Mateoba budata 28:1-20
28 Sábado berabarida tea, nruema diapeda semana jundruburude, María Magdalenaba akuza ababema Maríaba aku wasida Jesús wuaganumuinu.
2 Drua ureta zesi Jeowa ángelta untuba zesi baera, iyira Jesús wuagadapeadaidu jũẽ karampe mongarata ãĩ buretasi, mombe maun mongara ũrũ jeweda chubesi.
3 Maun ángelʼra ba kiranka pure purebarisi akuza iyi wuara jipa totroa chuasi nieve kiranka.
4 Gorogororãrã perabiba ure totosida akuza beida kiranka tadazoatotosida.
5 Ángelba jarasi wuerara: “Peraraindua, mua kawuabu maramba Jesústa jurubarabuta, jari bakurude beadapeadata.
6 Iyira neẽ namara, iya jarada kiranka jenda piradrusi, zeidua, akuidua iyi wuagadapeadamae.
7 Kombe mesera waidua iyi kaidubemara jarade: ’Iyira beidata jenda piradrusi akuza Galileaeda wansi mara na, mama unduyi marambara’. Mura maun jaraeda zesi nama”.
8 Maumba, anyira perakuanasimina mejancha sobiasida, aramaunta mesera wemba wansida jarade iyi kaidupanura.
9 Aramaune Jesúsba anyira ode undusi, mombe jarasi: “Kua”. Aramaunta anyira Jesús na sankokode kupana wansi mombe iyi jiruma burasida.
10 Aramaunta Jesúsba anyaa jarasi: “Peraraindua, waidua mu membera jarade Galileaeda wanamarea, mama yi unduita”.
11 Anyi ode wane, unkuru gorogororanta wansida puwurueda, mama sacerdotera nokora jarasida kare berabaridata.
12 Aramaunta anyira zorarabawara bedea abarika zeda karampe jarasida moneda mejancha diadaita gorogorora.
13 Jarasida: “Naunta jaraidua: ‘Diamasi Jesús kaidubemaramba zeda karampe edesida dai kãĩguenumuena iyi kakuara’.
14 Nokoba maunta kawua zera, karea krincha oira neẽ marara, daiba jara urimbiyi”.
15 Aramaunta gorogororambara jidasida moneda anyaa diadapeadata, mombe aripe osida anyaa omarea jaradapeadade, anya mawua jaradara idi basidu ijampanu judíorambara.
16 Maunena, Jesús kaidu 11 panurãrã wansida Galileaeda katuma Jesúsba anyi yi unduya adama.
17 Iyi undusidade sankokode kupana wansida mamina unkuruba ijana ẽ basi.
18 Jesúsʼra anyi kawa zekarampe jarasi: “Muaa joma diasida untu akuza naun egorode joma zokaita.
19 Maun karea naun drua jomaune jaradia waidua emberara, mu kaidubemara badamarea akuza buru koeidua yi mu Zezea wawia undubipanuta, yi Warra wawia undubipanuta akuza jaure zarea ũrũ ijampanuranta.
20 Anyaa jaradiaidua sawua oita mua mara omarea zokadata akuza kirambeidua marabawara bayi mura, naun druade nekare berabarinumu joma joñiena”.
