1, 2. (a) Ano nga mga lugar han pagsingba an gin-gamit han katawohan ni Jehova hadto? (b) Ano an inabat ni Jesus may kalabotan ha templo han Dios ha Jerusalem? (c) Ano an aton hihisgotan hini nga artikulo?

TIKANG pa hadto, an mga surugoon han Dios may-ada na mga lugar para ha putli nga pagsingba. Pananglitan, posible nga ginamit hi Abel hin halaran han naghalad hiya ha Dios. (Gen. 4:3, 4) Hira Noe, Abraham, Isaac, Jacob, ngan Moises nagtukod hin mga halaran. (Gen. 8:20; 12:7; 26:25; 35:1; Eks. 17:15) Ginsugo ni Jehova an mga Israelita nga magtukod hin tabernakulo. (Eks. 25:8) Ha urhi, nagtukod hira hin templo para ha pagsingba kan Jehova. (1 Hadi 8:27, 29) Han nakabalik an gindistyero nga mga Judio tikang ha Babilonya, regular hira nga nagkatirok ha mga sinagoga. (Mar. 6:2; Juan 18:20; Buh. 15:21) An mga Kristiano ha siyahan nga siglo nagkatirok ha balay han mga membro han kongregasyon. (Buh. 12:12; 1 Cor. 16:19) Yana, an katawohan ni Jehova nagkakatirok basi mahibaro ngan magsingba ha iya ha yinukot nga Kingdom Hall ha bug-os nga kalibotan.

² Ginhigugma ngan gintahod gud ni Jesus an templo ni Jehova ha Jerusalem, nga tungod hito igin-aplikar ha iya han usa nga parasurat han Ebanghelyo an ginsiring han salmista: “An pagin aktibo para  ha imo balay naglalaga ha sulod ko.” (Sal. 69:9, NW; Juan 2:17) Diri pariho han templo ha Jerusalem, an mga Kingdom Hall yana diri bug-os nga matatawag nga “balay ni Jehova.” (2 Kron. 5:13; 33:4) Pero may mga prinsipyo ha Biblia nga nagpapakita kon paonan-o naton sadang gamiton ngan tahuron an aton mga lugar han pagsingba. Hini nga artikulo, hihisgotan naton an pipira hito nga mga prinsipyo nga nagtututdo kon ano an sadang naton magin panggawi ha Kingdom Hall, kon paonan-o naton ito sadang atamanon, ngan kon paonan-o kita makakasuporta ha pagtukod hito. *

3-5. Ano an katuyoan han Kingdom Hall, ngan paonan-o ito sadang makaapekto han aton pagtagad ha mga katirok dida hito?

³ An Kingdom Hall an sentro han putli nga pagsingba ha usa nga komunidad. Usa han mga igintatagana ni Jehova para ha aton espirituwal nga kahimsog amo an sinemana nga mga katirok ha Kingdom Hall. Dida naton nakakarawat an mga pagparig-on ngan giya nga iya igintatagana pinaagi han iya organisasyon. Daku nga pribilehiyo nga maimbitar ni Jehova ngan han iya Anak nga kumaon ha “lamesa ni Jehova” kada semana. Diri gud naton sadang hingalimtan nga espesyal ini nga imbitasyon.—1 Cor. 10:21.

⁴ Importante hinduro para kan Jehova an sugad nga mga higayon para ha pagsingba ngan pagdinasigay, salit iya gin-giyahan hi apostol Pablo ha pag-aghat ha aton nga diri gud pabay-an an aton pagkatirok. (Basaha an Hebreo 10:24, 25.) Gintatahod ba naton hi Jehova kon diri kita natambong bisan kon waray mabug-at nga rason? Iginpapakita naton an aton apresasyon kan Jehova ngan ha iya mga tagana kon nangangandam ngan kinasingkasing nga nakikigbahin kita ha mga katirok.—Sal. 22:22.

⁵ An aton panggawi durante han mga katirok ngan an aton paagi ha pag-ataman han aton Kingdom Hall nagpapakita kon mationan-o kahilarom an aton pagtahod kan Jehova. An aton disposisyon may kalabotan hini nga butang nagpapakita han aton inaabat mahitungod han ngaran han Dios, nga makikita ha karatola han mga Kingdom Hall.—Itanding an 1 Hadi 8:17.

