“Taem i Kam Finis”
“Taem i Kam Finis”
“Taem blong hem i kam finis blong hem i aot long wol ya, i gobak long Papa blong hem.”—JON 13:1.
1. ?Taem Pasova blong yia 33 K.T. i stap kam klosap, ol man long Jerusalem oli mekem plante toktok long saed blong wanem, mo from wanem?
TAEM Jisas i baptaes long 29 K.T., hem i stat blong folem wan rod we bambae i lid i go long “taem” blong ded blong hem, taem ya we hem i laef bakegen, mo we God i leftemap hem i go antap. Naoia, hem i long yia 33 K.T., long taem ya we ol tri oli stap putum flaoa. Sam wik nomo i pas, Sanhedrin, hae kot blong ol man Jiu, i bin holem wan miting blong kilim Jisas i ded. Jisas i kasem save plan blong olgeta, mo maet, Nikodimas, wan memba blong Sanhedrin we i bin frengud wetem Jisas, hem nao i talemaot plan ya long Jisas. Taswe, Jisas i aot finis long Jerusalem mo i go stap long ol vilej long narasaed Jodan Reva i go. Nao, taem Lafet blong Pasova i kam klosap, plante man we oli stap long ol ples raonabaot, oli go long Jerusalem, mo long taon ya, ol man oli stap mekem plante toktok long saed blong Jisas. Oli stap asaskem long olgeta se: “?Weswe? ?Jisas bambae i kam long lafet ya, no nogat?” Long taem ya, ol jif pris wetem ol Farisi oli putum wan tok se, sipos wan man i save ples we Jisas i stap long hem, hem i mas kam talemaot long olgeta. Samting ya i mekem se ol man oli wantem moa blong luk Jisas.—Jon 11:47-57.
2. ?Wanem samting we Meri i mekem nao ol narafala oli kros from, mo ansa we Jisas i givim blong sapotem Meri i soem se hem i save wanem long saed blong ‘taem blong Hem’?
2 Long Naesan 8, sikis dei bifo long Pasova, Jisas i gobak finis long ol ples klosap long Jerusalem. Hem i kam long Betani—we i taon blong trifala fren ya blong hem, Mata, Meri, mo Lasaros. Betani i stap samwe long tri kilometa afsaed long Jerusalem. Hemia long Fraede naet, mo Jisas i mekem Sabat dei long ples ya. Long tumora blong hem, long naet, ol disaepol oli tok taem Meri i wasem leg blong Jisas long wan senta we i gat gudfala smel. Jisas i tok long olgeta se: ‘Yufala i livim woman ya. Yufala i no spolem tingting blong hem. Hem i putumgud senta ya i stap blong putum long bodi blong mi long dei ya we bambae oli berem mi long hem. Ol puaman bambae oli stap oltaem wetem yufala, be mi bambae mi no save stap oltaem wetem yufala.’ (Jon 12:1-8; Matiu 26:6-13) Jisas i save se ‘taem i kam finis blong hem i aot long wol ya, i gobak long Papa blong hem.’ (Jon 13:1) Faef dei nomo i stap nao bambae hem i ‘givim laef blong hem blong pem rod blong plante man oli go fri.’ (Mak 10:45) Stat long taem ya i go, hem i luksave we taem blong hem i sot we i sot, mo samting ya i gat paoa long evri samting we hem i mekem mo i tijim. !Hemia i wan nambawan eksampol long yumi taem yumi stap wet long en blong rabis wol ya! Traem luk wanem we i hapen long Jisas long nekis dei.
Kam Long Jerusalem Mo Ol Man Oli Presem Hem
3. (a) ?Olsem wanem Jisas i go insaed long Jerusalem long Sande, Naesan 9, mo plante man oli mekem wanem? (b) ?Jisas i givim wanem ansa long ol Farisi we oli toktok from bigfala hip blong man we i stap folem Jisas?
