Like nga e wla o su’n ti’n maan e di aklunjuɛ
Like nga e wla o su’n ti’n maan e di aklunjuɛ
“[E kwla fa e] wla gua anannganman nguan’n su. Nyanmiɛn b’ɔ bua-man ato’n, kɛ ɔ nian yi-man mɛn’n, ɔ sieli kɛ e nyan nguan sɔ’n.”—TIT 1:2.
?WAFA SƐ YƐ AMÚN TƐ́ SU Ɔ?
?Ngue yɛ maan e si kɛ, kɛ Klist i niaan’m be nun kun nin Ɲanmiɛn be nanti klanman lele ɔ fa wu’n, aklunjuɛ o ɲanmiɛn su lɔ ɔ?
?Like nga be nga bé trán asiɛ’n su wa’n be wla o su’n, wafa sɛ yɛ i su kpɛnlɛ’n nin ‘Nyanmiɛn i mma’m be nglo’n yilɛ’n,’ be kɔ likawlɛ ɔ?
?Sɛ e waan é ɲán like nga e wla o su’n, ngue yɛ é yó m’ɔ kle kɛ e ‘nzuɛn’n ti kpa’ naan e fa e “wun mantan Nyanmiɛn” ɔn?
1. ?Wafa sɛ yɛ like nga Zoova dunman nun e wla o su’n, ɔ uka e naan y’a jran kekle ɔ?
AKOTO PƆLU seli kɛ [“Ɲanmiɛn mɔ maan e wla o like kun su’n,” NW] yɛle Zoova. I sin ɔ kan guali su kɛ Zoova kwla yo ‘maan e klun jɔ, yɛ e di alaje i su bɔ e lafi’n ti naan Nyanmiɛn Wawɛ’n i fanngan nun e nyin [w’a] trɛn i sin tititi.’ (Rɔm. 15:13) Sɛ like nga e wla o su’n ti weiin e akunndan’n nun’n, é kwlá jrán sa nga be tɔ e su’n be ɲrun kekle. Kpɛkun é dí aklunjuɛ yɛ e wun jɔ́ e fɔuun titi. Kɛ sa kekle’m be tɔ e su’n, e ti kɛ mmeli m’ɔ o jenvie’n i afiɛn mɔ aunmuan dan wie su fitɛ i’n sa. Blɛ sɔ’n nun’n, like nga e wla o su’n “ti kɛ mmeli i blalɛ’n bɔ be fa jrɛn i’n sa, ɔ tra ye ase.” (Ebr. 6:18, 19) Sɛ e ɲin tran like nga e wla o su’n i su kpa titi’n, i sɔ’n yó maan e su ‘to fuanman atin’n.’ I sɔ’n úka e naan y’a lafi Ɲanmiɛn su kpa titi yɛ e akunndan’n su yoman nɲɔnnɲɔn.—An kanngan Ebre Mun 2:1 nin Eb 6:11 nun.
2. ?Andɛ’n ngue yɛ Klistfuɛ akpasua nɲɔn’m be tinuntinun be wla o su kɛ bé ɲɛ́n i ɔ? ?Yɛ ngue ti yɛ like nga be nga be kpali be sieli be ngunmin’n be wla o su’n, i ndɛ lo be nga be flɛ be “bua’m be wie” mun ɔn?
