Mateo 25:1-46
25 “An Ginhadian han langit pariho hin napulo nga birhen nga nagdara han ira mga lampara ngan ginawas pagtapo ha karaslon nga lalaki.
2 An lima ha ira diri-maaramon, ngan an lima maaramon.
3 Kay an mga diri-maaramon nagdara han ira mga lampara kondi waray pagdara hin reserba nga lana,
4 pero an mga maaramon nagdara han ira mga lampara ngan hin reserba nga lana.
5 Han waray pa aabot an karaslon nga lalaki, ginpiraw hira ngan nanhingaturog.
6 Ha katutnga han gab-i may nagsinggit, ‘Aadi na an karaslon nga lalaki! Gawas na kamo pagtapo ha iya.’
7 Binuhát an napulo nga birhen ngan gin-andam an ira mga lampara.
8 An mga diri-maaramon nagsiring ha mga maaramon, ‘Tagi kami han iyo lana kay mapaparong na an amon mga lampara.’
9 An mga maaramon binaton: ‘Bangin magkulang ini ha aton ngatanan. Kadto lugod kamo ha parabaligya ngan palit kamo han para ha iyo.’
10 Paglakat nira basi pumalit, inabot an karaslon nga lalaki, ngan an mga birhen nga andam na inupod ha iya ngadto ha panagtawo ha kasal, ngan ginsadhan an purtahan.
11 Katapos, inabot an lima nga birhen ngan nagsiring, ‘Ginoo, Ginoo, abrihi kami!’
12 Binaton hiya, ‘Susumatan ko kamo han kamatuoran, diri ako nakilala ha iyo.’
13 “Salit, padayon kamo nga magbantay kay diri kamo maaram han adlaw ngan han oras.
14 “An Ginhadian pariho liwat hin tawo nga mabiyahe ha iba nga nasud. Antes hiya lumakat, gintawag niya an iya mga uripon ngan igintapod ha ira an iya mga panag-iya.
15 May gintagan hiya hin lima ka talanton, may gintagan hin duha, ngan may gintagan hin usa. An kada tagsa gintagan sumala han ira abilidad, katapos nagbiyahe hiya.
16 An usa nga kinarawat hin lima ka talanton linakat dayon ngan igin-negosyo ito ngan nakaganansya hin lima.
17 Sugad man, an kinarawat hin duha nakaganansya hin duha.
18 Pero an uripon nga kinarawat hin usa la, linakat ngan iginlubong ha tuna an silber nga kwarta han iya agaron.
19 “Paglabay hin maiha nga panahon, inabot an agaron hito nga mga uripon ngan nakigtuhay ha ira.
20 Salit an kinarawat hin lima ka talanton dinaop dara an lima pa ka talanton, nga nasiring, ‘Agaron, gintaporan mo ako hin lima ka talanton; kitaa, nakaganansya ako hin lima.’
21 An iya agaron nagsiring: ‘Maopay an imo ginbuhat, matataporan ngan matinumanon nga uripon! Tungod kay matinumanon ka ha gutiay nga butang, tataporan ko ikaw hin damu nga butang. Malipay ka upod han imo agaron.’
22 Ngan an kinarawat hin duha ka talanton dinaop ngan nagsiring: ‘Agaron, gintaporan mo ako hin duha ka talanton; kitaa, nakaganansya ako hin duha.’
23 An agaron nagsiring: ‘Maopay an imo ginbuhat, matataporan ngan matinumanon nga uripon! Tungod kay matinumanon ka ha gutiay nga butang, tataporan ko ikaw hin damu nga butang. Malipay ka upod han imo agaron.’
24 “Ha urhi dinaop an uripon nga kinarawat hin usa ka talanton ngan nagsiring: ‘Agaron, maaram ako nga istrikto ka, gin-aani mo an waray mo igsabwag ngan gintitirok mo adton diri ikaw an nagpalíd.
