LIKE SUANLƐ 36
Sa kwlaa nun’n maan e yo nanwlɛfuɛ
Sran kwlaa kunndɛ kɛ ɔ́ trá sran ng’ɔ ti nanwlɛfuɛ’n i janvuɛ. Zoova kunndɛ kɛ i janvuɛ’m be yo nanwlɛfuɛ wie. Sanngɛ kɛ mɔ sran’m be dan lika be diman nanwlɛ’n ti’n, i sɔ yolɛ’n timan pɔpɔ. ?Sɛ sa kwlaa nun e yo nanwlɛfuɛ’n, i su ye benin yɛ é ɲɛ́n i-ɔ?
1. ?Ngue ti yɛ ɔ ti cinnjin kɛ e yo nanwlɛfuɛ-ɔ?
Kɛ e ti nanwlɛfuɛ’n e kle Zoova kɛ e klo i naan e ɲin yi i. Zoova si akunndan kwlaa nga e bu’n, ɔ nin like kwlaa nga e yo’n. (Ebre Mun 4:13) Kɛ ɔ wun kɛ e di nanwlɛ’n i sɔ’n yo i fɛ. Biblu mɔ ti i nuan ndɛ’n se kɛ: “Zoova i ɲin ci sran ng’ɔ fa gblɛ nanti’n, sanngɛ ɔ tra sran ng’ɔ nanti ndɛnman su’n i janvuɛ.”—Ɲanndra Mun 3:32.
2. ?Wafa sɛ yɛ e kwla kle kɛ e ti nanwlɛfuɛ-ɔ?
Zoova kunndɛ kɛ ‘e kan ndɛ nanwlɛ e kle e wiengu.’ (Zakari 8:16, 17) ?Wafa sɛ yɛ e nanti ndɛ sɔ’n su-ɔ? Sɛ ɔ wie e awlo lɔ-o, annzɛ e junman su lɔ-o, annzɛ e nin e niaan Klisifuɛ mun e afiɛn-o, annzɛ awa i janunfuɛ’m be ɲrun-o, e su buaman ato. Sran ng’ɔ ti nanwlɛfuɛ’n ɔ wuɛmɛn i wiengu mun, annzɛ ɔ buman be lufle. (Kanngan Ɲanndra Mun 24:28 nin Efɛzifuɛ Mun 4:28 nun.) Asa’n, ɔ tua lapo kwlaa ng’ɔ fata kɛ ɔ tua’n. (Rɔmunfuɛ Mun 13:5-7) Nanwlɛ “e klo kɛ é yó nanwlɛfuɛ sa kwlaa nun.”—Ebre Mun 13:18.
3. ?Kɛ e ti nanwlɛfuɛ’n i su ye benin yɛ e ɲɛn i-ɔ?
Sɛ e wiengu’m be sie i nzɔliɛ kɛ e ti nanwlɛfuɛ’n bé láfi e su. Asa’n, kɛ e yo sɔ’n asɔnun nunfuɛ’m be lafi be wiengu su, yɛ be yo kɛ awlobo kun nunfuɛ mun sa. Yɛ e akunndan’n buman e fɔ. Asa’n, kɛ e ti nanwlɛfuɛ’n, sran’m be wun kɛ “e Defuɛ Ɲanmiɛn i ndɛ ng’ɔ kle’n, ɔ yo ɲɛnmɛn.”—Titi 2:10.
SI NDƐ’N NUN KPA EKUN
Kɛ sran kun ti nanwlɛfuɛ’n i su ye ng’ɔ ɲɛn i’n, ɔ nin wafa nga i sɔ’n yo Zoova’n é wá kɛ́n i ndɛ. Kpɛkun é wá kán wafa nga sa wie’m be nun’n, a kwla kle kɛ a ti nanwlɛfuɛ’n i ndɛ wie.
4. Zoova klo be nga be ti nanwlɛfuɛ’n
An kanngan Jue Mun 44:21 nin Malasi 3:16 nun. I sin’n, an koko kosan yɛ’m be su yalɛ:
-
?Ngue ti yɛ a bu i kɛ sɛ e bua ato’n i sɔ’n timan ngwlɛlɛ ayeliɛ-ɔ?