2 Mɛn’n i awieliɛ blɛ nga nun’n, ɔ le Klistfuɛ kun nin i like liɛ nga i wla o su ɔ. Yɛle kɛ Klistfuɛ nga be kpali be sieli be ngunmin’n be onga nga be te o asiɛ’n su wa’n mɔ be flɛ be ‘bua akpasua kaan’n,’ be lafi su kɛ bé kó trán nguan nun tititi ɲanmiɛn su lɔ. Naan bé dí famiɛn nin Ɲanmiɛn ɲrun jranfuɛ junman’n Klist i Famiɛn diwlɛ’n nun lɔ. (Lik 12:32; Ngl. 5:9, 10) Yɛ “sran kpanngban kpa” mɔ be flɛ be “bua’m be wie” mun’n, be lafi su kɛ bé trán Mɛsi’n i Famiɛn diwlɛ’n i bo asiɛ’n m’ɔ́ káci mɛn klanman’n, i su tititi. (Ngl. 7:9, 10; Zan 10:16) Ɔ fataman kɛ be nga be flɛ be bua’m be wie mun’n, be wla fi su le kɛ sɛ be waan bé fín nun fíte’n, ɔ ti cinnjin kɛ be suan Klist i “niaan” nga be te o asiɛ’n su wa’n be bo. (Mat. 25:34-40) Be nga be kpali be sieli be ngunmin’n bé ɲán like nga Ɲanmiɛn waan ɔ́ fá mán be’n. Yɛ be nga be flɛ be bua’m be wie mun kusu’n saan be dunman tɛ́ nun wie. (An kanngan Ebre Mun 11:39, 40 nun.) Maan e dun mmua e kan like nga be nga be kpali be sieli be ngunmin’n be wla o su’n i ndɛ.
BE NGA BE KPALI BE’N ‘BE WLA O LIKE BƆ BE SI WEIIN KPA KƐ Ɔ O LƆ’N SU’
3, 4. ?Wafa sɛ yɛ Zoova ‘wuli [Klistfuɛ wie mun] ekun, mɔ maan be wla o like bɔ be si weiin kpa kɛ ɔ o lɔ’n su’ ɔ? ?Like nga be wla o su sɔ’n yɛle benin?
3 Akoto Piɛli klɛli fluwa nɲɔn ko mannin Klistfuɛ nga be kpali be sieli be ngunmin’n. Ɔ flɛli be: “Amun bɔ Nyanmiɛn fali amun.” (1 Piɛ. 1:1) Piɛli i fluwa sɔ’m be nun’n, ɔ yiyili like ɲɛnmɛn kpa nga be nga be flɛ be bua akpasua kaan’n bé ɲɛ́n i’n i nun. I fluwa klikli’n nun’n, ɔ klɛli i kɛ: “E Min Jésus-Krist i Si Nyanmiɛn i kwla o! I aunnvuɛ silɛ dan’n ti, ɔ wuli ye ekun, ɔ maan e wla o like bɔ e si weiin kpa kɛ ɔ o lɔ’n su Jésus-Krist i cɛnlɛ’n ti. Ɔ wuli ye sɔ naan e nyan like kpa ng’ɔ sieli i nyanmiɛn su lɔ’n. Like sɔ’n kwlá saci-man, ɔ yo-man fiɛn, yɛ ɔ mlin-man. Nyanmiɛn b’ɔ kwla like’n kwlaa yo’n ɔ sieli i lɔ sieli amun i su bɔ an lafi’n ti, ɔ́ nían amun su lele amún nyán amun ti, afin w’a dun mmua sie i kɛ mɛn’n i awieliɛ ɔ́ yí amun ti nyanlɛ sɔ’n i nglo. I sɔ’n ti, [...] maan amun klun jɔ.”—1 Piɛ. 1:3-6.
4 Klistfuɛ nga Zoova kpa be kɛ be nin Klist be ko di famiɛn ɲanmiɛn su lɔ’n mɔ b’a sɔnman’n, Zoova ‘wu be ekun.’ Yɛle kɛ ɔ fɛ i wawɛ’n man be maan be kaci i wa, ɔ maan be nin Klist be kwla di famiɛn nin Ɲanmiɛn ɲrun jranfuɛ junman’n ɲanmiɛn su lɔ. (Ngl. 20:6) Kɛ mɔ Ɲanmiɛn ‘wu be ekun’n’ ti’n be ‘wla o like bɔ be si weiin kpa kɛ ɔ o lɔ’n su.’ ?Like nga be wla o su sɔ’n yɛle benin? Piɛli waan bé ɲán anannganman nguan ɲanmiɛn su lɔ naan be su kwlá saciman kun. Nanwlɛ, like ɲɛnmɛn sɔ mɔ be nga be kpali be sieli be ngunmin’n be ɲin o i sin’n ti’n, be di aklunjuɛ dan! Sanngɛ sɛ be nin Ɲanmiɛn be nanti klanman lele guɛ i ti nin i bo’n, yɛ bé ɲɛ́n i sɔ like liɛ’n niɔn.