25 Salit tungod ha kahadlok, linakat ako basi ilubong ha tuna an imo talanton. Adi ibabalik ko na ha imo.’
26 An agaron nagsiring: ‘Maraot ngan hubya nga uripon, diri ba maaram ka nga gin-aani ko an waray ko igsabwag ngan gintitirok adton diri ako an nagpalíd?
27 Igindeposito mo unta ha bangko an akon silber nga kwarta, basi pag-abot ko makuha ko ito pati an tubo.
28 “ ‘Kon sugad, kuhaa ha iya an talanton ngan ihatag ha usa nga may napulo ka talanton.
29 Kay an bisan hin-o nga may-ada na, dudugangan pa ngan magigin hura hiya, pero an waray, kukuhaon bisan an aada ha iya.
30 Ilabog ha kasisidman ha gawas an waray pulos nga uripon. Didto hiya magtatangis ngan mangingigot an iya mga ngipon.’
31 “Pag-abot han Anak han tawo nga may daku nga awtoridad upod an ngatanan nga anghel, malingkod hiya ha iya harangdon nga trono.
32 Ngan an ngatanan nga nasud titirukon ha iya atubangan, ngan iya bubulagbulagon an mga tawo pariho ha ginbubuhat han paraataman kon iginbubulag niya an mga karnero ha mga kanding.
33 Iya ibubutang an mga karnero ha iya too, kondi an mga kanding ha iya wala.
34 “Katapos, an Hadi masiring ha mga aada ha iya too: ‘Kadi kamo nga binendisyonan han akon Amay, panunda niyo an Ginhadian nga igin-andam ha iyo tikang pa ha tinikangan han kalibotan.
35 Kay han ginugutom ako, iyo ako ginpakaon; han gin-uuhaw ako, iyo ako ginpainom. Han estranghero ako, iyo ako gin-abiabi;
36 han waray ako iginsusul-ot, iyo ako gintagan hin bado. Han nagkasakit ako, iyo ako ginmangnoan. Han napriso ako, iyo ako ginbisita.’
37 Ngan an mga magtadong masiring ha iya: ‘Ginoo, kakan-o ka namon nakita nga ginugutom ngan ginpakaon ka namon, o gin-uuhaw ngan ginpainom ka namon?
38 Kakan-o ka namon nakita nga nagin estranghero ngan gin-abiabi ka namon, o waray iginsusul-ot ngan gintagan ka namon hin bado?
39 Kakan-o ka namon nakita nga may sakit o priso ngan ginbisita ka namon?’
40 An Hadi mabaton, ‘Ha pagkamatuod susumatan ko kamo: Anoman an ginbuhat niyo ha usa nga pinakaubos hini nga akon kabugtoan, ginbuhat niyo ha akon.’
41 “Ngan hiya masiring ha mga aada ha iya wala: ‘Iwas kamo ha akon, kamo nga ginhukman han Dios ngadto ha kalayo nga waray kataposan* nga igin-andam para ha Yawa ngan ha iya mga anghel.
42 Kay han ginugutom ako, waray ako niyo pakaona; ngan han gin-uuhaw ako, waray ako niyo painoma.
43 Han estranghero ako, waray ako niyo abiabiha; han waray ako iginsusul-ot, waray ako niyo tagi hin bado; han may sakit ngan priso ako, waray ako niyo mangnoi.’
44 Ngan mabaton liwat hira: ‘Ginoo, kakan-o ka namon nakita nga ginugutom o gin-uuhaw o nagin estranghero o waray iginsusul-ot o may sakit o priso ngan waray ka namon asikasoha?’
45 Hiya mabaton, ‘Ha pagkamatuod, susumatan ko kamo: Anoman an waray niyo buhata ha usa hini nga mga ubos, waray niyo buhata ha akon.’
46 Ngan huhukman hira hin permanente nga kamatayon, pero an magtadong makarawat hin kinabuhi nga waray kataposan.”
Mga footnote
^ Nangangahulogan ini hin dayon nga kabungkagan. Kitaa an “Gehenna” ha Apendise 9.
