama bebikuasi yi kayaberãrã.
3 Maune fariseoranta zesida Jesúsʼidu, anya kriña bedeata widisida Jesúsba aña panumarea: “¿Yumakerambara idubuibaraka iyi kimara badu karea?”.
4 Jesúsba anyaa panusi: “¿Maramba Daizeze Bedeade lebari ẽka, Daizezeba emberara parãsidera, naara parãsita yumakeranta yuwueraume?
5 Akuza jarasi ‘Maun karea yumakerara wañi yibariramaembara, yi kimaume amba baita, mawua anyira abapaibu kiranka bayi’.
6 Mawuera ume panu ẽ awuaraburu abapaipanu kirankapanu, maun karea Daizezeba amba babisiburu mia abau emberamba yi idububi ẽ baibara”.
7 Anya jarasi: “Mawuera, ¿karea Moisésba jarasi yumakerambara karta yi idubusi abarita diaseabuta yi kima, mombe wamarea jaraseabasita?”.
8 Jesúsba anyaa jarasi: “Moisésba iduaribisi yumakeraramba anyi kimara idubudamarea, maramba kãwũã urikirade ẽ baera, mamina naarãrã kãwũã ba ẽ basi naunra,
9 mamina mua mara jaraya, yumakeramba yi kima Daizezeba kanga ẽãne mia erkãĩ ẽ* buta idubura akuza awurume juwa jidara, maun emberara yi kimanemba ãĩbabu”.
10 Iyi kaidupanuramba jarasida: “Maun yumakeranta mawuabaibaraburu yi kimaume, mawuara bigabayi juwa jida ẽ baita”.
11 Iya jarasi: “Mamina jomaunta mawua babe ẽ, Daizezeba mawua babiburantru mawua baseabu,
12 unkuruta eunuco,* mawua tosida baera, unkuruta eunuco babisida, unkuruta eunuco kiranka panu, Daizezeba zokabuare bakirampanu baera. Embera abauta doba bakirambuburu, bedea neẽ”.
13 Maune emberaramba anyi wũãwũãranta wesida Jesúsʼidu iyi juwata wũãwũãra ũrũ buemarea akuza yiwidimarea anyi bari. Mamina Jesús kaidupanurambara keasida anyira.
14 Maun karea Jesúsba jarasi: “Iduaribidua wũãwũãrãrã, idu zebidua anyira muinu, wũãwũãra kiranka panurantru panai baera Daizezeba zokaburudera”.
15 Tea, wũãwũãra buruta tombari karampe wansi mamaumbara.
16 Maune emberanta aba Jesúsʼidu zekarampe widisi: “Nokʼo,* ¿kare nembiata oibara mu ewari jomaune baira?”
17 Jesúsba panusi: “¿Karea widibu kare nebiata oibara ũrũ? Daizezetru abapai embera biaburu. Warinubaira buta ewari jomaune bakirambuburu, oibara Daizezeba zokabuta ewari joma”.
18 Naun emberamba widisi: “Karenta omarea zokabu iyara”. Jesúsba panusi: “Mia bearara, ãĩbarara, nezrugarara, yãrã ũrũ sewaneburuta jararara,
19 Wawiara bu zezera, wawiara bu papara akuza kangara wuabemarãrã buyikuza kangabu kiranka”.
20 Kuramba jarasi: “Joma ozeburu mua maunra, ¿karenta oibara maun awuara?”.
21 Jesúsba panusi: “Bua joma daucha okirambuburu, nendora bua erbuta akuza diara platara pobrera, mawuantru nembiata erbayi bua untura, tea zekarampe mu kaidu bara”.
22 Iya maun uri bia ẽãtoto karampe wansi, iya mejancha erbasi baera nembiata.
23 Mawue Jesúsba iyi kaidupanura jarasi: “Embera plata mejancha erbuitara zarebayi Daizezeba zokabude eda baira.
24 Akuza iyi camellosida berabariseabukira aguja zobeade, embera plata mejancha barabuta Daizezeba zokabude eda waira”.
25 Iyi kaidupanuramba maun bedea urinsidade yiya aku akudrutotosida mombe jarasida: “¿Kaita ewari jomaune bai mawuara?”.
26 Jesúsba iyi kaidupanurãrã kirankita aku karampe jarasi: “Yi beibariraitara zare maunra mamina Daizezeitara neẽ kare zareabura”.
27 Mawue Pedroba panusi: “Daiba nejoma idubusi bu kaidu baita, ¿karenta undui daiba maumbari?”.
28 Jesúsba anyaa jarasi: “Joma jenda ara oi ewari zeburude akuza Embera Warra jewedaburude iyi jewedabari uruyachumae, mara mu kaidu panurãrã jewedadayi jewedabari 12 bumae yi 12 tribu Israelde panuranta kawua oita.
29 Embera abauba mu karea iyi deta idubura, yi memberanta, yibariranta, wũãwũãranta mawua ẽ buru druata, maumbara 100 vece unta unduyi akuza ewari jomaune bayi.
30 ”Mamina idi yizroma kiranka panurãrã tea juneainu beyi akuza yi kare ẽ kiranka panurãrã naara panañi.
Bed’ea biobʉbari
^ Griegode pornéia. Akura glosariota.
^ Naunra yumakera kakuara zeri ẽ maumba mia erkãĩbe ẽ akuza juwa jidada ẽ.
^ Lit. “Jaradiabari”.