5, 6. ?Ngue ti yɛ ɔ fata kɛ Klistfuɛ nga be kpali be sieli be ngunmin’n be nin Ɲanmiɛn be nanti klanman titi ɔ?
5 Piɛli i fluwa’n i nɲɔn su’n nun’n, ɔ wlali Klistfuɛ nga be kpali be sieli be ngunmin’n be fanngan kɛ be yo like kwlaa nga be kwla yo’n naan be nin Ɲanmiɛn b’a nanti klanman titi’n. I liɛ’n ɲanmiɛn su lɔ like nga be ɲin o i sin’n bé ɲɛ́n i. (2 Piɛ. 1:10) Ɔ fata kɛ be mian be ɲin kpa be yi nzuɛn wie’m be nglo. Yɛle kɛ maan be lafi Ɲanmiɛn su, be fa be wun mɛntɛn i, be yo be niaan’m be kpa yɛ be klo sran. Piɛli seli kɛ: “Nanwlɛ, sɛ an nian sa sɔ’m be su bɔ an yo be titi’n, kɛ an kunndɛ kɛ amún sí e Min Jésus-Krist, saan amún sí i, afin an su tran-man lɛ ngbɛn, yɛ like nga an yo’n ɔ́ yó ye.”—An kanngan 2 Piɛr 1:5-8 nun.
6 Klist seli asɔnun kpɛnngbɛn nga be kpali be sieli be ngunmin mɔ be o Filadɛlfi asɔnun’n m’ɔ o Azi Minɛli lɔ’n nun’n, be kɛ: “An fa ndɛ bɔ n kan kleli amun kɛ an tra amun anwlɛn’n su. Ɔ maan kɛ sa kekle tɔ́ mɛn wunmuan’n su sran’m be kwlaa be sa nianlɛ’n ti’n, n kusu ń sásá amun. Ḿ bá icra’n. Like ng’ɔ o amun sa nun’n, an trɛ i kekle naan sran wie a fa-man like nga ń fá yó amun mo’n.” (Ngl. 3:10, 11) Be seli be nga be kpali be sieli be ngunmin’n be kɛ sɛ b’a kpɔciman Ɲanmiɛn lele be fa wu’n, bé ‘yó be mo, [yɛ] dunman nga bé nyɛ́n i’n, ɔ su wie-man mlɔnmlɔn.’ Sanngɛ sɛ be nun kun kpɔci Ɲanmiɛn’n, ɔ su ɲɛnmɛn i sɔ like liɛ’n.—1 Piɛ. 5:4; Ngl. 2:10.
BÉ ƝÁN FAMIƐN DIWLƐ’N I NUN WLUWLƐ KPA
7. ?Like ɲɛnmɛn kpa benin yɛ Klistfuɛ wie’m be wla o su mɔ Zidi kɛnnin i ndɛ ɔ?
7 Afuɛ nga be flɛ i 65 i nvɛnwun lɛ’n, Zezi i nian bian Zidi klɛli fluwa kun ko mannin Klistfuɛ nga be kpali be sieli be ngunmin’n. Ɔ flɛli be kɛ: “Amun bɔ e Si Nyanmiɛn flɛli amun’n.” (Zid 1; an nian Ebre Mun 3:1.) I klikli nun’n, Klistfuɛ nga be kpali be sieli be ngunmin’n, be ti mɔ be kwlaa be wla o su kɛ bé ɲɛ́n i’n, i ndɛ yɛ i waan ɔ́ kán ɔn. (Zid 3) Sanngɛ ɔ wunnin kɛ ɔ fata kɛ ɔ kan sa cinnjin uflɛ wie’m be ndɛ. Kannzɛ ɔ yoli sɔ’n, i fluwa kpe kan sɔ’n i atabo’n nun’n ɔ kannin like ɲɛnmɛn kpa nga Klistfuɛ sɔ’m be wla o su’n i ndɛ. Ɔ klɛli i kɛ: “Nyanmiɛn b’ɔ kwla nian amun su b’ɔ maan an fɔn-man’n, bɔ kɛ ɔ maan amún kɔ́ i wun lɔ’n sa kaan sa bɔn-man amun wun’n, yɛ amun klun jɔ́’n, e Nyanmiɛn kunngba b’ɔ ti e Defuɛ’n, e Min Jésus-Krist ti, maan be yi i ayɛ, be mɛnmɛn i yɛlɛ kɛ ɔ ti famiɛn, ɔ ti kpli, yɛ ɔ kwla sa’n kwlaa yo. Kɛ ɔ fin lalaa’n, be mɛnmɛn i sɔ, kɛ ɔ fin ndɛ’n maan be mɛnmɛn i tititi.”—Zid 24, 25.