6. Ano an ginsiring han pipira mahitungod ha aton mga Kingdom Hall ngan ha mga natambong dida hito? (Kitaa an retrato ha tinikangan hini nga artikulo.)

⁶ Agsob nga naoobserbaran han mga diri Saksi an aton pagtahod ha aton mga lugar han pagsingba. Pananglitan, usa nga lalaki ha Turkey an nagsiring: “Bumilib ako han kalimpyo ngan kahapsay nga naobserbaran ko ha Kingdom Hall. An mga tawo didto desente mamado, mahiyom-hiyom, ngan gin-abiabi nira ako. Bumilib gud ako hito.” Ini nga lalaki nagtikang tumambong hin regular ha mga katirok ngan waray pag-iha, nabawtismohan hiya. Ha usa nga syudad ha Indonesia, gin-imbitar han kabugtoan an mga opisyal han gobyerno ngan mga tawo ha ira komunidad nga bumisita ha ira bag-o nga Kingdom Hall antes ito igdedikar. Kumadto an meyor. Bumilib hiya han pagin de-kalidad han bilding, han disenyo hito, ngan han makaruruyag nga garden hito. Hiya nagsiring: “An kalimpyo hini nga pasilidad nagpapakita han iyo marig-on gud nga pagtoo.”

7, 8. Ano nga importante nga mga butang an sadang hinumdoman han mga natambong ha katirok?

⁷ An aton pagtahod ha Dios nga nag-iimbitar ha aton ha katirok sadang makita ha aton panggawi, pamado, ngan pag-ayos. Pero kinahanglan kita magin timbang. Naobserbaran nga may kabugtoan nga sobra kaistrikto may kalabotan ha kon ano an angayan nga panggawi kon aadto ha Kingdom Hall, samtang an iba sobra karelaks nga baga hin aadto la hira ha ira balay. Syempre  karuyag ni Jehova nga magin komportable an iya mga surugoon ngan an mga bisita nga natambong. Kondi diri naton karuyag nga makuha an atensyon han iba tikang ha programa tungod han aton sobra kadiri-pormal nga pamado, pagtineks, pag-inistorya, pagkinaon, pag-ininom, ngan iba pa. Kinahanglan tutdoan han mga kag-anak an ira mga anak basi masabtan nira nga an Kingdom Hall diri lugar para magdarodalagan o mag-inuyag hira.—Ekles. 3:1.

⁸ Han nakita ni Jesus an mga nagninegosyo ha templo, nasina gud hiya ngan ginpaiwas hira. (Juan 2:13-17) An aton mga Kingdom Hall lugar para ha putli nga pagsingba ngan espirituwal nga pagtutdo. Salit diri sadang hisgotan o himoon dida hito an bisan ano nga may kalabotan ha negosyo.—Itanding an Nehemia 13:7, 8.

9, 10. (a) Paonan-o an organisasyon ni Jehova nakakagtagana hin mga Kingdom Hall, ngan ano an resulta? (b) Ano nga mahigugmaon nga probisyon an nakabulig gud ha mga kongregasyon nga diri makakaakos pagtukod hin ira Kingdom Hall?

⁹ An organisasyon ni Jehova nangangalimbasog gud ha pagtagana hin mga Kingdom Hall. Mga boluntaryo an nagdidisenyo, nagtutukod, ngan nag-aayad han mga Kingdom Hall. Ano an resulta? Tikang han Nobyembre 1, 1999, sobra 28,000 nga mag-opay nga lugar para ha putli nga pagsingba an natukod ha bug-os nga kalibotan. Salit han naglabay nga 15 ka tuig, ha aberids, lima nga Kingdom Hall an natutukod kada adlaw.

