Mateo 10:1-42
10 Hito nga adlaw, iginpatawag ni Jesus an 12 nga disipulo ngan gintagan hira hin awtoridad ha pagpagawas han magraot nga espiritu ngan pagtambal han magkalain-lain nga sakit.
2 Ini an mga ngaran han 12 nga apostol: Hi Simon nga tinatawag nga Pedro ngan hi Andres nga iya bugto; hi Santiago nga anak ni Sebedeo ngan hi Juan nga iya bugto;
3 hi Felipe ngan hi Bartolome; hi Tomas ngan hi Mateo nga parasukot hin buhis; hi Santiago nga anak ni Alfeo, ngan hi Tadeo;
4 hi Simon nga Cananeo,* ngan hi Judas Iscariote nga ha urhi nagtraydor kan Jesus.
5 Ini nga 12 ginsugo ni Jesus ngan gintugon: “Ayaw kamo pagkadto ha diri-Judio nga mga nasud, ngan ayaw kamo pagsulod ha syudad han mga Samaritano.
6 Lugod, padayon nga pamilnga niyo an nagkawara nga mga karnero ha panimalay han Israel.
7 Ha paglakat niyo, pagsangyaw kamo: ‘An Ginhadian han langit hirani na.’
8 Tambala niyo an magsakit ngan mga may liprosi, banhawa an mga patay ngan pagawsa an mga demonyo. Ginkarawat niyo nga waray bayad, ihatag nga waray bayad.
9 Ayaw pagdara hin bulawan, silber, o tumbaga* ha iyo paha nga surudlan hin kwarta,
10 o surudlan han pagkaon ha pagbiyahe, o duha nga bado,* o sandalyas o tungkod, kay an magburuhat takos tagan hin pagkaon.
11 “Bisan diin nga syudad o baryo kamo kumadto, bilnga kon hin-o an takos ngan magpabilin kamo didto tubtob nga bumaya kamo.
12 Pagsulod niyo ha balay, kumustaha an tagbalay.
13 Kon takos ito nga panimalay, mahingada unta hito an kamurayawan nga iyo iginpapahayag, pero kon diri ito takos, magpabilin unta ha iyo an kamurayawan.
14 Ha bisan diin, kon waray kumarawat ha iyo o waray mamati ha iyo mga pulong, paggawas niyo hito nga balay o syudad, ipadpad an tapotapo ha iyo mga tiil.
15 Ha pagkamatuod susumatan ko kamo: Ha Adlaw han Paghukom, mas makuri an sirot hito nga syudad kay ha Sodoma ngan Gomorra.
16 “Kitaa! Sugad kamo hin mga karnero nga ginsusugo ko ngadto ha butnga han mga lobo, salit magin alerto kamo sugad hin mga halas kondi inosente sugad hin mga sarapati.
17 Pag-ikmat kamo ha mga tawo kay dadad-on kamo nira ha mga korte, ngan lalatiguhon kamo ha ira mga sinagoga.
18 Oo, dadad-on kamo ha mga gobernador ngan mga hadi tungod ha akon, basi magpamatuod ha ira ngan ha mga nasud.
19 Pero kon dad-on kamo, ayaw kamo kabaraka kon paonan-o kamo magyayakan o kon ano an iyo igsisiring, kay hibabaroan niyo an iyo yayaknon hito nga takna,
20 kay diri kamo an nagyayakan, kondi an espiritu han iyo Amay an nagyayakan pinaagi ha iyo.
21 Dugang pa, itutubyan han bugto ha kamatayon an iya bugto, ngan han amay an iya anak, ngan kukontrahon han mga anak an ira mga kag-anak ngan ipapapatay hira.
22 Ngan mapupungot ha iyo an ngatanan nga tawo tungod ha akon ngaran, pero an magpailob tubtob ha kataposan amo an matatalwas.
