Mateoba budata 16:1-28
16 Maune fariseoramba akuza saduceoramba orrasida Jesústa, mombe jarasida nekare zromata omarea, iya aña omarea kangakuanasi baera.
2 Iya anyaa jarasi: “Ewari kiubodoarera marambara jarapanu ‘ewari bianumañi, bajãra jipa kuaranumu baera’.
3 Diapedara marambara jarapanu ‘idira kuranzanumañi akuza kue ze jirabayi, bajãra kuaranumu daucha ewari kayiruanumu baera’. Mamina idi ewade kare berabarinumumba karenta jarakirambura jarauda ẽ marambara.
4 Kerempa panu ẽ embera idibemarãra, nekayiruatru opanu maumba jurupanu nekare biatru undubidamarea, mamina maunra unduda ẽ bayi, awuaraburu undudayi Jonás berabarida kiranka berabarita”. Maun bedea jarada tea wansi iyira.
5 Anyira kirara wansida, maune iyi kaidubemaramba kiranduasida pan edei badata.
6 Jesúsba anyaa jarasi: “Kabuidua fariseora pan waribibarideba akuza saduceora pan waribibarideba”.
7 Maun karea iyi kaidubemaramba anyirai mawuasida: “Weda ẽ basi dayirambara panʼra”.
8 Maunta uri Jesúsba anyaa jarasi: “¿Karea manyirai bedeakabarabu pan we ẽ bada karea? Kareamba ijainta waembu marambara
9 ¿Mua karenta jarakirakura bia urina ẽka waidide marambara? ¿Kirambeda ẽka marambara pan 5 budeba 5 mil yumakerara nekosidata? akuza ¿yiko sobraside, ẽzakera sombe jurepedara?
10 ¿Akuza kiranduasidaka marambara 7 pan budeba yumakerara 4 mil nekosidata? akuza ¿yiko sobraside, ẽ zroma sombe jurepedara?
11 Warinubaira muara marara warinu pan ũrũ bedeanuma ẽ basi awuaraburu mua mara jarasi fariseora pan waribibarideba akuza saduceora pan waribibarideba jurakawua panamarea”.
12 Maune anya kawuatotosi Jesúsʼra bedeakua ẽ basita pan waribibari ũrũ awuaraburu bedeakuasita fariseoramba akuza saduceoramba jaradiapanuranemba jurakawua panamarea.
13 Iyira juensi Cesarea druaeda, maunra Filipo druadebasi, maune Jesúsba iyi kaidu panura widisi: “Emberarambara, ¿kai apanu Embera Warrara?”.
14 Anya panusida: “Unkuruba jarapanu Juan buru koebarita, unkuruba Elíasta, unkuruba Jeremíasta mawua ẽ buru awuru profetata”.
15 Iya anyaa jarasi: “Maramara, ¿kai mura?”.
16 Maune Pedroba iyaa jarasi: “Bura Cristo, Daizeze zokaibu Warra”.
17 Jesúsba iyaa jarasi: “Simón, Jonás warra sobia bara, naunra emberamba kawuabi ẽ basi buara, awuaraburu mu Zeze untubemaba kawuabisi.
18 Adewara mua bua jarayi: Bura Pedro, mombe mua naun mongara ũrũ pãrãñi mu kongregasionta maunra mia beiba ãrĩbi ẽ bayi.
19 Mua bua diayi llaveranta, Daizezeba zokabude eda bamarea, bua nama egorode nei cerrara, untura yi cerramabayi akuza bua nama egorode nei ewara, untura yi ewamabayi”.
20 Maune Jesúsba iyi kaidupanura jarasi: “Yãrã jararaidua mura Cristota”.
21 Maune Jesúsba iyi kaidupanura jarasi iyira Jerusalénʼena waimbarabasita akuza jarasi mama zoraramba, sacerdotera nokoramba akuza Ley ũrũ jaradiabariramba mejancha zuburiabidaibasita mombe beadaibasita akuza ewari umbea baburude jenda piradruibasita.
22 Pedroba iyira jampe ede karampe jarasi: “Jesús, ¿karea mawuanumina bura? Buyikuza maunta jararara mawua berabari ẽ bayi bura”.
23 Mamina iya Pedroa enkarra dia karampe jarasi: “Jampeara munembara, Satanás kiranka krinchanumu bura, Daizeze kiranka krinchai kaude, krinchanumu emberara krinchabu kiranka”.
24 Aramaunta Jesúsba iyi kaidubemara jarasi: “Embera abauta mu kaidubema bakirambuburu maun emberambara idubuibara iya kangata obadara akuza mu karea zuburiaita baibara mombe mu kaidu baibara ewari jomaune.
25 Warinubaira embera abauta zarea obuburu bei ẽ baita maun emberara beiyi, mamina yi mu karea iyi bebu diabura maunra bei ẽ bayi.
26 ¿Kare nembiata undui embera abauta beira naun druade nembia erbai karea? mawua ẽ buru, ¿buka nekare bua bu bebu bari diaseabura?
27 Embera Warrara zeyi Daizeze zareaeda akuza iyi kaidu zeyi ángeleranta mombe kãwũã okuayi emberara anya nekare okuadadeba.
28 Warinu kawuapanaidua unkuru maranebemambara bei naweda undudaita Embera Warrara uruta Noko kiranka”.