8. ?Ngue yɛ maan e si kɛ, kɛ Klist i niaan’m be nun kun nin Ɲanmiɛn be nanti klanman lele ɔ fa wu’n, aklunjuɛ o ɲanmiɛn su lɔ ɔ?
8 Klistfuɛ nga be kpali be sieli be ngunmin mɔ be nin Ɲanmiɛn be nanti klanman’n be kunndɛ kɛ Ɲanmiɛn sasa be, kɛ ɔ ko yo naan b’a fɔnman naan i agualiɛ su’n b’a nunnun be’n ti. Be wla o su kɛ sɛ be wu’n, Zezi Klist cɛ́n be naan bé káci aolia nun sran yɛ fɔ su tranman be nun. I sɔ’n yó maan bé kwlá kɔ́ kan Ɲanmiɛn o lɔ’n. Kɛ be nga be kpali be sɔ’n be nun kun kpɔciman Ɲanmiɛn lele ɔ fa wu’n, ɔ ti weiin kɛ Zezi cɛ́n i nin “aolia nun wunnɛn.” Kpɛkun kɛ ɔ ko cɛn i’n, “ɔ kwlá kplɔ-man kun” yɛ “ɔ lɛ nyrun.” (1 Kor. 15:42-44) Kɛ sa tɛ yofuɛ kun kaci i nzuɛn’n, ɲanmiɛn su lɔfuɛ’m ‘be klun jɔ sa tɛ yofuɛ sɔ’n ti.’ Sɛ ɔ ti sɔ’n niɔn, kɛ Klist i niaan nga be kpali be sieli be ngunmin’n be nun kun nin Ɲanmiɛn be nanti klanman lele ɔ fa wu’n, aklunjuɛ nga be di i lɔ’n maan e bu i akunndan kan e nian. (Lik 15:7) Kɛ be nga be kpali be sieli be ngunmin’n be ɲan like nga be wla o su’n be ‘klun jɔ.’ I sɔ aklunjuɛ liɛ’n Zoova nin aolia nun sran seiinfuɛ mɔ be nin i be o lɔ’n be di wie.—An kanngan 1 Zan 3:2 nun.
9. ?Kɛ Piɛli seli kɛ Klistfuɛ nga be kpali be sieli be ngunmin’n mɔ be nanti seiin’n bé ɲán Klist i Famiɛn diwlɛ’n ‘i nun wluwlɛ kpa’n,’ ngue ndɛ yɛ i waan ɔ́ kán ɔn? ?Be wla m’ɔ o like sɔ’n su’n ti’n wafa sɛ yɛ be nanti ɔ?
9 Sɛ be nga be kpali be sieli be ngunmin’n b’a kpɔciman Ɲanmiɛn’n like nga bé ɲɛ́n i’n, Piɛli kɛnnin i ndɛ kɛ Zidi fa yoli’n sa. Ɔ klɛli be fluwa seli kɛ: “Amún wá ɲán e Min ɔ nin e Defuɛ Zezi Klist i anannganman famiɛn diwlɛ’n i nun wluwlɛ kpa.” (2 Piɛ. 1:10, 11, Anuãsɛ Fuflɛ) Kɛ Piɛli seli kɛ bé ɲán Klist i famiɛn diwlɛ’n ‘i nun wluwlɛ kpa’n,’ ɔ kwla yo kɛ aɲrunɲan dan mɔ bé fá wlú ɲanmiɛn su lɔ’n i ndɛ yɛ ɔ su kan ɔn. Atrɛkpa kusu’n, ninnge kpakpa kpanngban nga bé ɲɛ́n i lɔ’n i ndɛ yɛ ɔ kan ɔn. Kɛ bé wá bú wafa nga be nantili seiin lele guɛli i ti nin i bo’n i akunndan’n, aklunjuɛ nga bé dí’n su yoman aɔwi. I kwlaa sɔ mɔ Klistfuɛ nga be kpali be sieli be ngunmin’n be wla o su’n ti’n, kɛ be te o asiɛ’n su wa’n be ɲan fanngan be nanti seiin titi.—1 Piɛ. 1:13.
