Mateoba budata 13:1-58
-
YIZARA DAIZEZEBA SAWUA ZOKAI ŨRŨ (1-52)
-
Ne ubari (1-9)
-
Karea Jesúsbara yizabara jaradiabasi (10-17)
-
Jara ũrĩbisi ne ubari yizata (18-23)
-
Trigota akuza chirua kayiruata (24-30)
-
Mostaza semillata; pan waribibarita (31-33)
-
Yizabara jaradiabadaba aripe berabaribisi profecíata (34, 35)
-
Jara ũrĩbisi trigo yiza ũrũ akuza chirua kayirua yiza ũrũ (36-43)
-
Oro merabadata akuza perla mejancha valebuta (44-46)
-
Malla beda beabarita (47-50)
-
Nekare kikibari erbuta akuza nekare yiwidi erbuta (51, 52)
-
-
Jesúsʼra iyi druadera bia edada ẽ basi (53-58)
13 Jesúsʼra maun dedauba wana tea, pusa kawa jewedabesi.
2 Jesúsʼra jambade barisi emberaranta iyidu mejancha zesida baera, mawuera maunra emberarãrã do orilla edaunumeasi.
3 Jesúsbara yizadeba nekare mejancha jaradiasi, naunta jarasi: “Uridua naunta, emberanta wansi ne ueda,
4 iyi ne unumune unkuru semillara ewarade baesi, maunta ibanaramba makosida.
5 Unkuru semillata mongara mejanchanumumae baesi, maun ne ura mesera pawarasi, egorora bari ũrũ basi baera.
6 Mamina, maun ne ura karrata bia jida ẽ basi baera, bisia jʉ̃wʉ̃rʉaba bagutotosi.
7 Maune unkuru semillaranta chirua kayiruade eda baesi akuza maun chirua kayirua pawaraburuba waribi ẽ basi semillara.
8 Unkuru semillata egoro biade baesi baera 100 vece audre diasi neta biata akuza 60 adewara 30.
9 Yi kuwuru abubara kirankita uridua”.
10 Maune iyi kaidupanuramba orrada karampe naun bedeata widisida: “¿Karea buara anyara yizaranemba jaradiabu?”.
11 Aramaunta Jesúsba anyaa jarasi: “Daizezeba iya sawua zokai ũrũ wuabemara jara ẽã bura, marara kawuabiseabu mamina kawuabibe ẽ anyara.
12 Embera abauba nekare kawuabuburu iyara audre kawuabidayi akuza ewari berabari wane audre uri wañi iyara, mamina yi nekare kawua ẽã buara, iya wiña nekare kawuabusida jariñi Daizezebara.
13 Maun karea mua jaradiaburudera anyaa jaradiabu yizadeba, anya mua kare obuta akubumina warinubaira urina ẽ, karea mawua obuta. Anya mua jarabuta urimbumina warinubaira uri ẽ karesida jarakirakuta.
14 Mawua aripe berabarisi profeta Isaíasba jarabaridara: ‘Maramba uriñi, mamina bia uri ze ẽ bayi, maramba akuyi mamina undu ẽ bayi.
15 Naunra embera krinchara jipa ananumu, uripanumina oda ẽ maunra, anyi dabura anapanu undu ẽ baita, anyi kuwurusida anapanu uri ẽ baita, maumba kawua ẽ karenta oibarata, maun karea muma jenda zeda ẽ anyira mua endrubita’.
16 “Mamina mara dabuba undubu baera akuza mara kuwuruba urimbu baera, warinu sobiapanu marara.
17 Profetaramba akuza emberara kerempa badaramba undukirambasi maramba idi ewade undubura, mamina unduda ẽ basi akuza maramba idi ewade urimpanura anyabida urikirampanasi, mamina urina ẽ basi.
18 ”Kirankita uridua karenta jarakirambuta embera ne ueda wana yizaba.
19 Embera abauba urinsi Daizezeba sawua zokai ũrũ, mamina bia uri ẽ basi baera Satanásba ãĩ buesi iya urinara, maunta jarakirambu semilla ewarade baedabara.