3 Long Sande, Naesan 9, Jisas i kam long Jerusalem olsem wan man we i winim ol enemi blong hem. Taem hem i kam klosap long taon—i stap raed long wan dongki we i yangfala nomo, we hemia i mekem profet tok blong Sekaraea 9:9 i kamtru—plante man oli hivap raon long hem, oli putum kot blong olgeta long rod, mo samfala oli go katem lif blong tri, oli kam putum long rod. Nao oli stap singaot bigfala se: “Hae God, yu blesem King ya we i kam long nem blong yu.” Nao sam long ol Farisi we oli stap wetem ol man ya, oli wantem we Jisas i tok long ol disaepol blong hem blong oli stap kwaet. Be Jisas i talem se: “Mi mi talem long yufala. Sipos olgeta ya oli stap kwaet, bambae ol ston ya nomo oli save singaot.”—Luk 19:38-40; Matiu 21:6-9.
4. ?From wanem ol man oli mekem plante toktok taem Jisas i go insaed long taon?
4 Sam wik nomo i pas, plante man we oli stap wetem ol man ya, oli bin luk we Jisas i mekem Lasaros i laef bakegen. Mo olgeta oli stap tokbaot merikel ya long ol narafala man. Taswe, taem Jisas i kam insaed long Jerusalem, plante man oli stap mekem plante toktok, oli stap asaskem se, “?Hu man ya?” Nao olgeta ya we oli biaen long Jisas oli stap talem se: “Hemia profet ya we i kamaot long Nasaret, long distrik ya Galili, nem blong hem Jisas.” Nao taem ol Farisi oli luk samting ya, oli stap taltalem long olgeta se: “Naoia, olgeta man evriwan oli biaen long hem.”—Matiu 21:10, 11; Jon 12:17-19.
5. ?Wanem i hapen taem Jisas i go long tempel?
5 Taem Jisas, we i Bigfala Tija, i go insaed long Jerusalem, hem i mekem olsem we hem i stap mekem oltaem. Hem i go insaed long tempel blong tijim ol man. Nao olgeta we oli blaen mo we samting i rong long bodi blong olgeta, oli kam long hem mo hem i mekem olgeta oli gud bakegen. Be, taem ol jif pris mo ol tija blong Loa oli luk samting ya mo oli harem we ol pikinini long tempel oli stap singaot bigfala se, “Hosana long Laen ya blong King Deved,” oli kros tumas. Nao oli talem long Jisas se: “!Ei! ?Yu harem tok ya we oli stap talem?” Nao Jisas i talem se: “Yes, mi mi harem. ?Be ating yufala i no ridim wan tok blong Baebol? Long ples ya wan man i presem God, i talem se, ‘Ol pikinini mo ol smosmol pikinini, be yu yu mekem we olgeta oli save presemgud yu.’” Taem Jisas i stap gohed blong tijim ol man, hem i stap lukluk gud wanem we ol man oli stap mekem long tempel.—Matiu 21:15, 16; Mak 11:11.
6. ?Olsem wanem samting we Jisas i mekem naoia i defren olgeta long wanem we hem i mekem samtaem bifo, mo from wanem?
6 !Samting we Jisas i mekem naoia, i defren olgeta long wanem we hem i mekem sikis manis bifo! Long taem ya bifo, taem hem i go long Jerusalem from Lafet blong ol Wan Saed Haos, “hem i wokbaot haed nomo we ol man oli no luk hem.” (Jon 7:10) Mo oltaem hem i ronwe, i go haed, taem ol man oli wantem kilim hem i ded. !Be naoia, hem i go insaed long taon long fes blong plante man, nating se oli mekem plan blong holem hem! Mo tu, i no fasin blong Jisas blong talemaot hem wan se hem i Mesaea. (Aesea 42:2; Mak 1:40-44) Hem i no wantem we ol man oli singsingaot blong talemaot hem no blong pasem wan giaman nius long saed blong hem i go olbaot. !Be naoia, ol man oli stap talemaot klia se hem i King mo Sevia—Mesaea—mo hem i tok long ol lida blong skul we oli askem hem blong stopem ol man we oli stap singsingaot! ?From wanem tingting blong Jisas i jenis long saed ya? From we, olsem Jisas i talem long nekis dei, ‘taem i kamtru finis blong God i leftemap nem blong mi.’—Jon 12:23.
