Mateo 28:1-20
28 Katapos han Sabbath, ha kaagahon han primero nga adlaw han semana, hi Maria Magdalena ngan an usa pa nga Maria nagpakadto ha lubnganan basi kitaon ito.
2 Ngan kitaa! Naglinog hin makusog, kay usa nga anghel ni Jehova an linusad tikang ha langit ngan ginkuha an bato ha ganggang han lubnganan, ngan liningkod hiya ha bato.
3 Malamrag hiya sugad hin kidlat, ngan an iya bado sugad kabusag han niebe.
4 Ngan tungod ha kahadlok ha iya, nangurog an mga bantay ngan waray hira pakakiwa.
5 Pero an anghel nagsiring ha kababayin-an: “Ayaw kamo kahadlok, maaram ako nga ginbibiling niyo hi Jesus nga iginraysang ha kahoy.
6 Waray na hiya dinhi kay ginbanhaw na hiya, sugad han iya ginsiring. Kadi, kitaa niyo an ginlubngan ha iya.
7 Kadto kamo dayon ha iya mga disipulo ngan sumati hira nga ginbanhaw na hiya. Mag-uuna hiya ha iyo ngadto ha Galilea, ngan makikita niyo hiya didto. Kinanhi ako basi isumat ini ha iyo.”
8 Salit binaya dayon hira ha lubnganan, nga nahahadlok ngan duro an kalipay. Dinalagan hira basi sumatan an iya mga disipulo.
9 Ngan gintapo hira ni Jesus ngan nagsiring: “Maopay nga adlaw!” Dinaop hira ngan yinukbo ha iya tiilan.
10 Hi Jesus nagsiring ha ira: “Ayaw kamo kahadlok! Kadto kamo ha akon kabugtoan, ngan sumati hira basi kumadto ha Galilea, ngan makikita nira ako didto.”
11 Samtang tikadto an kababayin-an, an iba nga bantay kinadto ha syudad ngan ginsumatan an punoan nga mga saserdote han ngatanan nga nahitabo.
12 Ngan nakigkatirok an punoan nga mga saserdote ha katigurangan basi magsarabot, ngan katapos gintagan nira hin damu nga sinselyo nga silber an bantay nga mga sundalo
13 ngan nagsiring: “Ipanumat niyo, ‘An mga disipulo ni Jesus kinadto han gab-i ngan ginkawat an iya patay nga lawas samtang nangangaturog kami.’
14 Kon makabati hini an gobernador, kukombinsihon namon hiya ngan ayaw kamo kabaraka.”
15 Salit ginkarawat nira an salapi ngan gintuman an iginsugo ha ira, ngan tubtob yana ito nga sumat an gintotoohan han mga Judio.
16 Pero an 11 nga disipulo kinadto ha bukid ha Galilea diin makikigkita ha ira hi Jesus.
17 Pakakita nira ha iya, yinukbo hira, pero an iba nagruhaduha.
18 Ngan hi Jesus dinaop ngan nagsiring ha ira: “An ngatanan nga awtoridad ha langit ngan ha tuna iginhatag ha akon.
19 Salit kadto kamo ha mga tawo han ngatanan nga nasud ngan tutdui hira basi magin akon mga disipulo, bawtismuhi hira ha ngaran han Amay ngan han Anak ngan han baraan nga espiritu,
20 tutdui hira ha pagtuman han ngatanan nga akon iginsugo ha iyo. Ngan hinumdumi niyo nga kaupod niyo ako ha ngatanan nga adlaw tubtob ha ikatarapos hini nga sistema.”
