Mateoba budata 15:1-39
15 Maune Jerusalénemba zesida fariseoranta akuza Ley ũrũ jaradiabariranta Jesúsʼa bedeata wididaita, anya Jesúsʼa widisida:
2 “¿Karea bu kaidu panurambara oda ẽ naweda pananaramba obada kiranka? Bari jaraita, anyira juwa sugu ẽ nekoi nawedara”.
3 Jesúsba anyaa panusi: “Waya marambara, ¿karea naweda badaramba obadata opanu Daizezeba zokabuta opanai kaude?
4 Bari jaraita, Daizezeba jarasi: ‘Wawiara bu zezera, wawiara bu papara’ akuza ‘embera abauba yi zeze ũrũ mawua ẽ buru yi papa ũrũ imitia bedeara beadaibara maun emberara’.
5 Mamina maramba jarapanu: ‘Embera abauba yi zezea mawua ẽ buru yi papa jarara: “Mua nekare bu karebaita erbadara Daizezea diaita erbu”.
6 Mawuara maun emberambara neẽ karea yibarira karebaira’, mawua marambara naweda badaramba obada kiranka odai karea oda ẽ Daizeze Bedeaba jarabuta.
7 Sewata nebiata opanu kirankapanu marara, maun karea Isaíasba jarabarisi mara ũrũ:
8 ‘Naun puwurubara mura iawauba ibia jarapanu mamina warinubaira anyara mura soiduba kangada ẽ.
9 Maumba maramba embera krinchata jaradiapanuburu, mawuara zeri ẽ marara mua yiwidi barabaira’”.
10 Kombeburu Jesúsba kabanara jarasi iyi kawa zedamarea mombe jarasi: “Uridua akuza kawuaidua mua karenta jaradiakirambuta.
11 Daizeze naara emberamba kare kobura mitiachu e awuaraburu mitiachu akuza kayirua embera yedauba zebuta”.
12 Mawuera Jesús kaidupanuramba iyaa jarasida: “Fariseorãrã sobia ẽã kuatotosi bua jarada karea”.
13 Iya panusi: “Neta joma mu Zeze untubemamba uda ẽãra joma ẽĩkuadaibara yi karradeba,
14 iduaribidua, dauberrea duanu kaunrara. Embera dauberreachuba iyi kiranka dauberreabuta edera anyi umeweda sobeade eda uwanañi mawuara”.
15 Pedroba jarasi: “Daia bia jara urimbira maun yizaba karenta jarakirambuta”.
16 Aramaunta Jesúsba jarasi: “¿Mamina marabida jipa uri au ẽka naunra?
17 Daya koburura dayi biteda jũẽbu mombe mamaumbara ãĩ wambu, ¿kawuabasika marabara maunra?
18 Mamina daya jarabura dayi sodeba zebu, maumba emberara mitia chu Daizeze dabu naara.
19 Bari jaradaita, dayi sodeba zechu krincha kayiruara, mia beaita, ãĩbaita, Daizezeba kanga ẽãne mia erkãĩta,* nezrugaita, sewaneburu jaraita akuza ijura bedeaita.
20 Naunra nemitia onumuneburu emberara mitiachu Daizeze dabu naara, mamina juwa sugu ẽã nekora, Daizeze dabu naara emberara mitia chu ẽ”.
21 Jesús mamaumba wana tea wansi Tiroeda akuza Sidónʼena.
22 Maunra druara Fenicia apanasi, embera wuera mainubemanta ze karampe jurasi: “Muta soborekea akura Noko, David warra, mu kaura demonioranta abu baera mejancha wawabu”.
23 Mamina Jesúsbara mia karesida panu ẽ basi. Aramaune iyi kaidupanuramba orrada karampe jara barabesi: “Jarada wamarea, iyira juranumina dayira ambudeare”.
24 Jesúsba panusi: “Mura bari zokasida yi ovejara kiranka aduaburanta juruita Israelde”.
25 Mamina maun embera wuerara Jesúsma degue karampe sankokode kube karampe jarasi: “Noko karebara mura”.
26 Jesúsba jarasi iyaa: “Biga ẽ wũãwũãra pan diaibadara usa zakera diaita”.
27 Iya jarasi: “Maunra warinu Nok’o, mamina usa zakerabara kobu mesadeba yiko jurzoadata”.
28 Aramaunta Jesúsba jarasi: “Embera wuera, mawuara muara oyi bua jarabuta, bua Daizezeta warinu ijambuta undubisi baera”. Maune yi kaura betotosi.
29 Maun tea iyira mamaumba wansi, Jesúsʼra Galilea pusa kawa jũẽ karampe wansi katumaena. Iyi mama jewedabueda,
30 emberaranta mejancha jũẽsi, maune eda erjũẽsida wambe ẽã buranta, arrengaburanta, dauberreaburanta, bedea be ẽã buranta akuza awuru kayaba bariburanta, maunranta Jesúsbara bebikuabasi.
31 Maun karea emberara yiya bia aku akudrutotosi, undusida baera yi bedeabe ẽã burara jenda bedeaseabasita, yi wambe ẽã buranta akuza yi arrengaburanta jenda bia wanseabasita, yi dauberreaburambara jenda undusita, maun karea Daizeze Israeldebema biga diasida.
32 Maunta Jesúsba iyi kaidu panuranta trʉ̃ karampe jarasi anyaa: “So borekeabu mura naunra emberara karea, ewari umbeaba anyi mubawarabuta akuza kare koi neẽ numu anyira, mu soba dia ẽ neko ẽã jenda zokaira mua anyita neko ẽã zokara ode jarrababa dorrabariseapanu”.
33 Aramaune iyi kaidupanuramba jarasida: “Daibara sama undui panʼra emberara kãwũã mejanchanumuta jãwũã nekobira, dayiranta kãwũã jingarapanuburu”.
34 Aramaunta Jesúsba widisi: “Marambara sombe pan erpanu”, anya panusi: “7 pai akuza wiña erpanu beda zakeranta”.
35 Maunare Jesúsba jarasi emberara jewedadamarea,
36 maun jarada tea panta akuza beda zakeranta jiraeda karampe Daizezea biga diasi, maunta buekua karampe iyi kaidupanura dedekasi, mawua emberara diadamarea.
37 emberara jomaunta jawua nekosida. Maun tea yiko sobradara ẽ zroma 7 jurepesida.
38 Maunera 4 mil yumakerara nekosida maun awuara nekosida wueraranta akuza wũãwũãranta.
39 Maun tea Jesúsba emberara jarasi deda wanamarea mombeburu iyira jambade bari karampe wansi Magadán druaeda.
Bed’ea biobʉbari
^ Griegode pornéia. Akura glosariota.
