Mateoba budata 21:1-46
21 Anyi Jerusalén kawababurude jũẽsida Betfaguéʼidu, Olivo katumainu, Jesúsba iyi kaidupanura umenta zokasi.
2 Iya naunta jarasi: “Waidua jari de zakera kubeidu, kainu jũẽburude maramba unduyi burra wueranta burro zakeume, eneta karampe weidua nainu,
3 mara wididara, jaraidua: ‘Nokoba nesidaku’. Aramaunta idu edebiyi iya”.
4 Maunra mawua berabarisi profetaba jarabaridata aripe berabarimarea, iya jarasi:
5 “Sion kauʼa* jaraidua: ‘Akura bu Nokora buma wa, ibiadebu iyira, burro ũrũ ajirabu, burro zake ũrũ’”.
6 Mawue iyi kaidu panurãrã wansida, mombe osida Jesúsba jarada kiranka.
7 Anya wesida burra wueranta burro zakeume, mombe wuata buesida nenduwurura ũrũ, mombe Jesúsʼra burro zake ũrũ barisi.
8 Embera mejanchauba ode bue wansida anyi wuata, unkuruba bakuru kiduata tu karampe ode bue wansida.
9 Adewara emberara iyi naa erbuzadaramba akuza iyi tea erbuzadaramba jura barabasi: “Karebara David Warrara. Jeowa, bu trʉ̃nemba zebura buara bia akubu, karebara iyira Daizeze untubema”.
10 Iyi Jerusalénʼena jũẽside, mamabemarãrã bugadrusida, mombe emberaramba widisida: “¿Kai naunra?”.
11 Embera mejanchauba panusida: “Kaunra profeta Jesús, Nazaret Galileadebema iyira”.
12 Jesús temploidu jũẽside, jurekuasi emberara ne nendo panurãrã akuza mama ne edapanuta. Adewara korekuasi plata cambiabarira* mesara akuza paloma nendobarira jewedabarita.
13 Akuza anyaa jarasi: “Daizeze Bedeaba jarabu: ‘Mu dera yiwidibari de adayi’, mamina nenzrugabarira de babinumu marambara”.
14 Akuza Jesúsʼidu jũẽsida emberara dauberrea panuranta akuza wambe ẽã panuranta temploidu, mombe bebikuasi iya.
15 Sacerdotera nokorãrã akuza Ley ũrũ jaradiabarirãrã kĩrũsida mejancha nembiata onumuta undusida baera akuza wũãwũãrasida jurabarabasi: “David warra, karebara daira”.
16 Mawue anya Jesúsʼa jarasida: “Uriku bua karenta jarabarabura anya”. Iya jarasi: “Uriku muara, ¿mawuara marambara lebada ẽka, jarabaridata: ‘Bua ibia bedeabibu bu ũrũ wũãwũãra akuza wũãwũãra judopanura’?”.
17 Iya anyi amae karampe wansi puwurudeba Betaniaena mama unandruita.
18 Iyi diapeda jenda wanside puwurueda, jarradeguesi.
19 Maunta iyi ode wane undusi higuera bakuruta edaunumuta, kaita degue karampe undusi bakurura kidua awanumuta, mawue iya jarasi: “Wua zau ẽ bayi bura”. Aramaunta higuera bakurura bagutotosi.
20 Iyi kaidu panurãrã maun undui yiya aku akudrutotosida, mombe jarasida: “¿Sawua bagudogo kaun higuerara atiaude?”.
21 Jesúsba jarasi: “Maramba Daizezeta ijampanuburu soiduba, maramba bari oda ẽ bayi mua naun bakuru higuera otae kiranka, awuaraburu naun katumabida jarayi ‘namaumba wara, adewara doitotora pusade’ mombe mawua berabariyi.
22 Maramba nekare badu widibudade ijampanuburu undudayi maunra”.
23 Iyi temploeda jũẽburude, sacerdotera nokoramba akuza zorara puwurudebemaramba orrasida iya jaradianumuinu mombe widisida: “¿Kaiba zokasi buara naun kãwũã omareara? ¿Kaiba kãwũã ojarasi buara?”.
24 Jesúsba anyaa panusi: “Mawuara muabida maraa bedeata widiyi. Maramba panunara mawuara muabida jarayi kaiba kãwũã ozokasita mua onumura.