¹⁰ An organisasyon ni Jehova nagtutoka hin mga boluntaryo ha pagtukod hin Kingdom Hall ha mga lugar nga nagkikinahanglan hito, ngan mga donasyon an ira ginagamit para hini nga mga proyekto. Inin mahigugmaon nga probisyon iginbasar ha prinsipyo ha Biblia nga mapun-an han sobra han iba an kakulangan han iba basi “magkaada pagkasarahid.” (Basaha an 2 Corinto 8:13-15.) Sugad nga resulta, nagkaada hin mag-opay nga lugar para ha putli nga pagsingba an mga kongregasyon nga diri makakaakos pagtukod hin ira kalugaringon nga Kingdom Hall.

11. Ano an ginsiring han pipira nga kabugtoan may kalabotan han ira bag-o nga Kingdom Hall, ngan ano an imo inaabat mahitungod hini?

¹¹ Usa nga kongregasyon ha Costa Rica nga nakapahimulos hini nga probisyon an nagsurat: “Kon aada kami ha atubangan han amon Kingdom Hall, nahuhunahuna namon nga baga hin nag-iinop la kami! Diri kami makatoo. An amon maopay nga katirokan natapos tubtob ha pinakagutiay nga detalye ha sulod la hin walo ka adlaw! Nagin posible ini tungod han bendisyon ni Jehova, han kahikayan han iya organisasyon, ngan han suporta han aton hinigugma nga kabugtoan. Ini nga lugar han pagsingba presyoso gud nga regalo, usa nga bahandi nga iginhatag ni Jehova ha amon. Daku gud an amon kalipay tungod hini.” Diri ka ba nalilipay ha pakabati han sugad nga mga kapahayagan han  pagpasalamat han aton kabugtoan tungod han ira bag-o nga Kingdom Hall ngan ha paghibaro nga damu pa ha bug-os nga kalibotan an naabat han sugad nga kalipay? Matin-aw nga buruhaton ini ni Jehova, tungod kay kon natatapos an usa nga Kingdom Hall, agsob nga nagtitikadamu an interesado nga natambong nga karuyag mahibaro mahitungod han aton mahigugmaon nga Maglalarang.—Sal. 127:1.

12. Paonan-o ka makakabulig basi makagtukod hin mga Kingdom Hall?

¹² Damu nga kabugtoan an naabat hin daku nga kalipay ha pagboluntaryo ha pagtukod hin Kingdom Hall. Makaboluntaryo man kita ha pagtukod o diri, kita ngatanan may pribilehiyo ha pagsuporta hini nga mga proyekto pinaagi han aton mga donasyon. An kadasig para ha putli nga pagsingba nakabulig nga masuportaran an materyal nga panginahanglan han mga proyekto ha pagpanukod ha panahon han Biblia, ngan sugad liwat hito yana. Hini nga paagi, nadadayaw naton hi Jehova.—Eks. 25:2; 2 Cor. 9:7.

13, 14. Ano nga mga prinsipyo ha Biblia an nagpapakita nga kinahanglan naton tipigan nga limpyo ngan mahapsay an aton Kingdom Hall?

¹³ Kon matukod na an usa nga Kingdom Hall, kinahanglan tipigan ito nga limpyo ngan mahapsay basi makita dida hito an mga kalidad ngan personalidad han Dios nga aton ginsisingba—an Dios han kahapsay. (Basaha an 1 Corinto 14:33, 40.) Sumala ha Biblia, an pagkabaraan ngan espirituwal nga kalimpyo may koneksyon ha pisikal nga kalimpyo. (Pah. 19:8) Salit, kon karuyag naton nga uyonan kita ni Jehova, kinahanglan magin limpyo liwat kita ha pisikal.

¹⁴ Tungod kay ginsusunod naton ini nga mga prinsipyo, diri kita naaawod ha pag-imbitar ha iba ha aton mga katirok kay maaram kita nga an  kahimtang han aton katirokan uyon gud ha maopay nga sumat nga aton iginsasangyaw. Makikita nira nga an Dios nga aton ginsisingba baraan ngan diri mag-iiha, hihimoon niya ini nga tuna nga makaruruyag nga paraiso.—Isa. 6:1-3; Pah. 11:18.

