Mateoba budata 17:1-27
17 Ewari 6 berabarida tea Jesúsbara edesi iyi kaidu Pedrota, Santiagota akuza yi membea Juanta katumaena, mamara anyi awa panasi.
2 Jesús kirara anyi naa awuara totosi, iyi kirara unatotosi bisia kiranka, iyi wuara torroatotosi una kiranka.
3 Maune undutoposida Moisésta, Elíasta Jesúsbawara nembura barabuta.
4 Aramaunta Pedroba Jesúsʼa jarasi: “Noko, idi dai bu kaidu zeira yibiabasi, bua kangaburu mua eajuyi carpa deta umbea, buita, Moisésʼita akuza Elíasʼita”.
5 Pedro wabida bedeabueda jãrãranta mejancha unatotosi anyi ũrũ, maune maun jãrãraneba bedeasi: “Naun mu warra mua kangabura, iya mura sobiabibu, uridua iyi bedeara”.
6 Maun ũrĩ anyira egoroma kiranbarru kubatotosi akuza mejancha perasi anyira.
7 Aramaunta Jesúsba anyi orraeda karampe akuza anyi tombari karampe jarasi: “Piradruidua karea peraira neẽ marara”.
8 Anyi piradrusidera Jesústru abapai edeunumunta undusida.
9 Anyi katumanemba jenda uru baside Jesúsba anyaa jarasi: “Mio jararaindua atia maramba undutabedata Embera Warra beidata jenda piradruyeda”.
10 Mamina iyi kaidupanuramba widisida: “Mawuera, ¿karea Ley ũrũ jaradiapanurambara jarapanu Elíastru naara zeibasita?”.
11 Iya panusi: “Warinu maunra, Elíasta zeibara naara mawua jenda joma ara oita.
12 Maun Elíasʼra zesi mamina ijana ẽ basi warinu iyi basita, awuaraburu zuburiabisida iyira, abarika kãwũã zuburiabidayi Embera Warrasida”.
13 Maune iyi kaidupanuramba kawuasida Juan buru koebari ũrũ bedeakuasita.
14 Anyi kabananumuinu juenside embera abauta Jesúsʼidu zesi, sankokode kube karampe iyaa jarasi:
15 “Noko, soborekea akura mu warrara, iyira mejancha wawanumu kapuria kayaba, mombe badua eitotochu tubude eda akuza edaude doitotochu iyira.
16 Mua wesi bu kaidupanurainu mamina bebi auda ẽ basi anyara”.
17 Maune Jesúsba jarasi: “Embera kayirua idibema emberara mombe ijana ẽ, ¿kai sombebayeda marabawara bai mura? ¿Kai sombebayeda kãwũãnumai naura? Muinu weidua wũãwũãra”.
18 Mawue Jesúsba nemi jingua demonioa jarasi ãĩ wamarea, mombe ãĩ totosi iyira wũãwũãnemba, audre ẽãne betotosi wũãwũãra.
19 Jesús kaidupanurambara iyidu zeda karampe chuwea widisida: “¿Karea ãĩ buebeda ẽ basi daiba kaun demoniora?”.
20 Iya panusi: “Wabida waembu audre ijainta. Warinu kawuapanaidua, maramba ijambuta mostaza semilla zake aba buburu, naun katuma jaraseabu jaridu kuba wamarea, mombe mainu kuba wãñi, neẽ bayi kare maramba obe ẽãra”.
21 --
22 Anyi Galileade amba yi jurekuanune Jesúsba jarasi anyaa: “Embera Warrara jidadayi iyi nejurara diadaita
23 akuza beidata ewari umbea berabariburude jenda piradruyi”. Maun uri iyi kaidupanurãrã krincha ototosida.
24 Tea Capernaúmʼinu juensida anyira, maune temploita plata cobrabariranta* juensida Pedroidu naun bedea wididaita: “¿Bu nokobara* pagabuka plata temploa diaibarara?”.
25 Iya panusi: “Pagabu”. Mamina Pedro deidu juemburude, iya kare jarai naweda Jesúsba widisi: “Bua kaseai Simón, ¿nokorambara kaira plata widibu anyi wũãwũãra o awurura?”.
26 Pedroba panusi: “Awurura”. Jesúsba jarasi: “Mawuara nokora wũãwũãrabara pagaibara ẽ,
27 mamina anyi bedea ẽ bamarea pusaidu wara bedata beaita, yi na jidaburu beda ide unduyi bua monedata* aba, maun monedata diara anyaa bu bari akuza mu bari”.
