Pakadto ha sulod

Pakadto ha mga sulod

Malipayon nga Nagsakripisyo Hira ha Pag-alagad—Ha Rusya

Malipayon nga Nagsakripisyo Hira ha Pag-alagad—Ha Rusya

HAN 1991, nalipay gud an mga Saksi ni Jehova ha Rusya tungod kay ginkuha han gobyerno an maiha na nga pagdiri ha ira buruhaton ngan legal na hira nga ginkilala. Hito nga panahon, gutiay la an naghuhunahuna nga magdadamu gud an mga Saksi ni Jehova didto. Yana, mga 170,000 na hira! Kaapi hinin maduruto nga mga magwarali han Ginhadian adton tikang ha iba nga nasud nga binalhin ha Rusya basi bumulig ha espirituwal nga pag-ani. (Mat. 9:37, 38) Aton kilalahon an pipira ha ira.

KABUGTOAN NGA KALALAKIN-AN NGA ANDAM BUMULIG HA MGA KONGREGASYON

Han ginkuha an pagdiri ha aton buruhaton ha Rusya, 28 anyos hi Matthew nga taga-Gran Britanya. Ha kombensyon hito nga tuig, ginpabug-atan ha usa nga pahayag nga damu nga kongregasyon ha Este nga Europa an nagkikinahanglan hin bulig. Sugad nga ehemplo, gin-unabi han mamumulong nga may usa nga kongregasyon ha St. Petersburg, Rusya, nga usa la an ministeryal nga surugoon ngan waray tigurang. Ngan an mga magwarali nagdudumara hin ginatos nga pag-aram ha Biblia! Hi Matthew nagsiring: “Katapos hito nga pahayag, waray na mawara ha akon hunahuna an Rusya, salit espisipiko nga igin-ampo ko kan Jehova an akon hingyap nga bumalhin didto.” Nagtirok hiya hin kwarta, nagbaligya han kadam-an han iya panag-iya, ngan binalhin ha Rusya han 1992. Ano an nagin kahimtang niya didto?

Hi Matthew

Hi Matthew nagsiring: “Diri masayon an pag-aram han yinaknan. Nakurian ako ha pagkaada maopay nga pakiistorya mahitungod ha espirituwal nga mga butang.” Nagin problema liwat niya an pamiling hin urukyan. “Diri ko maihap kon pira ka beses ako ginpabalhin hin apartment nga haros waray ako abisohi.” Bisan pa hito, hi Matthew nagsiring: “An pagbalhin ha Rusya an pinakamaopay nga desisyon nga akon ginhimo.” Hiya nagdugang: “Ha akon pag-alagad dinhi, nahibaro ako nga sumarig hin mas bug-os kan Jehova ngan naeksperyensyahan ko an iya giya ha damu nga paagi.” Ha urhi, hi Matthew nagin tigurang ngan espesyal payunir, ngan yana nag-aalagad hiya ha sanga nga opisina hirani ha St. Petersburg.

Han 1999, hi Hiroo nga 25 anyos, naggradwar ha Ministerial Training School ha Japan. Usa han iya mga instruktor an nag-aghat ha iya nga mag-alagad ha iba nga  nasud. Hinbaroan niya nga daku an panginahanglan ha Rusya ngan nagtikang hiya pag-aram han Ruso nga yinaknan. Naghimo liwat hiya hin usa pa nga praktikal nga pitad. Hiya nagsiring: “Nag-ukoy ako ha Rusya hin unom ka bulan. Tungod kay matugnaw gud didto kon kathagkot, Nobyembre ako kumadto basi hibaroan kon kaya ko an tugnaw.” Han nakita niya nga kaya niya an kathagkot didto, binalik hiya ha Japan ngan nagkinabuhi hin simple para makatirok hin igo nga kwarta basi makabalik ha Rusya ngan didto na umukoy.

