Mateo 8:1-34
8 Paglusad ni Jesus ha bukid, sinunod ha iya an damu nga tawo.
2 Ngan kitaa! may usa nga dinaop ha iya nga may liprosi ngan yinukbo ha iya nga nasiring: “Ginoo, kon karuyag mo, matatambal mo ako.”
3 Salit ginkaptan hiya ni Jesus nga nasiring: “Karuyag ko nga matambal ka.” Ngan nag-opay dayon an iya liprosi.
4 Katapos ginsidngan hiya ni Jesus: “Ayaw gud pagsumat ha bisan hin-o, kondi kadto lugod ha saserdote, ngan paghalad sumala ha iginsugo ha balaud ni Moises sugad nga pamatuod ha ira nga nag-opay ka.”
5 Pagkadto ni Jesus ha Capernaum, usa nga opisyal han kasundalohan an dinaop ha iya ngan nakimalooy:
6 “Ginoo, an akon surugoon naghihinigda na la ha balay kay paralisado, ngan nag-aantos hiya hinduro.”
7 Binaton hi Jesus: “Tatambalon ko hiya pagkadto ko.”
8 Binaton an opisyal: “Ginoo, diri ako takos nga pakadtoon ka ha akon balay, pero pagsiring la nga mag-oopay hiya, ngan matatambal na an akon surugoon.
9 Kay ako liwat, bisan kon may ginpapasakopan nga awtoridad, may sakop ako nga mga sundalo. Kon nasiring ako ha usa, ‘Kadto!’ napakadto hiya, ngan ha usa pa, ‘Kadi!’ nadaop hiya, ngan kon nasiring ako ha akon surugoon, ‘Buhata ini!’ iya ito ginbubuhat.”
10 Han pakabati hito ni Jesus, nahipausa hiya ngan nagsiring ha mga nagsisinunod ha iya: “Susumatan ko kamo han kamatuoran: Waray pa gud ako makakita ha Israel hin sugad hini kadaku nga pagtoo.
11 Kondi damu tikang ha este ngan weste an makanhi ngan malingkod ha lamesa upod nira Abraham, Isaac, ngan Jacob ha Ginhadian han langit.
12 Pero an mga anak han ginhadian ilalabog ngadto ha kasisidman ha gawas. Didto hira mananangis ngan mangingigot an ira mga ngipon.”
13 Katapos, hi Jesus nagsiring ha opisyal han kasundalohan: “Lakat. Matutuman ito uyon ha imo pagtoo.” Ngan hito nga oras natambal an surugoon.
14 Pagkadto ni Jesus ha balay ni Pedro, nakita niya nga nahigda an ugangan nga babaye ni Pedro kay may hiranat.
15 Salit ginkaptan ni Jesus an kamot han babaye, ngan nawara an iya hiranat. Binuhát hiya ngan gin-asikaso hi Jesus.
16 Pero pagkagab-i, damu nga ginsaniban hin demonyo an gindara ha iya han mga tawo, ngan iya ginpagawas tikang ha ira an magraot nga espiritu. Gintambal niya an ngatanan nga may sakit,
17 basi matuman an ginsiring ni propeta Isaias: “Iya ginkuha an aton mga sakit ngan kaul-ol.”
18 Han nakita ni Jesus nga damu nga tawo an nakapalibot ha iya, ginsidngan niya an mga disipulo nga tumabok hira sakay han baluto.
19 Ngan dinaop ha iya an usa nga eskriba ngan nagsiring: “Magturutdo, maupod ako ha imo bisan diin ka kumadto.”
20 Pero hi Jesus nagsiring: “An mga garong may mga lungib ngan an katamsihan may mga salag, kondi an Anak han tawo waray kalugaringon nga urukyan nga makakaturogan.”
21 Katapos, usa han mga disipulo an nagsiring: “Ginoo, tuguti anay ako pag-uli ngan paglubong ha akon tatay.”
22 Hi Jesus nagsiring ha iya: “Padayon nga sunod ha akon, ngan pabay-i an mga patay nga maglubong han ira mga patay.”
23 Pagsakay ni Jesus ha baluto, nangupod an iya mga disipulo.
24 Ngan nagkaada makusog nga subasko ha dagat, salit an baluto ginpupusakan han mga balud. Pero nagkikinaturog la hi Jesus.
25 Salit ira ginpukaw hiya ngan nagsiring: “Ginoo, talwasa kami kay magkakamatay na kami!”
26 Kondi nagsiring hiya ha ira: “Kay ano nga nahahadlok kamo? Kagutiay han iyo pagtoo.” Binuhát hiya ngan ginsaway an hangin ngan an dagat, ngan nagkalma gud ito.
27 Salit nahipausa hira ngan nagsiring: “Hin-o ini nga tawo, nga bisan an hangin ngan an dagat nasugot ha iya?”
28 Pakatabok nira ngadto ha rehiyon han mga taga-Gadara, gintapo hiya hin duha nga lalaki tikang ha lubnganan nga ginsaniban hin demonyo. Duro hira kapintas, salit waray gud naruruyag pag-agi hito nga dalan.
29 Ngan nagsinggit hira: “Ano an imo tuyo ha amon, Anak han Dios? Kinanhi ka ba basi kami sirotan antes an itinanda nga panahon?”
30 Pero ha unhan nira may usa ka panon han mga baboy nga nangangaon.
31 Salit an mga demonyo nakimalooy ha iya: “Kon imo kami pagagawson, pakadtoa kami ha mga baboy.”
32 Ngan binaton hiya: “Sige!” Nagkagawas hira ngan sinulod ha mga baboy, ngan an bug-os nga panon nagdadlagan ngadto ha pangpang, nanlayog ha dagat ngan nagkamatay.
33 Pero an mga nag-aataman han mga baboy nagdagmit pakadto ha syudad, ngan ira iginsumat an ngatanan pati na an nahitabo ha mga tawo nga ginsaniban hin mga demonyo.
34 Ngan an mga tawo ha syudad nagkagawas pagtapo kan Jesus. Han makita nira hiya, nakimalooy hira ha iya nga bumaya ha ira mga distrito.