25 ¿Kaiba zokasi Juanba emberara buru koemareara? ¿Daizezeba o emberaramba?”. Anyira anyirai bedeada karampe anyirai jarasida: “Dayiramba Daizezeba zokasi ara, iya jarayi: ‘Mawuara karea ija ẽ basi marambara’.
26 Mamina dayiramba emberaramba zokasi ara, ¿karenta odai emberarambara? Jomaumba jarapanu baera Juanʼra profetata”.
27 Aramaunta anya panusi, “daibara kawuada ẽ”, aramaune Jesúsba jarasi: “Muabida jara ẽ kaiba omarea zokadara.
28 ”Maramba kaseai naun ũrũ: Embera wũãwũãra ume erbuba yi naambema jarasi: ‘Warra wara idi trajade uva u tabuidu’.
29 Yi warraba panusi, ‘wa ẽ mura’, mamina tea krinchanuma karampe wansi iyira.
30 Maune maun emberaramba iyi warra teabemainu jũẽ karampe iyabau bedeata jarasi, maune yi warraba panusi: ‘wañi mura’, mamina wa ẽ basi.
31 Naunra umenebemambara, ¿kaiba osi yi zezeba kangabura?”. Anya panusida: “Yi naambemamba”. Aramaunta Jesúsba jarasi: “Daizezeba zokaburudera mara na wañi emberara nokoita plata cobra trajapanuranta akuza wuerara odebemaranta.
32 Juan zesidera mara jaradiasi, sawua Daizezeba kangabude baibarata, mamina marambara ijana ẽ basi, mamina emberara nokorainta plata cobra trajaburamba, wuerara odebemaramba ijansida, maramba undusida maunra, mamina mawuasidu idubuda ẽ basi maramba kayirua obarabura, mia ijana ẽ basi iyi bedeara.
33 ”Akuza urindua naun yizata, embera drua erbuba usi uvata, mombe cercanumusi, adewara mama osi uva birachibarita akuza de untuchubuta, tea iya maun druara emberara ne ude trajapanura arrendasi. Mombe wansi drua jampe.
34 Uva buai ewaride, yi drua yibariba iyi nezokaranta zokasi, uva buama iya diadaibarata diadamarea.
35 Mamina yi ne ubarirambara maunra nezokarãrã jidasida, mombe abara posida, yi ababemara beasida akuza yi ababemara mongaraba batasida.
36 Tea juneane drua yibaribara iyi nezokarãrã audre zokabuesi na zokabuedaira mamina maunrasida iyaba osida anyara.
37 Iya joma zokakuada tea, zokasi yi warrata, iya krinchabasi baera ‘mu warrantru wawiadayi’.
38 Mamina ne ubariraba drua yibari warra undusidade anyirai krinchasida: ‘Naunebayi naun druara maumba beadadru dayirambara, mawua dayirane baita naun druara’.
39 Mawue anya jidada karampe uva u tabu maemba jampe ededa karampe beasida.
40 Mamina uva ne u yibari zeburudera, ¿karenta oi iya yi ne ubarirãrã?”.
41 Yi urimpanuramba panusida: “Anyira embera kayirua basi baera drua yibaribara zuburia okuayi mombe awuru ne ubarira arrendayi iyi druara. Uva buai ewari zeburudera yi drua yibaria diadayi ne u anya diadaibara ewaride”.
42 Jesúsba anyaa jarasi: “Daizeze Bedeaba jarabu: ‘De parãbariramba mongara kanga ẽ badara maun mongaratru audre yibia bazesi. Maunra Jeowadeba zesi mombe dayiraintara jipa yibia’. ¿Lebada ẽka maramba maun ũrũra?
43 Maumba mua mara jarayi nembia Daizezeba zokaburude unduibadara undu ẽ bayi marambara, awuaraburu diayi emberara iya kangabuta okirampanua.
44 Adewara embera abauta mongaraba baebira iyira mejancha poyi mawua ẽ buru maun mongarata embera ũrũ deguewaburu maun emberara mejancha poyi”.
45 Maunra yizara urinsidade sacerdotera nokoramba akuza fariseoramba kawuasida Jesúsʼra anyi ũrũ bedeakuasita.
46 Anyara jidakirampanasi Jesúsʼra mamina wawiapanasi emberaranta, naunrambara profeta kiranka akupanasi baera iyira.
