Mateo 3:1-17
3 Inabot an panahon, hi Juan nga Parabaptis nagsangyaw ha kamingawan han Judea,
2 nga nasiring: “Pagbasol kamo, kay an Ginhadian han langit hirani na.”
3 Ha pagkamatuod, hiya an gin-unabi ni propeta Isaias nga nagsiring: “Pamati kamo! May nagsisinggit ha kamingawan: ‘Ig-andam niyo an dalan ni Jehova! Hawani an iya mga aragian.’ ”
4 Barahibo han kamel an bado ni Juan ngan anit an iya paha. An iya pagkaon duron ngan dugos ha kagurangan.
5 Hito nga panahon, an mga tawo tikang ha Jerusalem, ha bug-os nga Judea, ngan ha ngatanan nga lugar ha palibot han Jordan kinadto ha iya,
6 ngan ginbawtismohan niya ha Salog Jordan an mga tawo nga dayag nga nagsumat han ira mga sala.
7 Han nakita niya an damu nga Pariseo ngan Saduseo* nga nagkakaabot, nagsiring hiya ha ira: “Kamo nga katulinan han mga halas, hin-o an nagsiring ha iyo nga makakalikay kamo ha tiarabot nga kangalas han Dios?
8 Salit ipakita ha buhat nga nagbabasol kamo.
9 Ayaw kamo pagsiring ha iyo kalugaringon, ‘Hi Abraham an amon amay.’ Susumatan ko kamo, makakahimo an Dios hin mga anak para kan Abraham tikang hini nga mga bato.
10 An atsa andam na pag-utod han gamot han mga kahoy. Salit an tagsa nga kahoy nga diri nagbubunga hin maopay, uutdon ngan ilalabog ha kalayo.
11 Nagbabawtismo ako ha iyo ha tubig tungod han iyo pagbasol, kondi Hiya nga makanhi mas may awtoridad kay ha akon, ngan diri ako takos maghukas han iya sandalyas. Hiya an magbabawtismo ha iyo pinaagi ha baraan nga espiritu ngan ha kalayo.
12 Ginkakaptan niya an pala nga ginagamit ha pagpalíd,* ngan lilimpyohan niya hin maopay an iya giriokan ngan titirukon an iya trigo ngadto ha bodega, kondi an mga upa iya susunugon ha kalayo nga diri mapaparong.”
13 Katapos, tikang ha Galilea kinadto hi Jesus ha Jordan basi magpabawtismo kan Juan.
14 Kondi nagsiring hi Juan: “Ako an kinahanglan mo bawtismohan, pero ikaw an napakanhi ha akon?”
15 Hi Jesus binaton: “Ayaw ako pagpugngi, kay hini nga paagi kinahanglan buhaton naton an ngatanan nga matadong.” Salit waray na hiya pugngi ni Juan.
16 Katapos mabawtismohan hi Jesus, hinaw-as dayon hiya ha tubig, ngan naabrihan an langit, ngan nakita ni Juan an espiritu han Dios nga sugad hin sarapati nga nalusad ngada kan Jesus.
17 May tingog liwat tikang ha langit nga nagsiring: “Ini an akon Anak nga hinigugma, nga akon nalilipayan.”
