LIKE SUANLƐ 17
?Sran wafa benin yɛ Zezi ti-ɔ?
Kɛ e fa e ɲin e sie i ndɛ nga Zezi kannin ɔ nin ninnge ng’ɔ yoli be’n be su’n, i sɔ’n yo maan e kwla fa e wun e mɛntɛn i, yɛ e si i Si Zoova kpa. ?Nzuɛn benin yɛ Zezi yili i nglo-ɔ? ?Wafa sɛ yɛ e kwla nian Zezi i ayeliɛ’n su-ɔ?
1. ?Ngue ti yɛ e kwla se kɛ Zezi ti kɛ i Si sa-ɔ?
Blɛ mɔ Zezi o ɲanmiɛn su lɔ’n, ɔ fɛli i ɲin sieli i i Si i nzuɛn’n su afuɛ miliaa kpanngban kpa. Ɔ maan ɔ bu akunndan kunngba nga i Si’n bu’n wie, yɛ ɔ yo ninnge mun kɛ i sa. (Kanngan Zan 5:19 nun.) Kɛ mɔ Zezi nin i Si be nzuɛn’n ti kun’n ti’n ɔ seli kɛ: “Sran ng’ɔ wun min’n, nn w’a wun Siɛ’n wie.” (Zan 14:9) Sɛ a suan Zezi i su like’n á sí Zoova kpa. I wie yɛle kɛ wafa nga Zezi sili sran’m be aunnvɔɛ’n ɔ kle kɛ sran’m be ndɛ lo Zoova.
2. ?Wafa sɛ yɛ Zezi kleli kɛ ɔ klo Zoova-ɔ?
Zezi seli kɛ: “Kɛ ɔ ko yo naan mɛn’n nunfuɛ’m b’a si kɛ n klo Siɛ’n ti’n, like nga Siɛ’n seli min kɛ n yo’n, yɛ n nian su n yo-ɔ.” (Zan 14:31) I nun mɔ Zezi o asiɛ’n su wa’n, ɔ kleli kɛ ɔ klo i Si dan. Yɛle kɛ kannzɛ lika’n yoli kekle i su bɔbɔ’n ɔ nantili Ɲanmiɛn i mmla’m be su titi. Asa ekun’n, kɛ mɔ Zezi klo i Si’n ti’n ɔ kɛnnin i ndɛ, yɛ ɔ ukali sran mun naan be nin i be tra janvuɛ.—Zan 14:23.
3. ?Wafa sɛ yɛ Zezi kleli kɛ ɔ klo sran-ɔn?
Biblu’n se kɛ Zezi kloli ‘klɔ sran’m be sa kpa.’ (Ɲanndra Mun 8:31) I sɔ’n ti’n, ɔ wlali sran’m be fanngan yɛ ɔ ukali be i klunklo su. Abonuan sa ng’ɔ yoli be’n, be kle kɛ ɔ le tinmin. Sanngɛ be kle ekun kɛ ɔ si sran’m be aunnvɔɛ wie. Zezi w’a kpaman sran nun, yɛ w’a yoman sran’m be kpokokpoko. I ndɛ ng’ɔ kannin’n ɔ wlali sran’m be fanngan, yɛ ɔ yoli maan be ɲannin like be fali be wla guali su. Kɛ m’ɔ klo sran mun’n ti’n ɔ kplinnin su kɛ be kle i ɲrɛnnɛn, yɛ ɔ wuli sran’m be ti. Sanngɛ be nga be niɛnnin i ndɛ’n su be nantili’n yɛ ɔ kloli be kpa’n niɔn.—Kanngan Zan 15:13, 14 nun.
SI NDƐ’N NUN KPA EKUN
Maan e kan sran wafa nga Zezi ti’n i ndɛ kpa ekun naan e wun wafa nga e kwla yi sran klolɛ’n i nglo, annzɛ e kwla yo sran ye kɛ i sa’n.
4. Zezi klo i Si
Zezi i ayeliɛ’n kle e wafa nga e kwla yi Ɲanmiɛn klolɛ’n i nglo’n. An kanngan Liki 6:12, nin Zan 15:10; 17:26 nun. Kɛ amun ko kanngan ndɛ mma kun nun’n an koko kosan yɛ’n i su yalɛ.