LIKE NGA BUA WIE MUN ‘BE WLA O SU’N’
10, 11. (a) ?Ngue yɛ bua’m be wie mun be wla o su ɔ? (b) ?Like nga be nga bé trán asiɛ’n su wa’n be wla o su’n, wafa sɛ yɛ i su kpɛnlɛ’n nin Klist yɛ ‘Nyanmiɛn i mma’m be nglo’n yilɛ’n,’ be kɔ likawlɛ ɔ?
10 ‘Nyanmiɛn i mma’m’ m’ɔ kpali be sieli be ngunmin’n be wla o su kɛ like nga Ɲanmiɛn waan ‘ɔ́ fá mán Krist’n, bé bó be dunman nun wie.’ Akoto Pɔlu klɛli aɲrunɲan like sɔ’n i su fluwa ko mannin be. I sin’n, like ɲɛnmɛn nga Ɲanmiɛn maan bua’m be wie mun mɔ be siman be nuan’n be wla o su’n, ɔ kɛnnin i ndɛ. Ɔ seli kɛ: “Like nga Nyanmiɛn yili be’n, be kwlaa be wun blibli be, yɛ be minndɛ cɛn nga Nyanmiɛn wá yí i mma’m be nglo’n. Afin like ng’ɔ yili be’n, ɔ sieli be kwlaa be kɛ be saci. Be sacilɛ sɔ’n fin-man be bɔbɔ, ɔ fin i b’ɔ sieli be sɔ’n. Sanngɛ be wla tɛ o i su, yɛlɛ kɛ cɛn kun like sɔ’m be kwlaa bé nyán be ti, be su saci-man kun, yɛ nyrun nga Nyanmiɛn mma’m bé nyɛ́n i cɛn nga bé nyán alaje’n, be dunman’n tɛ́ nun wie.”—Rɔm. 8:14-21.
11 Zoova tali klɔ sran’m be nda kɛ ɔ́ sín “osu” ng’ɔ kɛnnin i ndɛ’n i lika ɔ́ dé be mmusu’m be si Satan sa nun. Ɔ maan be ɲannin like kun mɔ be kwla fa be “wla” gua su ɔ. (Bob. 3:15; Ngl. 12:9) “Osu’n” i nun sran cinnjin kpafuɛ’n yɛle Zezi Klist. (Gal. 3:16) Kɛ mɔ Zezi wuli m’ɔ cɛnnin’n ti’n, klɔ sran’m be wla o su kɛ bé ɲán be ti sa tɛ’n nin wie’n be sa nun. Blɛ nga “Nyanmiɛn wá yí i mma’m be nglo’n,” yɛ like sɔ mɔ be wla o su’n i su kpɛnlɛ’n bó i bo ɔ. Klistfuɛ nga b’a ɔ ɲanmiɛn su’n, be yɛ be ti osu’n i nun sran onga mun ɔn. Blɛ nga be nin Klist bé núnnún Satan i mɛn tɛ nga’n i nun yɛ ‘Nyanmiɛn yí be nglo’ ɔ. (Ngl. 2:26, 27) I sɔ’n yó maan bua’m be wie mun mɔ be fin afɛ dan nun’n bé ɲán be ti.—Ngl. 7:9, 10, 14.
12. ?Be nga be kpali be sieli be ngunmin’n be nglo yilɛ’n i su ye dan benin yɛ klɔ sran’m bé ɲɛ́n i ɔ?