Strong Aksin—Mo Ol Tijing Blong Sevem Laef
7, 8. ?Olsem wanem ol aksin blong Jisas long Naesan 10, 33 K.T., i soemaot wanem we hem i bin mekem long tempel long Pasova blong 30 K.T.?
7 Taem Jisas i kasem tempel long Mande, Naesan 10, hem i tekem aksin blong stretem wanem we hem i bin luk long aftenun blong dei we i pas. Hem i stat blong “ronemaot ol man we oli stap mekem maket long yad blong haos ya. Hem i kafsaedem ol tebol blong ol man we oli stap jenisim mane, mo ol jea blong olgeta we oli stap salem namwimba. Mo hem i blokem ol man we oli stap karem ol samting, oli pastru long yad blong haos blong God, blong oli no yusum yad ya olsem rod blong olgeta.” Hem i tok long olgeta se: “Yufala i luk. Oli raetem long Baebol we God i talem se, ‘Haos blong mi, bambae ol man oli talem se haos blong prea blong olgeta man blong evri kantri long wol.’ Be yufala i mekem i kam ples blong haed blong ol man blong stil.”—Mak 11:15-17.
8 Aksin we Jisas i tekem, i soemaot wanem we hem i bin mekem tri yia bifo taem hem i go insaed long tempel long Pasova blong yia 30 K.T. Be wanem we hem i mekem long seken taem ya, i strong moa i winim hemia long yia 30 K.T. Naoia, hem i talem se ol man we oli stap mekem bisnes long tempel, oli “ol man blong stil.” (Luk 19:45, 46; Jon 2:13-16) Hemia i from we, taem ol man oli kam blong pem anamol blong mekem sakrefaes, ol bisnesman ya oli stap putum praes i go antap we antap. Nao, taem ol jif pris, ol tija blong Loa, mo ol haeman blong Isrel, oli harem nius blong samting we Jisas i mekem, oli traem lukaot rod bakegen blong kilim hem i ded. Be oli no save mekem from we olgeta man oli sapraes tumas long ol tijing blong hem, mo oli stap biaen long hem from we oli wantem tumas blong harem ol tok blong hem.—Mak 11:18; Luk 19:47, 48.
9. ?Jisas i tijim wanem lesen, mo hem i talem wanem long ol man we oli stap lesin long hem long tempel?
9 Nao, taem Jisas i stap tijim ol man insaed long tempel, hem i talem se: “Taem i kamtru finis blong God i leftemap nem blong mi.” Yes, Jisas i save se laef blong hem long wol ya klosap i kasem en blong hem. I gat sam dei nomo i stap. Afta we Jisas i tokbaot sid blong wit, we man i mas berem fastaem blong i karem frut—we hemia i pija blong ded blong hem mo rod ya blong givim laef we i no save finis long ol narafala—hem i talem long olgeta we oli stap lesin long hem se: “Man we i wantem mekem wok blong mi, hem bambae i biaen long mi. Nao weples we mi bambae mi stap long hem, be man blong wok blong mi, hem tu bambae i stap long ples ya. Mo man we i mekem wok blong mi, bambae Papa blong mi i leftemap nem blong hem.”—Jon 12:23-26.
10. ?Wanem filing blong Jisas long saed blong ded blong hem we i stap kam, we bambae i mekem hem i harem i soa tumas?