23 Kon pagtimarauton kamo ha usa nga syudad, pakadto kamo ha iba nga lugar, kay ha pagkamatuod susumatan ko kamo: Diri niyo malilibot an ngatanan nga syudad ha Israel tubtob nga umabot an Anak han tawo.
24 “An disipulo diri labaw ha iya magturutdo, o an uripon diri labaw ha iya agaron.
25 Husto la nga an disipulo magin pariho ha iya magturutdo, ngan an uripon magin pariho ha iya agaron. Kon gintawag han mga tawo an agaron han panimalay nga Beelsebub,* sigurado nga ito liwat an itatawag nira ha iya mga sulod-balay!
26 Salit ayaw kamo kahadlok ha ira, kay waray tinahoban nga diri maaabrihan, ngan waray sekreto nga diri hibabaroan.
27 An akon iginsusumat ha iyo hin sekreto, isumat niyo ha ngatanan, ngan an akon iginhuhuring ha iyo, isangyaw niyo tikang ha atop han mga balay.
28 Ayaw kamo kahadlok ha nakakamatay han lawas kondi diri nakakamatay han kalag; lugod, mahadlok kamo ha iya nga nakakabungkag han kalag ngan han lawas ha Gehenna.*
29 An duha nga maya iginbabaligya ha gutiay gud nga kantidad hin sinselyo, diri ba? Pero waray usa hito an nahuhulog ha tuna nga diri hinbabaroan han iyo Amay.
30 Maaram hiya bisan han kadamu han iyo buhok ha ulo.
31 Salit ayaw kahadlok: Mas importante kamo kay ha damu nga maya.
32 “An bisan hin-o nga nasiring ha atubangan han mga tawo nga kahiusa ako niya, ako liwat masiring ha atubangan han akon Amay nga aadto ha langit nga kahiusa ko hiya.
33 Pero an bisan hin-o nga nagsasalikway ha akon ha atubangan han mga tawo, akon liwat isasalikway ha atubangan han akon Amay nga aadto ha langit.
34 Ayaw kamo paghunahuna nga kinanhi ako pagdara hin kamurayawan ha tuna; kinanhi ako diri pagdara hin kamurayawan, kondi hin espada.
35 Kinanhi ako basi pahinaboon an pagkabahin-bahin han anak nga lalaki kontra ha iya amay, han anak nga babaye kontra ha iya iroy, ngan han umagad nga babaye kontra ha iya ugangan nga babaye.
36 Oo, magigin kaaway han usa nga tawo an iya mismo panimalay.
37 An mas nagpapalangga ha amay o iroy kay ha akon diri takos ha akon, ngan an mas nagpapalangga ha anak nga lalaki o anak nga babaye kay ha akon diri takos ha akon.
38 Ngan an bisan hin-o nga diri kumarawat han iya pasakitan nga kahoy* ngan diri sumunod ha akon, diri takos ha akon.
39 An nagpapanalipod han iya kalag mawawad-an hito, kondi an mawad-an han iya kalag tungod ha akon magkakaada hito.
40 “An nakarawat ha iyo nakarawat liwat ha akon, ngan an nakarawat ha akon nakarawat liwat ha nagsugo ha akon.
41 An nakarawat ha propeta tungod kay propeta hiya makarawat hin balos para ha propeta, ngan an nakarawat han matadong nga tawo tungod kay matadong hiya makarawat hin balos para ha matadong nga tawo.
42 Ngan an nahatag hin bisan usa la ka baso hin matugnaw nga tubig ha usa hini nga gudtiay tungod kay disipulo ko hiya, susumatan ko kamo: Diri gud hiya mawawad-an hin balos.”
Mga footnote
^ An “Cananeo” nangangahulogan, “usa nga aktibo.” Itanding ha Lu 6:15.
^ Ha English, copper.
^ O “reserba nga bado.”
^ An tawag kan Satanas, an prinsipe o magmarando han mga demonyo.
^ Kitaa an Apendise 9.
^ Kitaa an Apendise 6.
