Mateo 24:1-51
24 Han tipagawas na hi Jesus ha templo, dinaop ha iya an mga disipulo basi ipakita ha iya an bug-os nga templo.
2 Nagsiring hiya ha ira: “Diri ba niyo nakikita ini ngatanan? Ha pagkamatuod susumatan ko kamo: Waray gud usa nga bato nga magpapabilin ha bawbaw han usa nga bato nga diri marurumpag.”
3 Han nalingkod hiya ha Bukid han mga Olibo, dinaop ha iya an mga disipulo nga hira la ngan nagsiring: “Sumati kami, San-o ini mahitatabo, ngan ano an magigin tigaman han imo presensya* ngan han ikatarapos hini nga sistema?”
4 Ngan hi Jesus binaton: “Pag-ikmat nga diri kamo maisimang han bisan hin-o,
5 kay damu an maabot nga magamit han akon ngaran, nga masiring, ‘Ako an Kristo,’ ngan damu an maisisimang.
6 Makakabati kamo hin mga girra ngan mga sumat mahitungod han girra. Ayaw kamo kahadlok, kay kinahanglan mahitabo ini, kondi diri pa ito an kataposan.
7 “An mga nasud makikig-away ha iba nga nasud ngan an mga ginhadian makikig-away ha iba nga ginhadian, ngan magkakaada gutom ngan mga linog ha iba-iba nga lugar.
8 Ini ngatanan nga panhitabo tinikangan pa la han mga kasakitan.*
9 “Pasasakitan ngan papatayon kamo han mga tawo, ngan mapupungot ha iyo an ngatanan nga nasud tungod ha akon ngaran.
10 Damu liwat an mabaya ha pagtoo, magtatraydor ha usa kag usa ngan masisina ha usa kag usa.
11 Damu an maabot nga buwa nga propeta ngan damu an ira maisisimang,
12 ngan tungod han pagtikadamu han karaotan magtutugnaw an gugma han kadam-an.
13 Pero an magpailob tubtob ha kataposan amo an matatalwas.
14 Ngan inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan sunod hito an kataposan maabot.
15 “Salit kon makita niyo nga natindog ha baraan nga lugar an mangil-ad nga butang nga hinungdan han kabungkagan, sugad han gin-unabi ni propeta Daniel, (sadang gumamit hin pagsabot an magbarasa),
16 an mga aadto ha Judea sadang pumalagiw ngadto ha kabukiran.
17 An aadto ha atop diri na lumusad pagkuha hin mga butang ha iya balay,
18 ngan an aadto ha uma diri na umuli pagkuha han iya pantungbaw nga panapton.
19 Kairo han mga burod ngan han may minasus-an nga ginmamangnoan hito nga panahon!
20 Pag-ampo kamo pirme nga an iyo pagpalagiw diri mahituman ha kathagkot, o ha adlaw han Sabbath,
21 kay maabot an daku nga kasakitan nga waray pa mahitabo tikang ha tinikangan han kalibotan tubtob yana, ngan diri na gud mahitatabo utro.
22 Ha pagkamatuod, kon diri pahaliputon ito nga mga adlaw, waray tawo nga matatalwas. Pero tungod han mga pinili, pahahaliputon ito nga mga adlaw.
23 “Kon may magsiring ha iyo, ‘Kitaa! Aanhi an Kristo,’ o ‘Aadto hiya!’ ayaw kamo pagtuod.
24 Kay maabot an buwa nga mga Kristo ngan buwa nga mga propeta ngan magpapakita hin dagku nga tigaman ngan urusahon nga mga butang basi isimang bisan an mga pinili, kon posible.
25 Hinumdumi! Ginpahamangnoan ko na kamo.
26 Salit kon an mga tawo magsiring ha iyo, ‘Kitaa! Aadto hiya ha kamingawan,’ ayaw kamo paggawas. ‘Kitaa! Aadto hiya ha kwarto,’ ayaw kamo pagtuod.