10 Fo dei nomo i stap blong Jisas i ded long wan fasin we i mekem hem i harem nogud tumas. Taem Jisas i stap tingting long samting ya, hem i talem se: “Tingting blong mi i hevi tumas. ?Bambae mi save talem olsem wanem? Mi no save talem se, ‘Papa, plis yu no letem ol trabol ya we oli stap kam naoia, oli kasem mi.’” Jisas i no save ronwe long samting ya we i stap kam. Nating se i olsem, hem i talem se: “Mi mi kam long wol ya blong oli kasem mi.” Jisas i agri wetem fulwan plan blong God. Hem i gat strong tingting blong letem wanem we God i wantem i lidim olgeta aksin blong hem go kasem we hem i ded olsem wan sakrefaes. (Jon 12:27) !Hem i soem wan nambawan eksampol long yumi—hem i obei fulwan long evri samting we God i wantem hem blong mekem!
11. ?Wanem ol tijing we Jisas i givim long ol man we oli jes harem wan voes i kamaot long heven?
11 Jisas i wari bigwan long wanem we bambae ded blong hem i karem long nem blong Papa blong hem. Nao from samting ya, hem i prea se: “Papa, plis yu leftemap nem blong yu.” Nao ol man we oli stap long tempel oli sapraes bigwan taem oli harem wan voes i kamaot long heven, i talem se: “Mi mi leftemap nem blong mi finis, mo bambae mi leftemap bakegen.” Jisas we i Bigfala Tija i tekem janis ya blong talemaot long ol man from wanem oli harem voes ya, ol frut blong ded blong hem, mo from wanem oli mas soem bilif. (Jon 12:28-36) Yes, long tufala dei we i jes pas, Jisas i mekem fulap samting. Be wan impoten dei i stap kam klosap.
Taem Blong Talem Ol Strongfala Tok Agens
12. ?Long Tusde, Naesan 11, olsem wanem ol lida blong skul oli traem mekem Jisas i foldaon, mo wanem frut i kamaot?
12 Long Tusde, Naesan 11, Jisas i go insaed long tempel bakegen blong tijim ol man. I gat sam man blong agens tu oli stap. Nao ol jif pris wetem ol elda blong ol laen blong Isrel, oli tok agensem Jisas from samting we hem i bin mekem long dei we i jes pas. Oli askem long hem se: “?Olsem wanem yu stap mekem ol samting ya? ?Hu i givim raet long yu blong mekem olsem?” Man ya we i Nambawan Tija, hem i givim wan ansa we i mekem se oli sem bigwan. Mo hem i talem tri parabol we oli kliagud—tu parabol, hem i long saed blong plantesin blong grep, wan hem i parabol blong lafet blong mared. Trifala parabol ya i soemaot klia se ol enemi ya blong hem, fasin blong olgeta i nogud we i nogud. Ale, ol lida blong skul blong ol man Isrel, oli kros tumas long Jisas from tok we hem i talem, nao oli wantem holem hem. Be oli no holem hem from we oli fraet long ol man we oli bilif se Jisas i wan profet. Nao oli traem faenem rod blong mekem Jisas i foldaon long toktok blong hem, blong oli save holem hem. Be ol ansa we Jisas i givim, i sarem maot blong olgeta wantaem.—Matiu 21:23–22:46.
13. ?Jisas i givim wanem advaes long ol man we oli stap lesin long hem long saed blong ol tija blong Loa mo ol Farisi?
13 Nao, from we ol tija blong Loa mo ol Farisi oli talem se oli man blong tijim Loa blong God, Jisas i talem strong long ol man we oli stap lesin long hem se: “Yufala i mas harem ol tok blong olgeta, mo yufala i mas mekem olgeta samting we oli talem. Be i nogud yufala i folem fasin blong olgeta, from we olgeta oli talem ol samting, be oli no mekem olsem we oli talem.” (Matiu 23:1-3) !Hemia i rili wan strongfala tok agens we Jisas i talem long fored blong plante man! Be i no finis long ples ya. Hemia i laswan dei blong Jisas long tempel, mo wetem strong tingting, hem i tokbaot ol defren samting blong mekem rabis fasin blong ol enemi blong hem i kam long klia ples—hem i tokbaot ol defren samting ya, wan afta narawan.
