Mateo 4:1-25
4 Katapos, gin-giyahan hi Jesus han espiritu ngadto ha kamingawan. Didto ginsulay hiya han Yawa
2 han nagutom hiya katapos hin 40 ka adlaw nga pagpuasa.
3 Hito nga takna, an Paragsulay nagsiring ha iya: “Kon anak ka han Dios, himoa nga tinapay ini nga mga bato.”
4 Pero hi Jesus binaton: “Ini an iginsurat: ‘Diri la ha tinapay nabubuhi an tawo, kondi ha tagsa nga pulong nga nagawas ha baba ni Jehova.’ ”
5 Katapos hito, gindara hiya han Yawa ha baraan nga syudad ngan iginbutang hiya ha igbaw han pader han templo
6 ngan ginsidngan: “Kon anak ka han Dios, layog, kay ini an iginsurat: ‘Susugoon niya an iya mga anghel nga buligan ka basi an imo tiil diri gud mahimalmal ha bato.’ ”
7 Hi Jesus nagsiring: “Nahisurat liwat: ‘Diri mo sarihan hi Jehova nga imo Dios.’ ”
8 Gindara liwat hiya han Yawa ha hitaas gud nga bukid, ngan iginpakita ha iya an ngatanan nga ginhadian han kalibotan ngan an himaya hito,
9 ngan an Yawa nagsiring: “Ini ngatanan ihahatag ko ha imo kon lumuhod ka ngan magsingba ha akon bisan makausa la.”
10 Hi Jesus binaton: “Iwas Satanas! Kay ini an iginsurat: ‘Hi Jehova nga imo Dios an kinahanglan mo singbahon, ngan ha iya ka la mag-alagad.’ ”
11 Hito nga takna ginbayaan hiya han Yawa, ngan nagkaabot an mga anghel basi magmangno ha iya.
12 Han hinbatian ni Jesus nga gindakop hi Juan, kinadto hiya ha Galilea.
13 Katapos, pagbaya niya ha Nazaret, inukoy hiya ha Capernaum ha baybayon han mga distrito han Sebulon ngan Neptali,
14 salit tungod hito, natuman an igintagna pinaagi kan propeta Isaias nga nasiring:
15 “O mga tawo ha Galilea ha tuna han Sebulon ngan Neptali ha dalan ngadto ha dagat, ha weste han Jordan!
16 An mga tawo nga naukoy ha kasisidman nakakita hin duro nga lamrag, ngan para hadton naukoy ha lugar nga nalalandongan han kamatayon, an kahayag sinirang ha ira.”
17 Tikang hito nga panahon hi Jesus nagtikang pagsangyaw nga nasiring: “Pagbasol kamo, kay an Ginhadian han langit hirani na.”
18 Han naglalakat hi Jesus ha baybayon han Dagat han Galilea, nakita niya an magbugto nga hi Simon nga tinatawag nga Pedro ngan hi Andres nga naghuhulog hin pukot ha dagat, kay parapangisda hira.
19 Hiya nagsiring ha ira: “Sunod kamo ha akon, ngan hihimoon ko kamo nga parapangisda hin mga tawo.”
20 Ginbayaan dayon nira an mga pukot ngan sinunod hira ha iya.
21 Samtang nagpapadayon hi Jesus ha paglakat, nakita liwat niya an magbugto nga hira Santiago ngan Juan nga naghuhukot han ira mga pukot ha baluto upod han ira tatay nga hi Sebedeo, ngan iya gintawag hira.
22 Ginbayaan dayon nira an baluto ngan an ira tatay, ngan sinunod ha iya.
23 Katapos, ginlibot ni Jesus an bug-os nga Galilea, nagtutdo ha mga sinagoga* didto ngan nagsangyaw han maopay nga sumat han Ginhadian ngan nagtambal han magkalain-lain nga sakit han mga tawo.
24 Salit nahibantog hiya ha bug-os nga Sirya, ngan gindara ha iya an ngatanan nga nag-aantos hin magkalain-lain nga sakit ngan duro nga kaul-ol, mga ginsaniban hin demonyo, epileptiko, paralisado, ngan iya gintambal hira.
25 Sugad nga resulta, damu nga tawo an sinunod ha iya tikang ha Galilea, Decapolis,* Jerusalem, Judea, ngan ha tabok han Jordan.
