Mateo 9:1-38
9 Salit pakasakay ni Jesus ha baluto, tinabok hiya ngan kinadto ha iya inuukyan nga syudad.*
2 Ngan gindara han mga tawo ha iya an paralisado nga lalaki nga nahigda ha tiheras. Han nakita ni Jesus an ira pagtoo, nagsiring hiya ha paralisado: “Magmarig-on ka, Anak! Ginpasaylo na an imo mga sala.”
3 Katapos, nag-iristorya an pipira han mga eskriba: “Ini nga tawo nagpapasipara ha Dios.”
4 Tungod kay maaram hi Jesus han ira ginhuhunahuna, nagsiring hiya: “Kay ano nga puno hin karaotan an iyo kasingkasing?
5 Pananglitan, ano an mas masayon, an pagsiring nga ‘Ginpasaylo na an imo mga sala,’ o an pagsiring, ‘Buhát ngan lakat’?
6 Pero basi kamo mahibaro nga an Anak han tawo may awtoridad dinhi ha tuna ha pagpasaylo han mga sala. . . ” ginsidngan niya an paralisado: “Buhát, dad-a an imo tiheras, ngan uli ha iyo balay.”
7 Salit binuhát hiya ngan inuli.
8 Pakakita hini han mga tawo, nahadlok hira, ngan gindayaw nira an Dios nga naghatag ha mga tawo han sugad nga awtoridad.
9 Katapos, samtang naagi hi Jesus ha opisina para han pagbuhis, nakita niya hi Mateo nga nalingkod didto, ngan iya ginsidngan: “Kadi, sunod ha akon.” Binuhát dayon hi Mateo ngan inupod ha iya.
10 Han nalingkod na hi Jesus ha may lamesa ha balay, inabot an damu nga parasukot hin buhis ngan magpakasasala, ngan nangalingkod hira upod ni Jesus ngan han mga disipulo.
11 Pero pakakita hini han mga Pariseo, nagsiring hira ha mga disipulo: “Kay ano nga an iyo magturutdo nakikig-upod ha pangaon ha mga parasukot hin buhis ngan magpakasasala?”
12 Han hinbatian ini ni Jesus, nagsiring hiya: “An mahimsog diri nanginginahanglan hin doktor, kondi an may sakit.
13 Salit lakat kamo ngan sabota an kahulogan hini: ‘Karuyag ko an kalooy, diri an halad.’ Kay kinanhi ako, diri para ha magtadong, kondi para ha magpakasasala.”
14 Katapos, inabot an mga disipulo ni Juan ngan nagpakiana kan Jesus: “Kay ano nga kami ngan an mga Pariseo nagpupuasa pero an imo mga disipulo diri nagpupuasa?”
15 Binaton hi Jesus: “An kasangkayan han karaslon nga lalaki waray rason nga masubo mentras kaupod nira hiya, diri ba? Pero maabot an panahon nga an karaslon nga lalaki kukuhaon ha ira, ngan dida hito magpupuasa hira.
16 Waray nagtatangkop hin bag-o nga tela ha daan nga pantungbaw nga panapton, kay pagkuro hini madugang la kagisi an gintangkopan.
17 Waray liwat nagsusulod hin bag-o nga bino ha daan nga anit nga surudlan, kay mabuburit ito ngan makakarag an bino. Lugod, an bag-o nga bino iginsusulod ha bag-o nga anit nga surudlan, salit waray nadadaot.”
18 Samtang nagyayakan pa hiya hini, dinaop ha iya an usa nga opisyal ngan yinukbo ha iya nga nasiring: “Posible nga yana patay na an akon anak nga babaye, pero upod ha akon ngan kapti hiya basi mabuhi.”
19 Salit binuhát hi Jesus ngan sinunod ha iya, pati an mga disipulo.
20 Ngan usa nga babaye nga 12 ka tuig na nga gin-didinugoan an hinirani ha luyo ni Jesus ngan ginkaptan an sidsid han iya pantungbaw nga panapton,
21 kay nagsiniring hiya ha iya kalugaringon: “Bisan makaptan ko la an iya pantungbaw nga panapton mag-oopay na ako.”
22 Liningi hi Jesus ngan han nakita niya an babaye, nagsiring hiya: “Ayaw kabaraka, Anak! Tungod han imo pagtoo nag-opay ka.” Hito nga oras nag-opay an babaye.
23 Pag-abot ni Jesus ha balay han opisyal, nakita niya an mga nagpaplawta ngan an maaringasa nga mga tawo.
24 Nagsiring hiya: “Gawas anay kamo, kay an daragita waray mamatay, kondi nakaturog la.” Tungod hito, nakakatamay nga gintinawaan nira hiya.
25 Pakagawas han mga tawo, sinulod hi Jesus ngan ginkaptan an kamot han daragita, ngan an daragita binuhát.
26 Salit nahibantog ini ha bug-os nga lugar.
27 Paglakat ni Jesus tikang didto, duha nga buta nga lalaki an nagsinunod ha iya ngan nagsininggit: “Malooy ka ha amon, Anak ni David.”
28 Pakasulod ni Jesus ha balay, dinaop ha iya an mga buta, ngan iya ginpakianhan: “Natoo ba kamo nga mahihimo ko ini?” Binaton hira: “Oo, Ginoo.”
29 Katapos ginkaptan niya an ira mga mata ngan nagsiring: “Mahitabo unta ito ha iyo uyon ha iyo pagtoo.”
30 Ngan nakakitâ na hira. Pero gintugon hira ni Jesus: “Ayaw gud niyo ini igsumat ha bisan hin-o.”
31 Pero pakagawas nira, iginsumat nira ha bug-os nga lugar an mahitungod ha iya.
32 Paglakat han mga buta, gindara han mga tawo ngadto kan Jesus an usa nga lalaki nga diri nakakayakan tungod kay ginsaniban hin demonyo,
33 ngan han ginpagawas an demonyo, nakayakan ito nga tawo. Salit nahipausa gud an mga tawo ngan nagsiring: “Waray pa gud nahitabo nga sugad hini ha Israel.”
34 Pero an mga Pariseo nagsiring: “Nagpapagawas hiya hin mga demonyo pinaagi han magmarando han mga demonyo.”
35 Ngan hi Jesus naglibot ha ngatanan nga syudad ngan baryo, ha pagtutdo ha ira mga sinagoga, pagsangyaw han maopay nga sumat han Ginhadian, ngan panambal han magkalain-lain nga sakit han mga tawo.
36 Pakakita niya han damu nga tawo, nalooy hiya ha ira kay sugad hira hin gin-anitan ngan ginpabay-an nga mga karnero nga waray paraataman.
37 Ngan nagsiring hi Jesus ha mga disipulo: “Oo, damu an aranihon, kondi gutiay an mag-arani.
38 Salit pakimalooy kamo ha Agaron nga magpadara hin mga mag-arani ha iya aranihon.”
Mga footnote
^ Karuyag sidngon, ha Capernaum nga agsob ukyan ni Jesus durante han iya ministeryo ha Galilea.