Hira Hiroo ngan Svetlana

Yana, hi Hiroo 12 ka tuig na ha Rusya ngan nakag-alagad na ha pipira nga kongregasyon. Usahay, hiya la an tigurang nga nag-aataman ha sobra 100 nga magwarali. Ha usa nga kongregasyon, hiya an nagdudumara han kadam-an nga bahin ha Katirok ha Pag-alagad, han Teokratiko nga Eskwelahan ha Ministeryo, han Pag-aram ha Barantayan, ngan hin lima nga Pag-aram ha Libro han Kongregasyon kada semana. Damu liwat an iya ginhimo nga pag-shepherding. Ha paghinumdom hito nga mga panahon, hi Hiroo nagsiring: “Makalilipay gud an pagbulig ha kabugtoan nga magin mas marig-on ha espirituwal.” Ano an epekto ha iya han pag-alagad ha lugar diin mas daku an panginahanglan? Hiya nagsiring: “Antes ako bumalhin ha Rusya, tigurang ako ngan payunir, kondi han kinanhi ako inabat ko nga baga hin nabag-o gud an akon relasyon kan Jehova. Nahibaro ako nga sumarig hin mas bug-os kan Jehova ha ngatanan nga bahin han akon kinabuhi.” Han 2005, nagpakasal hi Hiroo kan Svetlana, ngan padayon hira nga nagpayunir.

Hira Michael ngan Olga kaupod hira Marina ngan Matthew

Hi Matthew, nga 34 anyos, ngan an iya bugto nga hi Michael, nga 28 anyos, taga-Canada. Han binisita hira ha Rusya, nakita nira nga damu an interesado nga natambong ha mga katirok pero gutiay la an kabugtoan nga kalalakin-an nga nagdudumara hito. Hi Matthew nagsiring: “Dos syentos an tinambong ha kongregasyon nga akon gintambongan, pero usa la nga lagas na nga tigurang ngan usa nga batan-on nga ministeryal nga surugoon an nagdumara han mga katirok. Tungod hito, ginhingyap ko gud nga bumalhin didto basi buligan an kabugtoan.” Binalhin hiya ha Rusya han 2002.

Paglabay hin upat ka tuig, binalhin hi Michael ha Rusya ngan nakita niya nga daku pa an panginahanglan hin kabugtoan nga kalalakin-an. Sugad nga ministeryal nga surugoon, gintokahan hiya ha pag-asikaso han accounts, literatura, ngan teritoryo. Gintokahan liwat hiya hin buruhaton nga kasagaran nga ginhihimo han sekretaryo han kongregasyon, maghatag hin pahayag publiko, ngan bumulig pag-organisar hin mga asembleya ngan pagtukod hin mga Kingdom Hall. Ngani bisan yana, daku pa gihapon nga bulig an ginkikinahanglan han mga kongregasyon. Bisan kon diri masayon an pag-asikaso hin damu nga toka, hi Michael nga tigurang na yana, nagsiring: “An pagbulig ha kabugtoan naghahatag ha akon hin daku nga kalipay. Ito an pinakamaopay nga paagi ha paggamit han akon kinabuhi!”

Hi Matthew nagpakasal kan Marina, ngan hi Michael nagpakasal kan Olga. Ini nga mga mag-asawa kaupod han damu nga kabugtoan, padayon nga nabulig ha nagtitikadamu nga kongregasyon.

MADASIGON NGA KABUGTOAN NGA KABABAYIN-AN NGA NABULIG HA PAG-ANI

Hi Tatyana

Han 1994, han 16 anyos hi Tatyana, unom nga espesyal payunir ha Czech Republic, Polandia, ngan Slovakia an igintoka ha ira kongregasyon ha Ukraine. Hiya nagsiring: “Madasigon hira nga payunir nga masayon madaop ngan buotan, ngan maaram gud hira ha Biblia.” Nakita niya nga ginbendisyonan ni Jehova an ira mga pagsakripisyo, ngan karuyag niya magin pariho ha ira.

Tungod kay nadasig hi Tatyana han susbaranan han mga payunir, kada bakasyon ha eskwelahan naupod hiya pagsangyaw ha higrayo nga lugar han Ukraine ngan Belarus nga waray pa masangyawi. Nalipay gud hiya hito, salit nagplano hiya nga pahaluagon an iya ministeryo pinaagi ha pagbalhin ha Rusya. Siyahan, kumadto hiya basi bisitahon an usa nga bugto nga binalhin didto ngan para mamiling hin trabaho nga makakasuporta ha iya pagpayunir. Han 2000, binalhin hiya ha Rusya. Nakurian ba hiya?