-
?Kannzɛ bɔbɔ nanwlɛ dilɛ’n timan pɔpɔ blɛ wie nun’n, kɛ e mian e ɲin e di nanwlɛ’n, wafa sɛ yɛ i sɔ’n yo Zoova-ɔ?
Kɛ ba kanngan’m be di nanwlɛ’n ɔ yo be si nin be nin’m be fɛ, e kusu kɛ e di nanwlɛ’n ɔ yo Zoova i fɛ wie.
5. Maan e di nanwlɛ blɛ kwlaa nun
Sran wie’m be bu i kɛ nán blɛ kwlaa nun yɛ ɔ fata kɛ e di nanwlɛ-ɔ. Sanngɛ nian like nga ti yɛ i sɔ yolɛ’n ti cinnjin’n. An bo VIDEO’N.
An kanngan Ebre Mun 13:18 nun. I sin’n, an koko kosan yɛ’n i su yalɛ. ?Wafa sɛ yɛ e kwla kle kɛ e ti nanwlɛfuɛ-ɔ?
-
Awlo lɔ.
-
Junman su lɔ annzɛ suklu lɔ.
-
Sa uflɛ wie’m be nun.
6. Kɛ e ti nanwlɛfuɛ’n e ɲan su ye
Wie liɛ’n, kɛ e di nanwlɛ’n i sɔ’n kpɛ ndɛ man e. Sanngɛ kɛ ɔ́ kɔ́ i ɲrun’n e wun kɛ i sɔ yolɛ’n yɛ ɔ ti kpa-ɔ. An kanngan Jue Mun 34:12-16 nun. I sin’n, an koko kosan yɛ’n i su yalɛ:
-
?Sɛ a ti nanwlɛfuɛ’n i su ye benin yɛ á ɲɛ́n i-ɔ?
-
Yasua nin bla nga be ti nanwlɛfuɛ’n be aja’n taka kpa.
-
Junman difuɛ nga be ti nanwlɛfuɛ’n be junman su kpɛn’m be lafi be su.
-
Sran ng’ɔ ti nanwlɛfuɛ’n ɔ nin awa i janunfuɛ’m be kanman ndɛnngan.
SRAN WIE’M BE WAAN: “Ato kanngan nga e bua be’n be timan tɛ sɔ liɛ.”
-
?Ngue yɛ ɔ kle ɔ kɛ ato bualɛ kwlaa ti tɛ Zoova ɲrun-ɔn?
NDƐ’N I KPƆLƐ BOLƐ
Zoova kunndɛ kɛ i janvuɛ’m be yo nanwlɛfuɛ ndɛ kwlaa nga be kan’n nun, ɔ nin like kwlaa nga be yo’n nun.
Ndɛ’n i nun flanlɛ
-
?Ninnge benin wie’m be nun yɛ a kwla kle kɛ a ti nanwlɛfuɛ-ɔ?
-
?Ngue ti yɛ sɛ e bua ato’n i sɔ’n timan ngwlɛlɛ ayeliɛ-ɔ?
-
?Ngue ti yɛ a kunndɛ kɛ á yó nanwlɛfuɛ blɛ kwlaa nun-ɔn?
NDƐ WIE MUN EKUN
?Wafa sɛ yɛ siɛ nin niɛn’m be kwla uka be mma mun naan b’a yo nanwlɛfuɛ-ɔ?
?Kɛ e di ndɛ nga e kan’n su’n, i su ye benin yɛ e ɲɛn i-ɔ?
?Kannzɛ bɔbɔ kɛ e tua lapo’n be fa yoman like kpa’n, sanngɛ ngue ti yɛ ɔ ti cinnjin kɛ e tua-ɔ?
“?Ɔ fata kɛ e tua lapo?” (Sasafuɛ Tranwlɛ’n nun ndɛ)
Like ng’ɔ ukali bian kun naan w’a yo nanwlɛfuɛ’n.
“N wunnin i wlɛ kɛ Zoova si aunnvɔɛ yɛ ɔ yaci sa cɛ” (Sasafuɛ Tranwlɛ’n nun ndɛ)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
