Mateoba budata 14:1-36
14 Herodesba zokanumaside, iya urinsi Jesús ũrũ karenta jarabarabuta.
2 Maun karea Herodesba iyi nezokara jarasi: “Juan buru koebari kaunra, beidata jenda piradrusi, maumba milagrota onumu iya”.
3 Herodesba Juanʼra cárcelde eda ibalbuesi, yi membea Filipo kima Herodíasba mawua widisi baera.
4 Maunera Juanba badua jaranumasi: “Kaun wueraumera juwa jidabe ẽ bura”.
5 Herodesba Juanʼra beakirambasi, mamina emberara wawiabu karea bea ẽ basi, Juanra akupanasi baera profeta kiranka.
6 Mamina Herodesba iyi cumpleaños onumaside Herodías kauta bairanumasi, Herodesʼra mejancha sobianumasi.
7 Maun karea warinu diaya asi iya nekare badu widiburuta.
8 Herodíasba yi kaua badua jaranumasi baera, yi kauba jarasi: “Platode wera Juan buru koebari buruta”.
9 Noko Herodesra maun karea sopuasi, mamina iya oibarabasi baera iya warinu oya adata akuza jomauramba akubarabasi baera, dia jarasi.
10 Maun karea zokasi Juanta otutadamarea cárcelde.
11 Maun tea Juan burura platode wesida, maunta Herodías kaua diasida, waya yi kauba yi papa diasi.
12 Tea zesida Juan kaidupanuranta mainu, mombe edesida Juan kakuara wuagadaita, tea Jesúsʼa jarade wansida.
13 Jesúsba maun bedea urinside wansi mamaumbara jambade, mio neẽmae chuaita. Mamina emberaramba maun urinsidade Jesús kaidu wansida jirune, anyi druadeba.
14 Iyi doya jũẽburude undusi emberara kabananumunta, mombe anyi karea soborekeasi baera bebikuasi yi kayapanurãrã.
15 Mamina ewarira kiubusi baera, Jesús kaidupanurãrã iyidu jũẽna karampe Jesúsʼa jarasida: “Jingaduanu dayirãrã, mombe kiubusi ewarira, anyaa jarada puwuruidu wanamarea mawua anyi ne eda kodamarea”.
16 Mamina Jesúsba jarasi anya: “Neẽ karea waira anyira, maramba yiko diaidua anyaa”.
17 Anya Jesúsʼa jarasida: “Daibara panʼra 5 pai erpanu akuza bedata umepai erpanu”.
18 Jesúsba jarasi: “Muinu weidua”.
19 Akuza jarasi emberara chirua ũrũ jewedadamarea, maunare pan 5buta jiraeda karampe akuza bedara umebuta jiraeda karampe, unta aku karampe yiwidisi. Mombeburu panʼra buekua karampe iyi kaidu panura diasi anya emberara dedekamarea.
20 Mawuera jomaunta nekosida akuza jomaunta jãwũãsida, kombeburu anya konumana sobradara ẽ zake 12 jurepesida.
21 Maunera 5 mil yumakeraranta nekosida, maun awuara nekosida wueraranta akuza wũãwũãrasida.
22 Aramaunta Jesúsba iyi kaidu panurãrã jambade baribigasi, mawua kirara wanamarea, iya emberara wamarea jarabueda.
23 Iya emberara deda zokakuada tea, katumainu wansi abapai yiwidita, mombeburu diamasi basidu abapai chuasi mama.
24 Maune jambara jinga totosi doyaubara, puandruba dora zauzaubarisi baera anyira mejancha zarea onumasi.
25 Mamina diapeda ewari paringuanumu weda, Jesúsʼra pusa ũrũ teibawasi anyima.
26 Iyi kaidupanuramba iyi undudai do ũrũ busita mejancha perada karampe jarasida: “¿Karenta kãwũãchu kaunra?”. Mawuera mejancha jurasida perabiba.
27 Mamina Jesúsba anyaa jarasi: “Muane, peraraindua”.
28 Pedroba panusi: “Noko, warinu buburu,mua jarada buidu wamarea do ũrũ”.
29 Jesúsba jarasi: “Zera”. Mawuera Pedrora jambadeba ãĩ wa karampe do ũrũ teibawasi Jesúsma.
30 Mamina iya mejancha puandrunumuta akui, pera totosi, mawuera iyira tabusasi baera jurasi: “Jesús karebara mura”.
31 Aramaunta Jesúsbara juwa dia karampe, mawuasi: “¿Karea ijambuta undubi ẽ buara? Audre ijainta waembu buara”.
32 Anyi umeweda jambade barida tea, puandrura tau totosi.
33 Mawue joma yi jambade kupananara sankokode kupane karampe jarasida: “Butru warinu Daizeze Warra”.
34 Anya pusa kirabarida tea juensida Genesaret druaeda.
35 Iyita kawuadai, yumakera mamabemarambara jomaua jarakasida, maun karea emberarambara kayaberãrã Jesúsʼidu wesida iya bebikuamarea.
36 Akuza emberarambara Jesúsʼa jarapanasi badua iyi wuata wika tombaribimarea, maumba iyi tombariburãrã betotobasi.
