ሞትን እንደ ጠላታችን በመመልከት ተገቢ በሆነ መንገድ የምንፈራው ከሆነ ሕይወታችን አደጋ ላይ እንዳይወድቅ አንዳንድ እርምጃዎችን እንወስዳለን። (1 ቆሮንቶስ 15:26) ያም ቢሆን በሐሰት ትምህርቶችና በአጉል እምነት ምክንያት የሚመጣ መሠረተ ቢስ የሞት ፍርሃት ሰዎች “በሕይወት ዘመናቸው በሙሉ ለባርነት [እንዲዳረጉ]” ምክንያት ሆኗል። (ዕብራውያን 2:15) ሞትን መፍራት በሕይወትህ ደስታ እንዳታገኝ እንቅፋት ይሆንብሃል፤ እውነትን ማወቅ ግን ለሞት ከልክ ያለፈ ፍርሃት እንዳያድርብህ በመከላከል ነፃ ያወጣሃል።​—ዮሐንስ 8:32

ስለ ሞት እውነታው ምንድን ነው?

•   የሞቱ ሰዎች ከሕልውና ውጪ ናቸው። (መዝሙር 146:4) መጽሐፍ ቅዱስ ሞትን ከእንቅልፍ ጋር ስለሚያመሳስለው ከሞትኩ በኋላ ልሠቃይ አችላለሁ ብለህ ልትፈራ አይገባም።​—መዝሙር 13:3፤ ዮሐንስ 11:11-14

•   ሙታን ጉዳት ሊያደርሱብን አይችሉም። ቀደም ሲል ጉዳት ያደርሱብን የነበሩ ጠላቶቻችን እንኳ ከሞቱ በኋላ “መንፈሳቸው ተነሥቶ አይመጣም።” (ኢሳይያስ 26:14) መጽሐፍ ቅዱስ ‘ጥላቻቸውና ቅናታቸው ከጠፋ ቆይቷል’ ይላል።​—መክብብ 9:6

•   እርግጥ ስንሞት ሕልውናችን እስከ መጨረሻው ያከትማል ማለት አይደለም። አምላክ በትንሣኤ አማካኝነት የሞቱ ሰዎችን መልሶ ሕያው ያደርጋቸዋል።​—ዮሐንስ 5:28, 29፤ የሐዋርያት ሥራ 24:15

•   አምላክ ‘ሞት የማይኖርበት’ ጊዜ እንደሚመጣ ቃል ገብቷል። (ራእይ 21:4) መጽሐፍ ቅዱስ ይህንን ጊዜ አስመልክቶ ሲናገር “ጻድቃን ምድርን ይወርሳሉ፤ በእርሷም ለዘላለም ይኖራሉ” ይላል። በዚህ ወቅት የሚኖሩ ሰዎች ከማንኛውም ዓይነት የሞት ፍርሃት ሙሉ በሙሉ ነፃ ይወጣሉ።​—መዝሙር 37:29