14, 15. ?Wanem ol strong tok we Jisas i talem agensem ol tija blong Loa mo ol Farisi?
14 Sikis taem, Jisas i talem tok ya se, “Ol tija blong Loa mo ol Farisi. Sore tumas long yufala. Yufala i gat tu fes.” Yes, oli gat tu fes from we, olsem Jisas i talem, oli stap lokem doa blong Kingdom blong heven long fes blong ol man, mo oli stap blokem ol narafala man tu, we oli stap traehad blong go insaed. Ol tu fes ya, oli glad blong wokbaot long sip mo blong go olbaot long ol narafala kantri blong mekem wan man i folem bilif blong olgeta. Be taem oli winim man ya, oli stap mekem hem i folem wan rod we i blong lus nomo. Oli tanem baksaed long “ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes blong hem,” be oli ting hae moa long fasin blong mekem taet. I olsem we oli stap ‘wasem afsaed blong plet mo panikin, be insaed i doti.’ Jisas i minim se, taem man i luk olgeta, hem i ting se oli stret man, be insaed long olgeta, oli fulap long giaman mo ol fasin we i no stret. Mo tu, olgeta ya oli stap lukaot gud long ol gref blong ol profet, mo oli stap flasem ol ston blong pulum ol man blong tinghae long olgeta from wok we oli mekem, be olgeta ‘oli ol pikinini blong ol man we i kilim i ded ol profet.’—Matiu 23:13-15, 23-31.
15 Ol enemi blong Jisas oli no tinghevi nating long ol samting long saed blong spirit. Taswe, Jisas i tok long olgeta se: “Yufala ya, yufala i man blong lidim man, be yufala i blaen. Sore tumas long yufala.” Oli blaen from we oli tinghevi moa long gol blong tempel i winim ol sas samting long saed blong spirit long haos ya blong wosip. Nao Jisas i gohed, i talem wan strong tok long olgeta, we tok ya i strong moa bitim ol narafala strong tok we hem i talem fastaem. Hem i talem se: “!Yufala i olsem snek! !Yufala i olsem pikinini blong snek stret! !Yufala i man blong ronwe nomo! ?Weswe yufala i ting se yufala i save ronwe long panis blong yufala, blong yufala i no go long [“Gehena,” NW]?” Yes, Jisas i wantem soem long olgeta se, from rabis fasin blong olgeta, bambae oli lus blong olwe. (Matiu 23:16-22, 33) I gud we yumi tu, yumi no fraet taem yumi stap talemaot mesej blong Kingdom, nating se yumi mas talemaot ol rabis fasin blong ol giaman skul.
16. ?Taem Jisas mo ol disaepol blong hem oli stap sidaon long Hil blong ol Oliftri, wanem impoten profet tok we Jisas i talem long olgeta?
16 Nao Jisas i goaot bakegen long tempel. Long aftenun, taem ples i stap kam kolkol lelebet, hem i tekem ol aposol blong hem, nao oli go antap long Hil blong ol Oliftri. Taem oli stap sidaon, Jisas i talemaot profet tok long saed blong bigfala trabol we bambae i spolem tempel mo saen blong soem we hem i stap, mo blong makem en blong rabis wol ya. Ol profet tok ya oli gat bigfala mining kam kasem taem blong yumi. Long naet blong hem, Jisas i talem long ol disaepol blong hem se: “Yufala i save, i gat tu dei i stap blong kasem Lafet blong Pasova. Mo long taem ya bambae oli putum mi, mi Pikinini blong Man, mi go long han blong ol man, blong oli nilim mi long [“pos,” NW] blong mi ded.”—Matiu 24:1-14; 26:1, 2.
