Mateoba budata 2:1-23
2 Jesús todapeada tea Belén puwuru Judeade, Jerusalénʼena zesida emberara chindau ũrũ ijampanuranta* anyi puwurudeba,* maun ewaridera Herodesta nokobasi.
2 Mombe chindau ũrũ ijampanuramba naunta widisida: “¿Samachu judíora noko baita todapeadara? Dai badamaemba daiba iyi chindaura undusida baera maun karea zesida iyaa wawia undubidaita”.
3 Maun urinsidadera, noko Herodesʼra akuza Jerusaléne panurãrã bia ẽã totosida.
4 Aramaunta nokobara joma amba juredasi sacerdotera nokoranta akuza puwurude Ley ũrũ jaradiabariranta, mombe widisi sama todaibasita Cristora.
5 Anya nokoa panusida: “Belén puwuru Judeade, mawua jarasi baera profeta abauba:
6 ‘Belén Judá druadebema, Judá druade gobernadorera panuraira wikakiru ẽ bura, budeba zei baera gobernadorta mu puwuru Israel akuita’”.
7 Aramaunta Herodesbara chuwea trʉ̃kuasi chindau ũrũ ijampanuranta mombe widisi sombeda undusidata maun chindaura.
8 Mombe maunra emberara jarasi Belénʼena wanamarea, mombe jarasi: “Waidua maun wũãwũã jurude badumae, maramba undubudade jenda zeidua mua jaraita, musida iyidu wa karampe iya ibia bedeaita”.
9 Maun tea nokoba anyaa jaradata uri karampe wansida. Ode wane anya undusida chindau na undudata, mombe maun chindaura anyi na wambasi, maune piki jirabatotosi wũãwũã chubadamae.
10 Anya chindau undusidade mejancha sobiasida.
11 Anyi deidu jũẽside undusida Maríaba iyi wũãwũãra juwade erbuta, aramaunta sankokode kubepe ibia bedeasida, maune anya nebia apanuta diasida orota, olibanota akuza mirrata.
12 Mamina Daizezeba anyaa kaimokarade jarasi Herodesta aku wana ẽ bamarea maun karea awuru ota jidasida anyi puwurueda wainta.
13 Maunra wana tea Jeowa angelta kaimokarade yi undubisi Joséa maune jarasi: “Mesera piradrura, edera bu kimata akuza wũãwũã zaketa Egiptoeda mua kawua jarayeda mama bara, Herodesba jurui baera wũãwũã zakera beaita”.
14 Mawue Joséba diamasi piradru karampe edesi wũãwũã zaketa akuza yi kimata Egiptoeda.
15 Mama besi Herodes beiyeda mawua Jeowaba iyi profetadeba bedea jarabaridara aripe berabarisi: “Mua trʉ̃si mu wũãwũã zaketa Egiptodeba ãĩ wamarea”.
16 Herodesba unduside chindau ũrũ ijampanuramba iyi sewasita mejancha kĩrũsi, maumba chindau ũrũ ijampanuramba jaradadeba kawuasi wũãwũãra sombe poaga baseabasita, maun karea Beléne akuza maun audubura druade bea zokasi wũãwũãrã poaga umebudeba eda.
17 Mawua aripe berabarisi profeta Jeremíasba jarabaridata, naun bedeata:
18 “Ramá puwurude urinsida nemita, jengabuta akuza so zuburia bedeabuta, maunra Raquelbasi, yi wũãwũãra karea jengabasi, kanga ẽ basi iyi so zarea diadamareara yi wũãwũãranta beisi baera”.
19 Jeowa ángelta Joséa kaimokarade yi undubisi iyi Egiptodebaside, maunera Herodesʼra beisibasi.
20 Ángelba jarasi: “Piradrura, edera bu kimata akuza wũãwũã zaketa Israelʼeda, wũãwũã beakira badarãrã beisida baera”.
21 Aramaunta iyira piradru karampe iyi kimata akuza wũãwũãta edesi Israelʼeda.
22 Iyira perasi Judeaeda wainta, iya urinsi baera Herodes warra Arquelaoba zokabuta yi zezeta neẽ baera. Adewara Daizezeba iyaa kaimokarade jarasi jurakawuabamarea, maun karea iyira Galileaeda wansi.
23 Mombe maunta Nazaret druade besi, mawua aripe berabarisi profetaranemba jaradapeadata, anya naunta jarasida: “Nazareno trʉ̃gadayi”.