12 Nanwlɛ, Klist Afuɛ Akpi Famiɛn Dilɛ Blɛ’n nun’n, klɔ sran’m bé wá ɲán be ti o! Blɛ sɔ’n nun’n, Ɲanmiɛn wá yí ‘i mma’m be nglo’ wafa uflɛ. Yɛle kɛ be nin Klist bé dí Ɲanmiɛn ɲrun jranfuɛ junman yɛ bé yó maan klɔ sran’m bé ɲán Klist i tɛ’n i su ye. Kɛ Ɲanmiɛn Sielɛ’n síe asiɛ’n klɔ sran nga be ɲin yi Ɲanmiɛn’n blɛblɛblɛ “bé nyán be ti, be su saci-man kun.” Sa nga wie’n nin sa tɛ’n be fa yi be su’n bé ɲán be ti i kwlaa sɔ’n nun. Afuɛ akpi sɔ’n nun ɔ nin sran’m be sa nianlɛ kasiɛn’n nun’n, sɛ b’a kpɔciman Zoova’n, bé klɛ́ be dunman “nguan fluwa” nun. Ɔ́ ká nun tititi. Kpɛkun “nyrun nga Nyanmiɛn mma’m bé nyɛ́n i cɛn nga bé nyán alaje’n, be dunman’n tɛ́ nun wie.” (Ngl. 20:7, 8, 11, 12) Nanwlɛ, like sɔ mɔ sran’m be wla o su’n, ɔ yo ɲɛnmɛn sakpa!
MAAN LIKE NGA E WLA O SU’N YO WEIIN E AKUNNDAN’N NUN TITI
13. ?Ngue yɛ maan e le like mɔ e fa e wla gua su ɔ? ?Blɛ benin nun yɛ Klist yí i wun nglo ɔ?
13 Piɛli i fluwa nɲɔn ng’ɔ klɛli be’n, be uka be nga be kpali be sieli be ngunmin’n nin bua’m be wie mun be kpa naan like nga be wla o su’n, w’a yo weiin be akunndan’n nun. Ɔ yiyi nun kɛ nán ninnge nga be bɔbɔ be yoli’n ti yɛ maan be le like mɔ be fa be wla gua su ɔ. Sanngɛ Zoova i aklunye dan’n ti ɔ. Ɔ klɛli i kɛ: “An nian amun wun su, maan amun nyin tran like nga cɛn nga Jésus-Krist ɔ́ wá yí i wun nglo’n ɔ́ fá mán amun’n su kpa.” (1 Piɛ. 1:13) Blɛ nga Klist bá m’ɔ́ wá yó i sɔnnzɔnfuɛ kpa’m be mo’n, m’ɔ́ núnnún klunwifuɛ mun’n, i nun yɛ ɔ́ yí i wun nglo ɔ.—An kanngan 2 Tɛsalonikfuɛ Mun 1:6-10 nun.
14, 15. (a) ?Ngue yɛ ɔ fata kɛ e yo naan like nga e wla o su’n w’a yo weiin e akunndan’n nun titi ɔ? (b) ?Afɔtuɛ benin yɛ Piɛli mannin e ɔ?
14 Sɛ e kunndɛ kɛ like nga e wla o su’n yo weiin e akunndan’n nun titi’n, ɔ fata kɛ ɔ tran e klun titi kɛ “Nyanmiɛn i cɛn’n” w’a wie ju. Maan be wun i sɔ liɛ’n like kwlaa nga é yó’n nun. Cɛn sɔ’n nun’n, Zoova núnnún “nyanmiɛn su lɔ’n” m’ɔ ti klɔ sran’m be famiɛn diwlɛ’m be nzɔliɛ’n, ɔ nin “asiɛ’n” m’ɔ ti klɔ sran klunwifuɛ’m be kwlaa be nzɔliɛ’n. Piɛli klɛli i kɛ: “?Sɛ ninnge sɔ’n kwlaa bé sáci sɔ’n, like onin yɛ sɛ an yo-ɔ ɔ ti su-ɔ? [...] Kɛ amún mínndɛ kɛ Nyanmiɛn i cɛn’n ju’n, an yo like kwlaa nga an kwla yo’n maan ɔ ju ndɛndɛ. Cɛn sɔ’n nun nyanmiɛn su lɔ’n ɔ́ yrá, yɛ nyanmiɛn su lɔ ninnge’m bé kló.”—2 Piɛ. 3:10-12.
