Mateo 1:1-25
1 Ini an libro han kasaysayan ni Jesu-Kristo, nga anak* ni David, nga anak ni Abraham:
2 Anak ni Abraham hi Isaac,anak ni Isaac hi Jacob,anak ni Jacob hi Juda ngan an iya kabugtoan;
3 anak ni Juda hira Peres ngan Sera kan Tamar,anak ni Peres hi Hesron,anak ni Hesron hi Ram;
4 anak ni Ram hi Aminadab,anak ni Aminadab hi Nason,anak ni Nason hi Salmon.
5 Anak ni Salmon hi Boas kan Rahab,anak ni Boas hi Obed kan Ruth,anak ni Obed hi Jesse;
6 anak ni Jesse hi Hadi David. Anak ni David hi Solomon ha asawa ni Urias;
7 anak ni Solomon hi Rehoboam,anak ni Rehoboam hi Abias,anak ni Abias hi Asa;
8 anak ni Asa hi Jehosapat,anak ni Jehosapat hi Jehoram,anak ni Jehoram hi Usias;
9 anak ni Usias hi Jotam,anak ni Jotam hi Ahas,anak ni Ahas hi Hesekias;
10 anak ni Hesekias hi Manases,anak ni Manases hi Amon,anak ni Amon hi Josias.
11 Anak ni Josias hi Jeconias ngan an iya kabugtoan. Natawo hira antes mabihag ha Babilonya.
12 Katapos hira dad-on nga bihag ha Babilonya, natawo hi Sealtiel nga anak ni Jeconias.Anak ni Sealtiel hi Serubabel;
13 anak ni Serubabel hi Abiud,anak ni Abiud hi Eliakim,anak ni Eliakim hi Asor;
14 anak ni Asor hi Sadok,anak ni Sadok hi Akim,anak ni Akim hi Eliud;
15 anak ni Eliud hi Eleazar,anak ni Eleazar hi Matan,anak ni Matan hi Jacob;
16 Anak ni Jacob hi Jose nga bana ni Maria nga nanay ni Jesus, an Kristo.
17 Salit an ngatanan nga henerasyon tikang kan Abraham tubtob kan David, 14 nga henerasyon, tikang kan David tubtob han pagkabihag ha Babilonya, 14 nga henerasyon, ngan tikang ha pagkabihag ha Babilonya tubtob han Kristo, 14 nga henerasyon.
18 Sugad hini an katawo ni Jesu-Kristo: Han may ginkasabotan na ha pagpakasal an iya nanay nga hi Maria ngan hi Jose, nagburod hi Maria pinaagi han baraan nga espiritu antes hira magpakasal.
19 Pero tungod kay hi Jose nga iya bana* matadong ngan nadiri nga maalohan hi Maria ha publiko, nagplano hiya nga makigdiborsyo ha iya hin sekreto.
20 Kondi katapos hunahunaon ini, nagpakita ha iya ha inop an anghel ni Jehova nga nasiring: “Jose, anak ni David, ayaw kahadlok nga dad-on ha imo balay hi Maria nga imo asawa, kay burod hiya pinaagi han baraan nga espiritu.
21 Manganganak hiya hin lalaki ngan pagngangaranan mo hin Jesus, kay hiya an magtatalwas han iya katawohan tikang ha ira mga sala.”
22 Nahitabo ini basi matuman an ginyakan ni Jehova pinaagi han iya propeta nga nasiring:
23 “Kitaa! An birhen magbuburod ngan manganganak hin lalaki, ngan ira pagngangaranan hiya hin Emmanuel” nga nangangahulogan, “Kaupod Naton an Dios.”
24 Pagmata ni Jose, ginbuhat niya an iginsugo han anghel ni Jehova, ngan igin-upod niya ha balay an iya asawa.
25 Kondi tubtob nga nanganak hi Maria, hi Jose waray makighilawas ha iya. Ngan Jesus an iginngaran ni Jose ha bata.
Mga footnote
^ Ha Griego mahimo ini mangahulogan hin “apo” o “tulin.”
^ Ha kustomre han mga Judio, an nobyo gintatawag nga bana.
