Mateoba budata 3:1-17
3 Ewari berabarida tea Juan buru koebibariba jaradia jundrusi Daizeze Bedeata, Judea desiertode.
2 Iya jarasi: “Maramba nemitia obura iduaribidua Daizezeba zokabu ewari zeira arakaita ba baera”.
3 Juan ũrũ profeta Isaíasba naunta jarabarisi: “Desiertode bu embera aba jurabuta, iya jarabu: ‘Jeowa ora jareidua, iyi ora ara oidua’”.
4 Juanbara jumbasi wua camello kara omata akuza kurrude jumbasi neduwuru e omata, iyara auchichita kobasi akuza miel oidebemata kobasi.
5 Iyira emberara Jerusalénebemaramba, Judeadebemaramba akuza Jordánebemaramba aku jũẽpanasi.
6 Juanbara emberarãrã buru koebasi Jordán dode akuza maunra emberarambara anya nemitia obadara, jomaura kirambita jarapanasi.
7 Juanba emberara buru koebuidu jũẽsida fariseoranta akuza saduceoranta, maunta undui Juanba anyaa jarasi: “Damanemba zeburura, ¿kaiba jarasi marara Daizeze kĩrũbidebara endruseabuta?
8 Naara undubidua maramba obudeba warinu idubusidata nemitiara.
9 Mayikuza krincharaindua, ‘daira Abrahánemba zesi’. Daizezeba naunra mongararanemba wũãwũãranta untu zebiseabu baera Abrahánʼita.
10 Atiara zagarara bakuru kawabu, maun bakuru zeri ẽãra tubuedayi akuza tubude eibalbuedayi.
11 Muara yi nemitia oda idubudara buru koebu baniaba, mamina muare zeburura, mejancha zarea barabu. Mura iyi naara kare ẽ kirankabu maumba iya jirune jumbu wẽãisida zeri ẽ, iyara marara jaure zareaba buru koeyi akuza tububa.
12 Iyara trigo bentiabarira iyi juwade erbu akuza iyi trajabumaera kare jaigua neẽã amaeñi, yi trigora iyi trojade wuagayi, mamina yi jora tubu pure purebarimae babueyi”.
13 Maun tea Jesúsʼra Galileadeba Jordánʼinu juensi Juanba buru koemarea.
14 Mamina Juanbara jarasi buru koe ẽ baita adewara jarasi: “Muaburu nesidabu bua buru koemarea munta, ¿sawua bua mua omarea jarai maunta?”.
15 Jesúsba iyaa panusi: “Kãwũã iduaribira mawua aripe berabarimarea Daizezeba jarabaridata”, aramaunta Juanbara iduaribisi.
16 Jesús buru koe karampe, drua wane bajãra ewara ewaradru totosi, maune iya undusi Daizeze jaure zareata paloma kiranka Jesús uru deguewata.
17 Maune bajãnemba nemita urinsida, jarasi: “Naun mu warra mua kangabura, iyara mura sobiabibu”.