15 Ɲanmiɛn wá yó maan “nyanmiɛn su lɔ nin asiɛ uflɛ” bé káci laa liɛ mun. Yɛle kɛ klɔ sran’m be famiɛn diwlɛ mun nin klunwifuɛ mun bé núnnún, kpɛkun Klist i famiɛn diwlɛ’n nin sran kpa nga bé trán asiɛ’n su wa’n, bé sín be osu. (2 Piɛ. 3:13) Like nga e ko yo naan y’a tran titi y’a ‘minndɛ’n,’ yɛle kɛ e wla w’a tran asiɛ nin ɲanmiɛn su lɔ uflɛ’n be su titi’n, Piɛli kɛnnin i ndɛ weiin kleli e. Ɔ seli Kɛ: “N sran kpa mun, i sɔ’n ti, kɛ é mínndɛ cɛn sɔ’n, an yo like kwlaa nga an kwla yo’n naan w’a wun kɛ an ti sran kpa bɔ sa kaan sa nun-man amun wun naan amun nin i amun nuan a sɛ.”—2 Piɛ. 3:14.
MAAN E YO LIKE NGA E WLA O SU’N I NUAN SU SA
16, 17. (a) ?Ngue yɛ e kwla yo naan y’a kle kɛ e ‘nzuɛn’n ti kpa’ naan kusu e fa e “wun mantan Nyanmiɛn” ɔn? (b) ?É yó sɛ naan y’a ɲan like nga e wla o su’n?
16 Ɔ fata kɛ e aeliɛ kle kɛ like nga e wla o su’n ti weiin e akunndan’n nun titi. Kɛ nga Piɛli fa kannin’n sa’n, ɔ fata kɛ e yo sran i wafa nga Zoova i klun jɔ i wun’n. Kɛ Piɛli se kɛ maan e ‘nzuɛn’n yo kpa’n’ i wie yɛle kɛ maan e “yo sa ng’ɔ ti kpa’n be nga be ti-man Kristfuɛ’n be nyrun.” I sɔ nun’n, maan e yo like nga Zoova ɲrun’n ɔ ti kpa’n. (2 Piɛ. 3:11; 1 Piɛ. 2:12) Ɔ fata kɛ e klo e niaan nga be o mɛn wunmuan’n nun’n be kwlaa. I wie yɛle kɛ maan e yo like kwlaa nga e kwla yo naan e nin e niaan nga e o asɔnun’n nun’n e bo w’a yo kun titi. (Zan 13:35) Piɛli kannin ekun kɛ maan e fa e “wun mantan Nyanmiɛn.” I bo’n yɛle kɛ e yo ninnge nga mɔ maan e nin Zoova e janvuɛ’n trá kpa titi’n. Be nun wie yɛle be klun mɔ be tu be srɛ Ɲanmiɛn’n, nin Biblu’n nun kannganlɛ cɛn kwlaa’n, nin Biblu’n nun like nga be nian nun be suɛn i kpa’n, ɔ nin ‘Nyanmiɛn sielɛ’n i jasin fɛ’n’ i bolɛ titi’n.—Mat. 24:14.
17 Kɛ Zoova wá núnnún mɛn tɛ nga’n, ɔ́ dé be nga i klun jɔ be wun’n. E tinuntinun e kunndɛ kɛ é trɛ́n i sɔfuɛ’m be nun wie. Sɛ e o be nun wie’n é ɲán like nga e wla o su’n. Yɛle kɛ é ɲán “anannganman nguan’n” mɔ “Nyanmiɛn b’ɔ bua-man ato’n, kɛ ɔ nian yi-man mɛn’n, ɔ sieli kɛ” e ɲɛn i’n.—Tit 1:2.
[Kosan mun]
[Foto, bue 22]
Be ‘wuli [be nga be kpali be sieli be ngunmin’n mun] ekun, ɔ maan be wla o like bɔ be si weiin kpa kɛ ɔ o lɔ’n su.’
[Foto, bue 24]
Like nga e nin e awlobofuɛ mun e wla o su’n maan e yo naan ɔ yo weiin e akunndan’n nun lɔ titi.