20 Bu embera maun bedea urinside sobiade ijanata, maunra jari semilla mongara mejanchabu ũrũ baeda kirankabu.
21 Mamina maunta bia karra jida ẽ basi. Maun kirankabu jari embera Daizezeba sawua zokai ũrũ urinata, iya kawuadara audre ẽãne idubutae bedea zroma unduburu karea mawua ẽ buru pewabuda karea.
22 Adewara bu jari chirua kayiruade baeda kiranka buta, maumbara Daizeze Bedeara urimbu. Mamina krincha obu naun druade kare berabaribu karea akuza nembia erbaita krincha obu karea Daizeze Bedeara anaburu kirankabu akuza idu waribi ẽ
23 Semilla jãrĩ egorobiade udapeadabara jarakirambu embera Daizezeba sawua zokai ũrũ urinata akuza kawuasi karenta jarakirambuta maumba. Maumbara 100 vece audre, 60 akuza 30 audre neta biata diada kirankabu”.
24 Maun tea Jesúsba naun yizata jara urimbisi: “Daizezeba sawua zokaira naun kirankabu, embera abauba iyi pegade semilla biata usi.
25 Maune iyi nejurata zekarampe wuabemara kãĩguenumuena chirua kayiruata usi trigode mombe wansi.
26 Yi trigo pawaraside chirua kayiruasida pawarasi abarika.
27 Maune nezokaramba yi ne u yibaria widisida: ‘¿Buara bu pegadera usi ẽka semilla biata? Mawuera, ¿karea chirua kayiruata pawarasi pegadera?’.
28 Yi zokabariba anyaa jarasi: ‘Naunra, yumakera abauba kãwũã osi, nejuramba’. Maun karea iyi nezokaramba widisida: ‘Bua kangaburu daibara ẽĩkuaseabu chirua kayiruara’
29 Iya panusi: ‘Ẽĩkuaraindua, maramba maun chirua kayiruata ẽĩkuadara trigorasida ẽĩkuseabu.
30 Idu anyi umena amba waribidua kuarayeda, kuaraburude mua jarayi yi jurepebarira na enamarea chirua kayiruaranta mombe amba tajʉ̃na karampe tea babuedamarea. Maunare jarayi jurepedamarea trigoranta mawua mu trojade* wuagadamarea’”.
31 Adewara naun yizata jara urimbisi: “Daizezeba zokaira abarikabu embera abauba mostaza semilla zake uda kiranka.
32 Naun mostaza semillara wikakiru wuabemara semillaraira, mamina wariburudera bakuru zroma babu akuza maun bakurude ibanarãrã anyi de oita zepanu”.
33 Akuza yiza aba jarasi: “Embera wueramba pan waribibarita jiraedasi akuza harina neneẽãbuta arabia jiraedasi mombe amba puerasi, mombeburu maun harina neneẽãbura mawua pueraburuba joma oregueasi, maun kirankabu Daizezeba zokaita”.
34 Jesúsba emberara jaradiaburudera yiza neẽãra jaradiakabasi awuaraburu yizadeba jaradiabasi.
35 Mawua aripe berabarisi profetadeba jaradapeadara, iya jarasi: “Muara yizadeba jara urimbiyi, naun drua jundrudadeba* wuabemaramba kawua ẽãbuta”.
36 Iya emberara kabananumua wanamarea jarada tea, deda wansi iyi chuadama, maune iyi kaidupanuramba widisida: “Daia biʼia jara urimbiseabuka karenta jarakirambuta pegade chirua kayirua uda peadabara”.
37 Aramaunta iya jara urimbisi: “Yi embera semilla bia udara Embera Warra.
38 Pegabara jarakirambu emberaranta. Semillabara jarakirambu emberara Daizezeba zokaburude eda bairanta. Waya chirua kayiruabara jarakirambu yi kayirua wũãwũãrata.
