Mateoba budata 25:1-46
25 ”Daizezeba sawua zokabura naun kirankabu: Wuerara yi zakera 10 panuramba, inbirara koaeda karampe wansida yumakera juwa jidaiume yi unduita.
2 Maunranebema 5 panurãrã jura kawua pana ẽ basi, mamina wuabema 5 panurãrã jura kawua panasi.
3 Yi jura kawuabu ẽãrabara inbirara edesida, mamina ededa ẽ basi aceitera,
4 yi jura kawua panurambara, anyi inbira ededa awuara edesida aceitesida.
5 Yi juwa jidaita badata ze ẽã numasi baera, wuerarãrã kãĩguesida.
6 Ewari enzadra baburude embera abauba jarasi: ‘Yi juwa jidaitabura zesia, aku zeidua’.
7 Aramaunta wuerara 10 panurãrã piradrukua totosi akuza anyi inbirarata ara okuatasida.
8 Wuerara 5 panuramba jarasida wuerara jura kawua panuraa: ‘Maramba aceite erbudebemata daia wika diaidua, dai inbirara kibodo baera’.
9 Yi jura kawua panurambara panusida: ‘Daiba maraa diara daita neẽ bayi, mawuera juru waidua maunra sama nendobuta mawua edadamarea’.
10 Mamina anya maun eda wane, zesi yumakera juwa jidaita badata. Wuerara jura kawua pananara iyiume eda wansi fiesta obarabuidu, maune puertara cerrasida.
11 Maun tea zesida wuabemara wuerarata, mombe jarasida: ‘Noko, noko, ewara’.
12 Mamina iya jarasi: ‘¿Kaipe marara?’.
13 ”Maramba kawua ẽ baera kare ewaride akuza kare umandaude berabarita, uruma panaidua.
14 ”Adewara Daizezeba sawua zokabura naun kirankabu: Yumakera abauba aña wai na trʉ̃si iyi nezokaranta, mombe diasi iya nembia erbuta.
15 Iyara iyi nezokarãrã bia undukawuabasi baera abaua diasi 5 talento,* ababemara talento ume akuza ababemara talento aba, maun tea wansi drua jampe.
16 Aramaunta 5 talento diadapeadara mesera wansi maun 5 talentoba trajade, mombe audu 5 talento ganasi.
17 Talento ume diadapeadabida iyaba osi, maumba audu talento ume ganasi.
18 Waya yi talento aba diada peadabara jounumusi iyi talentora.
19 ”Ewari bio berabarida tea nokora zesi akuza iyi nezokara widisi iyi platara sawua zokasidata.
20 Yi 5 talento diadapeadara iyidu juensi akuza jarasi: ‘Noko bua mua 5 talento diasi mamina muara audu 5 talento ganasi’.
21 Nokoba iyaa jarasi: ‘Bua bia oburua, bura nezoka bia akuza kerempabu. Mua wika diaside nembia osi baera, nekare zromata bu juwade amaeñi, zera mume sobia baita’.
22 Tea talento ume diadapeadara iyidu juensi, mombe jarasi: ‘Noko bua mua talento ume diasi, mamina mua audu talento ume ganasi’.
23 Nokoba iyaa jarasi: ‘Bua bia oburua, bura nezoka bia akuza kerempabu. Mua wika diaside nembia osi baera, nekare zromata bu juwade amaeñi, zera mume sobia baita’.
24 ”Tea talento aba diada peadata iyidu juensi, mombe jarasi: ‘Noko mua kawuabu buara daira mejancha zokabuta akuza bua u ẽ badata jurepekirabuta adewara bua jamapo ẽ badata jurepekirambuta.
25 Maun karea perasi mura, mombe bua diadara muara jounumusi, zabida bua diadara’.
26 Nokoba iyaa jarasi: ‘¿Bumara muara mua u ẽ badata jurepebu akuza mua jamapo ẽ badata jurepebu? Bura nezoka bia ẽ, jipa kare okira ẽ bura.
27 Mawuara buara, ¿karea mu platara, plata prestabarirainu ede ẽ basi? Mawua mu zeburude mua maunta interésbara cobra zekasi’.
28 ”Mombe jarasi: ‘Iya talento erbuta jarina karampe diaidua yi 10 talento erbua.
29 Embera abauba nekarenta erbuburu, maunara iya erbude unta diadayi, mawua mejancha erbamarea, mamina embera abauba nekarenta wiña erbuburu, iya erbura joma jarinañi.
30 Adewara nezokaba kare okira ẽ buru, maunra ãĩ juretaidua paringuaeda, mama jengayi akuza kare oi kawua ẽ taibayi kĩrũbiba’.
31 ”Embera Warra iyi ángelerambawara zeburudera, mejancha zareabara zeyi akuza iyira jewedayi nokora jeweda badamae.
32 Maunera emberara naun drua jomaunebemara iyi na amba yi juredayi, mombe iya unkuruta junsaba bueyi awururanemba, embera oveja akubariba iyi oveja junsaba buebari kiranka cabraranemba.
33 Iyara ovejarãrã iyi juwa arare bueyi, cabrarãrã iyi juwa ankare bueyi.
34 ”Aramaunta nokoba iyi juwa arare panuraa jarayi: ‘Mu Zezeba bia akupanura, nama zeidua, mawua jidadamarea, naun drua jundrudadeba* mara nembia diaita krinchadata, Daizezeba zokaburude.
35 Mu jarrabasidera maramba nediasida baera akuza mu obisia basidera maramba bania diasida baera adewara mu unduadua panasimina bia edasida baera.
36 Mu wua neẽ basidera maramba wua diasida, mu kaya basidera maramba akusida, mu cárcelde basidera maramba aku juensida’.
37 Maune embera biaramba iya panunaña: ‘Noko, ¿daibara sombeda undusida bura jarrababa obuta mombe yiko diasida, sombeda undusida daiba bu obiseabuta mombe bania diasida?
38 ¿Sombeda bia edasida daiba bura unduaduapanasimina, sombeda wua diasida daiba bu wua neẽ basimina?
39 ¿Sombeda aku juensida daiba bu kayanumaside akuza cárcelde basidera?’.
40 Nokoba anyaa panuñi: ‘Maramba mu membera audre wika panuranta bia edasida baera, munta bia edasida kirankabu’.
41 ”Waya yi juwa ankare panuraa jarayi: ‘Marara Daizezeba kawua osi baera munembara jinga baidua, Satanásʼita akuza iyi ángelerainta bu tubu pureata, marasida mama waindua.
42 Mu jarra basidera, marambara nediada ẽ basida baera akuza mu obisia basidera, maramba bania diada ẽ basi baera.
43 Mu unduadua panasimina bia edada ẽ basi baera, wua neẽ basidera wua diada ẽ basi baera, mu kaya basidera akuza carcélde basidera aku juena ẽ basi baera’.
44 Aramaunta anya jaradayi: ‘Noko, ¿sombeda yiko diada ẽ basi daibara, sombeda bania diada ẽ basi, sombeda bia edada ẽ basi, sombeda wua diada ẽ basi, sombeda aku juena ẽ basi bu kaya baside akuza cárcelde baside?’.
45 Iya anyaa jarayi: ‘Maramba mu membera audre wikapanurata bia edada ẽ basi baera, munta bia edada ẽ basi kirankabu’.
46 Naunra emberarãrã jipa makenanañi, mamina yi embera biarãrã ewari jomaune panañi”.