Jisas i ‘Lavem Ol Man Blong Hem Go Kasem En’
17. (a) ?Long lafet blong Pasova long Naesan 14, Jisas i tijim wanem lesen long ol 12 man blong hem? (b) ?Afta we Jisas i sanemaot Judas Iskariot, hem i stanemap wanem lafet?
17 Long tufala dei we i kam biaen—Naesan 12 mo 13—Jisas i no go insaed long tempel blong tijim ol man. Ol lida blong skul oli wantem kilim hem i ded, mo hem i no wantem wan samting i blokem hem blong selebretem Pasova wetem ol aposol blong hem. Naesan 14 i stat taem san i godaon long Tasde—hemia laswan dei blong Jisas long wol ya. Long naet blong hem, Jisas mo ol aposol blong hem oli kam wanples long wan haos long Jerusalem, hemia ples we bambae oli selebretem Pasova long hem. Taem oli stap mekem Pasova, Jisas i tijim ol 12 man blong hem long wan nambawan lesen long saed blong tingtingdaon, taem hem i wasem leg blong olgeta. Nao afta we hem i sanemaot Judas Iskariot, we i agri blong salem Masta blong hem long 30 pis silva—folem Loa blong Moses, hemia i praes blong wan slef—Jisas i stanemap Memoriol blong ded blong hem.—Eksodas 21:32; Matiu 26:14, 15, 26-29; Jon 13:2-30.
18. ?Wanem ol tijing we Jisas i gohed blong tijim long ol 11 trufala aposol blong hem wetem lav, mo olsem wanem hem i rerem olgeta from taem we bambae hem i no stap, we taem ya i klosap nomo?
18 Afta we oli mekem faswan Memoriol, ol aposol oli rao bigwan from tingting ya se hu nao i hae moa long olgeta. Jisas i no tok strong long olgeta, be wetem longfala tingting, hem i tijim olgeta se i impoten tumas blong mekem wok blong ol narafala. Jisas i savegud se ol aposol oli no bin lego hem long ol hadtaem we hem i kasem, taswe hem i mekem wan kontrak wetem olgeta long saed blong wan kingdom. (Luk 22:24-30) Jisas i talem long olgeta tu se oli mas lavlavem olgeta olsem we hem i lavem olgeta. (Jon 13:34) Jisas i lavem ol man blong hem tumas. Taswe, taem oli stap yet long rum ya, hem i mekem olgeta oli rere from taem ya we bambae hem i no stap, we taem ya i klosap nomo. Hem i talemaot klia long olgeta se hem i lavem olgeta tumas, hem i leftemap tingting blong olgeta blong soem bilif, mo i promes long olgeta se bambae hem i sanem tabu spirit blong i givhan long olgeta. (Jon 14:1-17; 15:15) Ale, bifo we oli aot long haos ya, Jisas i prea long Papa blong hem se: “Papa. Taem blong mi i kamtru finis. Mi mi Pikinini blong yu, mo mi wantem blong yu leftemap nem blong mi, blong mi mi save leftemap nem blong yu.” Yes, Jisas i rerem ol man blong hem finis from taem ya we hem i no stap wetem olgeta, mo i sua se hem i ‘lavem ol man blong hem go kasem en.’—Jon 13:1; 17:1.
19. ?From wanem Jisas i harem nogud tumas long garen blong Getsemane?
19 Maet i medel naet finis taem Jisas mo ol 11 trufala aposol blong hem oli kasem garen blong Getsemane. Plante taem finis hem i go long ples ya wetem ol aposol blong hem. (Jon 18:1, 2) Sam aoa nomo i stap blong Jisas i ded olsem wan man blong brekem loa. Taem Jisas i stap prea, hem i harem nogud tumas taem hem i tingbaot trabol soa we bambae hem i pastru long hem mo wanem we trabol ya i save karem long nem blong Papa blong hem. From samting ya, swet blong hem i stap folfoldaon long graon olsem blad nomo. (Luk 22:41-44) Jisas i talem long ol aposol se: “Taem i kam finis blong man ya i letem mi, mi Pikinini blong Man, mi go long han blong ol man nogud.” Nao taem Jisas i stap toktok yet, Judas Iskariot i kamtru mo i gat wan bigfala kampani blong man oli biaen long hem, we oli karem ol laet, ol naef blong faet, mo ol nalnal. Oli kam blong holem Jisas. Be hem i no traem blong agensem olgeta. Hem i talem se: “?Sipos mi mekem olsem, ol tok ya blong Baebol we i talem se ol samting ya i mas kamtru, bambae i kamtru olsem wanem?”—Mak 14:41-43; Matiu 26:48-54.