39 Nejura maun chirua kayirua udara Satanás. Ne u kuaranumu ewaribara jarakirambu naun druade nekare berabarinumu jointa waya yi ne u jurepebarirambara jarakirambu ángeleranta.
40 Jari chirua kayirua ena karampe amba buratupe babuedabara jarakirambu naun druade nekare berabarinumu sawua joita.
41 Maune Embera Warrabara zokabueyi iyi ángeleranta, Daizezeba zokabudeba ãĩ buemarea jari emberara awurura kayirua obiburanta akuza jari emberara Daizeze Ley wawia ẽãta.
42 Mombe eda ibalbuedamarea tubu mejancha pure purebarimae akuza mama jengadayi akuza kare oi kãwũã ẽ taibayi kĩrũbiba.
43 Mamina maun ewaridera yi kerempaburãrã bisia kiranka unanañi mara Zezeba zokaburude. Yi kuwuru abubara kirankita uridua.
44 ”Daizezeba zokaira naun kirankabu: embera abauba awuru druade oro mejancha undusi, iyara maunra jenda mera karampe sobiaba nendo wansi nekare erbadara mawua maun drua edaita.
45 ”Daizezeba zokaira naun kirankabu: embera abauba perla* mejancha valebuta juru wansi edaita.
46 Iya maun perla undui mesera wansi iya nekare erbada joma nendode mombe edasi maun perlata.
47 ”Daizezeba zokaira malla doeda buedapeada kirankabu, naun mallaba mejancha jidasi beda nekiratana.
48 Malla bedaba biradogode doya erbarisida mombeburu jurepesida beda bia awa, yi zeri ẽãra doi balbuekuasida.
49 Maun kiranka berabariyi naun druade nekare berabarinumu jomburude, ángelera zeburude anya embera kayiruaranemba jampe bueyi yi kerempa panurãrã.
50 Mombe embera kayiruarãrã ibalbuedayi tubu mejancha pure purebaride. Mama jengadayi akuza kare oi kawua ẽ taibayi kĩrũbiba.
51 ”¿Urinsidaka maramba naumba karenta jarakirakuta?” Mawuera iyi kaidupanuramba jarasida: “Urinsida”.
52 Jesúsba anyaa jarasi: “Maramba urinsidaburu, naunta bia kawuapanaidua: Daizezeba sawua zokai ũrũ kawuadata wuabemara jaradiabura, embera iyi deda nekare yiwidi erbuta akuza nekare kikibari erbuta erbaribari kirankabu”.
53 Maunra yiza jaradiada tea Jesúsʼra wansi mamaumbara.
54 Kombeburu Jesús iyi druaidu juenside judíora amba yi jurebarimae* jaradiasi, mombe embera mamabemarãrã yiya aku akudrutotosi, mombe widisida: “¿Kaumbara samaumba unduchu krincha biara akuza sama unduchu iyara zareara kãwũã milagrora oira?
55 ¿Bakuruba nekare parakua trajabu warra ẽka naunra? ¿María ẽka yi papara? ¿Yi memberara Santiago, José, Simón akuza Judas ẽka?
56 Dayirabawara namapanu iyi nawekaurãrã mawuera, ¿sama kawuasi iya kaunra?”.
57 Maumba zarebasi Jesús ũrũ ijanaira mamina Jesúsba jarasi anyaa: “Profetara jomaumae bia edapanu mamina iyi druadera bia edada ẽ mia iyi deda”.
58 Anya ijana ẽ basi baera Jesúsba mejancha oẽ basi milagrora mamara.
Bed’ea biobʉbari
^ Naunra dezake, mama wuagapanu ne u jurepedata.
^ Naumbara jarakirambu baibara Adán akuza Evaumeba wũãwũãra todadeba unta.
^ Maunra borokoa uruyachu, biʼiakiru akuza oro kiranka valechu. Maunra undupanu pusade.
^ Lit. “sinagogas”. Amba yi jurepanasi Daizezea yiwidita akuza Daizeze ũrũ kawuaita.