-
?Wafa sɛ yɛ e kwla kle kɛ e klo Zoova kɛ Zezi sa-ɔ?
Zezi klo i Si m’ɔ o ɲanmiɛn su lɔ’n yɛ ɔ srɛli i titi.
5. Zezi niannin be nga be leman wie’n be lika
Sran’m be ninnge’m be yoli Zezi i cinnjin trɛli i bɔbɔ i liɛ mun. Blɛ mɔ Zezi fɛli kpa bɔbɔ’n ɔ fɛli i blɛ’n nin i wunmiɛn’n ukali sran mun. An kanngan Marki 6:30-44 nun, i sin’n an koko kosan yɛ’m be su yalɛ:
-
?Wafa sɛ yɛ Zezi kleli kɛ sran’m be ndɛ lo i-ɔ? —Nian ndɛ mma 31, 34, 41, nin 42 nun.
-
?Ngue ti yɛ Zezi ukali sran mun-ɔn? —Nian ndɛ mma 34 nun.
-
?Kɛ mɔ e si kɛ Zezi yi Zoova i nzuɛn’n i nglo’n, ngue yɛ i sɔ’n kle e Zoova su-ɔ?
-
?Kɛ Zezi sa’n, wafa sɛ yɛ e kwla kle kɛ sran’m be ndɛ lo e-ɔ?
6. Zezi yoli sran’m be ye
Kannzɛ bɔbɔ Zezi leman ninnge kpanngban’n sanngɛ ɔ ukali sran mun, yɛ ɔ wlali e fanngan kɛ e yo sɔ wie. An kanngan Sa Nga Be Yoli’n 20:35 nun, i sin’n an koko kosan yɛ’n i su yalɛ:
-
?Ngue yɛ Zezi waan sɛ e yo’n é dí aklunjɔɛ-ɔ?
An bo VIDEO’N, i sin’n an koko kosan yɛ’n i su yalɛ.
-
?Kannzɛ e leman ninnge kpanngban’n ngue yɛ e kwla yo e fa uka e wiengu mun-ɔn?
Nian nga wie
Biblu’n se e kɛ e srɛ Zoova, Zezi i dunman nun. (Kanngan Zan 16:23, 24 nun.) Kɛ e srɛ sɔ’n e kle kɛ e si like nga Zezi yoli naan e nin Zoova y’a kwla tra janvuɛ’n i su ye.
SRAN WIE’M BE WAAN: “?Ɲanmiɛn i ndɛ nunman e ndɛ nun.”
-
?Sanngɛ wafa sɛ yɛ Zezi i ayeliɛ’n kle kɛ e ndɛ lo Zoova-ɔ?
NDƐ’N I KPƆLƐ BOLƐ
Zezi klo Zoova yɛ ɔ klo sran mun wie. Kɛ mɔ Zezi nin Zoova be nzuɛn’n ti kun’n ti’n, sɛ e suan Zezi i su like’n é sí Zoova kpa.
Ndɛ’n i nun flanlɛ
-
?Wafa sɛ yɛ e kwla kle kɛ e klo Zoova kɛ Zezi sa-ɔ?
-
?Wafa sɛ yɛ e kwla kle kɛ e klo sran kɛ Zezi sa-ɔ?
-
?Zezi i nzuɛn benin yɛ a klo i kpa-ɔ?
NDƐ WIE MUN EKUN
Wafa nga e kwla sɔnnzɔn Zezi’n.
“Sɛ e waan é sɔ́nnzɔn Zezi’n, maan [...]” (Zezi ti Atin’n nin Nanwlɛ’n nin Nguan’n, i bue 317)
Sa nga ti yɛ ɔ ti cinnjin kɛ e srɛ Ɲanmiɛn, Zezi i dunman nun’n.
“?Ngue ti yɛ ɔ fata kɛ e srɛ Ɲanmiɛn, Zezi i dunman nun-ɔn?” (Sasafuɛ Tranwlɛ’n nun ndɛ)
?Biblu’n kan Zezi i sran waka’n i ndɛ?
Wafa nga Zezi nin bla’m be trannin’n.
“Ɲanmiɛn klo kɛ be bu bla’m be sran” (Sasafuɛ Tranwlɛ’n, afuɛ 2012, Ɔktɔblu 1)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