!God i Leftemap Pikinini Blong Man!
20. (a) ?Wanem ol nogud samting we ol man oli mekem long Jisas afta we oli holem hem? (b) ?Sam menet nomo bifo we Jisas i ded, from wanem hem i singaot bigwan se: “Olgeta samting i finis nao”?
20 Afta we oli holem Jisas, plante man oli mekem giaman witnes agens long hem, oli jajem hem long rod we i no stret, oli putum hem long han blong Ponjes Paelat, ol pris mo sam stronghed man oli jikim hem, mo biaen ol soldia oli mekem plei long hem mo oli kilim hem i ded. (Mak 14:53-65; 15:1, 15; Jon 19:1-3) Long Fraede aftenun, Jisas i stap hang finis long wan pos. Hem i harem i nogud bitim mak taem hevi blong bodi blong hem i mekem se ol nil oli stap terem mit blong han mo leg blong hem. (Jon 19:17, 18) Samwe long tri klok long aftenun, Jisas i singaot bigfala se: “Olgeta samting i finis nao.” Yes, hem i mekem evri samting we hem i kam long wol blong mekem. Hem i putum laef blong hem long han blong God, nao hed blong hem i godaon mo hem i ded. (Jon 19:28, 30; Matiu 27:45, 46; Luk 23:46) Be, tri dei biaen, Jeova i mekem Pikinini blong hem i laef bakegen. (Mak 16:1-6) Mo foti dei afta we Jisas i laef bakegen, hem i go antap long heven, mo God i givim hae nem long hem.—Jon 17:5; Ol Wok 1:3, 9-12; Filipae 2:8-11.
21. ?Olsem wanem yumi save folem eksampol blong Jisas?
21 ?Olsem wanem yumi save ‘folemgud eksampol blong Jisas’? (1 Pita 2:21) I gud we yumi mekem olsem hem, yumi gohed strong long wok blong talemaot Kingdom mo blong pulum ol man oli kam disaepol. Mo tu, i gud we yumi holem strong tingting, yumi no fraet blong talemaot tok blong God. (Matiu 24:14; 28:19, 20; Ol Wok 4:29-31; Filipae 1:14) Yumi neva mas fogetem taem ya we yumi stap long hem naoia. I gud we yumi gohed blong givgivhan long yumi blong mekem yumi strong moa blong lavem ol man, mo blong mekem ol gudfala fasin. (Mak 13:28-33; Hibrus 10:24, 25) I gud we yumi letem wanem we God i wantem i lidim fulwan laef blong yumi, mo yumi mas luksave se yumi stap laef long “en blong wol ya.”—Daniel 12:4.
?Bambae Yu Yu Ansa Olsem Wanem?
• ?From we Jisas i save se ded blong hem i klosap, samting ya i gat wanem paoa long laswan minista wok blong hem long tempel long Jerusalem?
• ?Wanem i soem se Jisas i ‘lavem ol man blong hem go kasem en’?
• ?Ol samting we oli hapen long ol laswan aoa long laef blong Jisas oli soemaot wanem long saed blong hem?
• ?Olsem wanem yumi save folem eksampol blong Jisas Kraes long minista wok blong yumi?
[Kwestin]
[Tok blong pija long pej 18]
Jisas i ‘lavem ol man blong hem go i kasem en’