15, 16. (a) Kay ano nga diri pirme masayon an pagtipig han Kingdom Hall nga limpyo, kondi kay ano nga importante ito? (b) Ano an iyo mga kahikayan ha paglimpyo han iyo Kingdom Hall, ngan ano an pribilehiyo han tagsa ha aton?

¹⁵ Iba-iba an opinyon han mga tawo mahitungod ha paglimpyo. Posible nga tungod ini han ira nahiaraan. An iba bangin naukoy ha mga lugar nga malapok, o matapotapo, o waray igo nga suplay hin tubig ngan mga panlimpyo. Anoman an nahiaraan o kahimtang ha aton lugar, an aton Kingdom Hall sadang magin susbaranan gud ha kahapsay ngan kalimpyo kay makikita dida hito an ngaran ni Jehova ngan tungod kay usa ito nga lugar para ha putli nga pagsingba.—Deut. 23:14.

¹⁶ Kinahanglan gumios kita basi matipigan nga limpyo an aton mga Kingdom Hall. Sadang siguruhon han tagsa nga lawas han mga tigurang nga may eskedyol ha paglimpyo ngan may-ada igo nga garamiton ngan suplay hin panlimpyo. Tungod kay may mga kinahanglan limpyohan dayon katapos han kada katirok ngan may-ada liwat kinahanglan limpyohan hin diri sugad kaagsob, sadang magkaada maopay nga koordinasyon ngan pagdumara basi masiguro nga waray malikatan. An ngatanan ha kongregasyon may pribilehiyo nga magkooperar hini nga buruhaton.

17, 18. (a) Ano nga mga asoy ha Biblia an nag-uunabi mahitungod ha pagmintinar ha mga lugar han pagsingba? (b) Kay ano nga kinahanglan mintinaron an mga Kingdom Hall?

¹⁷ Nangangalimbasog liwat an mga surugoon ni Jehova ha pagmintinar han ira lugar han pagsingba. Ginsugo ni Hadi Jehoas han Juda an mga saserdote nga gamiton an mga donasyon ha balay ni Jehova ha ‘pag-ayad han mga guba han balay, bisan diin an kagubaan hiagii.’ (2 Hadi 12:4, 5) Paglabay hin sobra 200 ka tuig, gin-gamit liwat ni Hadi Josia an mga kontribusyon ha templo ha pag-ayad han mga guba nga bahin hito.—Basaha an 2 Kronikas 34:9-11.

¹⁸ May mga sanga nga opisina nga nagreport nga ha pipira nga nasud diri gintatagan hin prayoridad han mga tawo an pagmintinar hin mga bilding o mga gamit. Hito nga mga lugar, bangin gutiay la an maaram kon paonan-o magmintinar o an makakaakos han gastos hito. Pero matin-aw nga kon diri mimintinaron an Kingdom Hall, maguguba dayon ito ngan diri ito maghahatag hin maopay nga pamatuod ha komunidad. Ha luyo nga bahin, kon nangangalimbasog gud an kongregasyon ha pagmintinar han Kingdom Hall, maghahatag ito hin kadayawan kan Jehova ngan diri makakarag an donasyon han kabugtoan.

19. Ano an imo determinasyon may kalabotan ha mga pasilidad nga aton ginagamit para ha putli nga pagsingba?

¹⁹ An Kingdom Hall usa nga bilding nga igindedikar kan Jehova. Salit waray indibiduwal o kongregasyon nga nagtatag-iya hito, anoman an nakasurat ha titulo. Gin-aaghat kita han mga prinsipyo ha Biblia nga magkooperar basi masiguro nga matutuman han Kingdom Hall an katuyoan kon kay ano nga gintukod ito. Mahihimo ito han ngatanan ha kongregasyon pinaagi ha pagpakita hin pagtahod ha aton lugar han pagsingba, paghatag hin donasyon basi makagtukod hin bag-o nga mga Kingdom Hall, ngan paggahin hin panahon ngan kusog basi matipigan ito nga limpyo ngan namimintinar. Ha pagbuhat hito, iginpapakita naton an kadasig para ha lugar han putli nga pagsingba kan Jehova sugad han iginpakita ni Jesus.—Juan 2:17.