27 Kay an presensya han Anak han tawo magigin pariho han kidlat nga naglalamrag ha bug-os nga kalangitan, tikang ha este tubtob ha weste.
28 Kon hain an patay, didto matitirok an mga agila.
29 “Katapos gud han kasakitan hito nga panahon, an adlaw magsisirom, an bulan diri maglalamrag, an mga bitoon magkakahulog tikang ha langit, ngan mababay-og an gamhanan nga mga butang ha langit.
30 Ngan makikita ha langit an tigaman han Anak han tawo, ngan an ngatanan nga tribo ha tuna magpupukpok han ira dughan tungod ha kasubo, ngan makikita nira an Anak han tawo nga nalusad upod han mga dampog ha langit nga may gahum ngan daku nga himaya.
31 Ngan susugoon niya an iya mga anghel ngan pinaagi hin daku nga tunog han trumpeta, ira titirukon an iya mga pinili tikang ha upat nga direksyon han hangin, tikang ha usa nga kataposan han langit tubtob ha usa nga kataposan.
32 “Sugad nga ehemplo, tagda an kahoy nga igera: Kon tumubo na an mga sanga hito ngan manaringsing an mga dahon, maaram kamo nga hirani na an katpaso.
33 Sugad man, kon makita na niyo ini ngatanan nga butang, makakasiguro kamo nga hirani na hiya ha mga purtahan.
34 Ha pagkamatuod, susumatan ko kamo nga diri gud malabay ini nga henerasyon tubtob nga mahitabo ini ngatanan.
35 An langit ngan an tuna mawawara, pero an akon mga pulong diri gud mawawara.
36 “Mahitungod hito nga adlaw ngan oras waray maaram, bisan an mga anghel ha langit o an Anak, kondi an Amay la.
37 Kay an presensya han Anak han tawo magigin pariho ha mga adlaw ni Noe.
38 Ha mga adlaw antes han Baha, an mga tawo nangangaon, nanginginom, nangangasawa an kalalakin-an ngan ginpapangasawa an kababayin-an, tubtob nga sinulod hi Noe ha arka.
39 Waray hira maghatag hin atensyon tubtob nga inabot an Baha ngan igin-anod hira ngatanan. Magigin sugad liwat hito an presensya han Anak han tawo.
40 May duha nga lalaki ha uma: An usa kukuhaon ngan an usa babayaan,
41 ngan may duha nga babaye nga naggigiling: An usa kukuhaon ngan an usa babayaan.
42 Salit padayon nga magbantay, kay diri kamo maaram kon ano nga adlaw maabot an iyo Ginoo.
43 “Pero hibaroi niyo: Kon an tagbalay maaram kon ano nga oras maabot an kawatan, diri gud hiya makaturog basi waray makasulod ha iya balay.
44 Tungod hini, mag-andam liwat kamo kay an Anak han tawo maabot ha oras nga diri niyo ginlalaoman.
45 “Hin-o gud an matinumanon ngan maaramon nga uripon nga gintaporan han Agaron ha paghatag hin pagkaon ha husto nga panahon ha iya mga surugoon ha panimalay?
46 Malipayon ito nga uripon kon ha pag-abot han iya Agaron ito an iya ginbubuhat!
47 Ha pagkamatuod susumatan ko kamo: Iya itatapod hito nga uripon an ngatanan nga iya panag-iya.
48 “Pero kon an uripon maraot ngan magsiring ha kalugaringon, ‘An akon Agaron naglalangan,’
49 ngan iya pangastiguhon an iya mga igkasi-uripon, magkinaon ngan mag-ininom upod han kilala nga mga parahubog,
50 an Agaron hito nga uripon maabot ha adlaw nga diri niya ginlalaoman ngan ha oras nga diri niya hinbabaroan.
51 Ngan duro nga sirot an ipapadapat ha iya ngan ilalabog hiya ha hinmumutangan han mga hipokrito. Didto hiya magtatangis ngan mangingigot an iya mga ngipon.