 Hi Tatyana nagsiring: “Tungod kay diri ko akos magplete hin apartment, nagplete ako hin kwarto ha usa nga balay. Diri masayon an sugad nga kahimtang. May mga panahon nga karuyag ko na umuli. Pero padayon ako nga ginbuligan ni Jehova nga makita nga magpapahimulos ako ha pag-alagad dinhi.” Yana, misyonera hi Tatyana ha Rusya. Hiya nagsiring: “Ha katuigan nga hirayo ako ha akon nasud, nagkaada ako mapulsanon gud nga mga eksperyensya ngan damu nga kasangkayan. Labaw ha ngatanan, naparig-on an akon pagtoo.”

Hi Masako

Maiha na nga hingyap ni Masako nga taga-Japan, nga sobra 50 anyos na yana, nga magin misyonera, pero imposible ito tungod han iya problema ha kahimsog. Kondi han nag-opay-opay hiya, nagdesisyon hiya nga bumalhin ha Rusya basi bumulig ha espirituwal nga pag-ani. Bisan kon makuri an pagbiling hin angayan nga urukyan ngan permanente nga trabaho, nasuportaran niya an iya pagpayunir pinaagi ha pagtutdo hin Japanese ngan pagtrabaho sugad nga paralimpyo. Ano an nakabulig ha iya nga makapadayon ha pagministeryo?

Ha paghinumdom han 14 ka tuig nga pag-alagad ha Rusya, hi Masako nagsiring: “Tungod han akon kalipay ha ministeryo, balewaray gud an mga problema nga akon naieksperyensyahan. An pagsangyaw ha lugar nga mas daku an panginahanglan hin magwarali han Ginhadian, nagriresulta ha mapulsanon ngan makalilipay nga kinabuhi.” Hiya nagdugang: “Para ha akon, usa gud nga milagro an pakaeksperyensya mismo han pagtagana ni Jehova hin pagkaon, bado, ngan urukyan tikang pa hadto.” Labot la ha pag-alagad ha mga lugar ha Rusya nga daku an panginahanglan, hi Masako nakabulig liwat ha espirituwal nga pag-ani ha Kyrgyzstan. Dugang pa, nakabulig hiya ha mga grupo nga nagamit hin Ingles, Inintsik, ngan Uighur nga yinaknan. Yana, payunir hiya ha St. Petersburg.

MGA PAMILYA NGA BINULIG NGAN NAKAKARAWAT HIN BENDISYON

Hira Inga ngan Mikhail

Tungod han problema ha ekonomiya, an mga pamilya kasagaran nga nabalhin ha iba nga nasud basi magkaada dugang nga materyal nga mga butang. Pero pariho kanda Abraham ngan Sara, may mga pamilya nga nabalhin ha iba nga nasud tungod hin espirituwal nga mga tumong. (Gen. 12:1-9) Tagda hira Mikhail ngan Inga nga mag-asawa nga taga-Ukraine. Binalhin hira  ha Rusya han 2003. Waray pag-iha nakabiling hira hin mga tawo nga karuyag mahibaro han kamatuoran ha Biblia.

Hi Mikhail nagsiring: “Makausa, nagsangyaw kami ha usa nga lugar nga waray pa masangyawi. Usa nga edaran nga lalaki an nag-abri han purtahan ngan nagpakiana, ‘Mga parawali ba kamo?’ Han binaton kami nga oo, nagsiring hiya: ‘Maaram ako nga makanhi kamo. Imposible gud nga diri matuman an ginsiring ni Jesus.’ Katapos, ginkotar niya an Mateo 24:14.” Hi Mikhail nagdugang: “Hito nga lugar, may nasangyawan liwat kami nga grupo hin mga napulo nga kababayin-an nga Baptist. Sinsero hira ngan uhaw ha kamatuoran. May-ada hira han Mabuhi ha Waray Kataposan nga libro, ngan ginagamit nira ito ha pag-aram ha Biblia kada kataposan han semana. Ha sulod hin damu ka oras, ginbaton namon an ira mga pakiana ngan nagkanta kaupod nira hin mga karantahon ha Ginhadian, ngan urosa kami nga nangiklop. Ito nga pagbisita usa han akon mag-opay gud nga eksperyensya.” Nauyon hira Mikhail ngan Inga nga an pag-alagad ha lugar nga daku an panginahanglan hin magwarali nakabulig ha ira nga magin mas duok kan Jehova, nagpahilarom han ira gugma ha mga tawo, ngan naghatag ha ira hin makapatagbaw gud nga kinabuhi. Yana, aada hira ha sirkito nga buruhaton.

Hira Oksana, Aleksey, ngan Yury

Han 2007, an mag-asawa nga hira Yury ngan Oksana nga taga-Ukraine, nga sobra 30 anyos na yana, ngan an ira anak nga hi Aleksey, nga 13 anyos na yana, binisita ha sanga nga opisina ha Rusya. Nakita nira didto an usa nga mapa han Rusya nga may hagluag nga lugar nga waray pa masangyawi. Hi Oksana nagsiring: “Han nakita namon ito nga mapa, nasantop gud namon nga daku an panginahanglan hin magwarali han Ginhadian. Nakabulig ito ha amon nga magdesisyon nga bumalhin ha Rusya.” Ano pa an nakabulig ha ira? Hi Yury nagsiring: “Daku nga bulig an pagbasa hin mga artikulo ha aton mga publikasyon sugad han ‘Makakag-alagad Ka ba ha Langyaw nga Kanataran?’ * Ginbisita namon an lugar ha Rusya nga iginsuhestyon han sanga nga opisina nga balhinan namon ngan namiling kami hin urukyan ngan trabaho.” Han 2008, binalhin hira ha Rusya.

Ha tinikangan, makuri an pamiling hin trabaho, ngan pipira ka beses nga ginkinahanglan nira bumalhin hin apartment. Hi Yury nagsiring: “Agsob namon ig-ampo nga diri kami manluya; katapos, padayon kami nga nagsasangyaw, nasarig nga bubuligan kami ni Jehova. Naeksperyensyahan namon an pag-ataman ni Jehova han gin-una namon an mga buruhaton han Ginhadian. An amon pag-alagad nagparig-on gud han amon pamilya.” (Mat. 6:22, 33) Ngan ano an epekto ha batan-on nga hi Aleksey han pag-alagad ha lugar nga daku an panginahanglan? Hi Oksana nagsiring: “Maopay gud an epekto hito ha iya. Nagdedikar hiya kan Jehova ngan nagpabawtismo han noybe anyos hiya. Tungod kay maaram hiya nga daku an panginahanglan hin magwarali han Ginhadian, nag-u-auxiliary payunir hiya kon bakasyon ha eskwelahan. Nalilipay gud kami ha iya gugma ngan kadasig ha ministeryo.” Yana, hira Yury ngan Oksana nag-aalagad sugad nga mga espesyal payunir.

“AN AKON LA GINBABASOLAN”

Sugad han ginsiring hini nga mga magwarali, an pagbalhin ha iba nga lugar basi pahaluagon an imo ministeryo nagkikinahanglan hin bug-os nga pagsarig kan Jehova. Oo, adton nag-aalagad ha lugar nga daku an panginahanglan nakakaeksperyensya hin mga kakurian ha ira bag-o nga teritoryo, pero daku liwat an ira kalipay tungod ha pagpasamwak han maopay nga sumat ha mga makinarawaton han mensahe han Ginhadian. Mahimo ka ba makabulig ha espirituwal nga pag-ani ha lugar nga daku an panginahanglan hin magwarali? Kon bubuhaton mo ito, diri mag-iiha bangin abaton mo an gin-abat ni Yury, nga nagsiring mahitungod han iya desisyon nga mag-alagad ha lugar nga daku an panginahanglan: “An akon la ginbabasolan nga waray ko ito buhata dayon.”

^ par. 20 Kitaa an Barantayan, Oktubre 15, 1999, pahina 23-27.