Mateo 6:1-34
6 “Pag-ikmat kamo nga an iyo pagkamatadong diri magin pakita la ha mga tawo, kay kon ito an iyo buhaton waray kamo bendisyon tikang ha iyo Amay ha langit.
2 Salit kon maghahatag ka tungod ha kalooy, ayaw ito igbandilyo* sugad han ginbubuhat han mga hipokrito ha mga sinagoga ngan ha kakalsadahan basi hira dayawon han mga tawo. Ha pagkamatuod, susumatan ko kamo: Gindadayaw hira han mga tawo pero waray hira balos tikang ha Dios.
3 Pero kon maghahatag ka tungod ha kalooy, ayaw ipahibaro ha imo wala nga kamot an ginbubuhat han imo too,
4 basi an imo paghatag tungod ha kalooy diri hibaroan, ngan an imo Amay nga sekreto nga nagkikita magbibendisyon ha imo.
5 “Sugad man, kon nag-aampo kamo ayaw niyo subara an mga hipokrito, kay naruruyag hira pag-ampo nga natindog ha mga sinagoga ngan ha eskina han mga kalsada basi makita han mga tawo. Ha pagkamatuod, susumatan ko kamo: Gindadayaw hira han mga tawo pero waray hira balos tikang ha Dios.
6 Kondi kon mag-ampo ka, sulod ha imo kwarto ngan katapos sadhan ito, pag-ampo ha imo Amay ha langit. Ngan an imo Amay nga sekreto nga nagkikita magbibendisyon ha imo.
7 Kon nag-aampo kamo, ayaw pag-uroutroha an amo gihapon nga mga pulong, sugad han ginbubuhat han mga tawo han mga nasud, kay kahuna nira nga pamamatian hira tungod han ira damu nga pulong.
8 Salit ayaw pagsubad ha ira, kay an Dios nga iyo Amay maaram han iyo panginahanglan antes pa kamo mangaro ha iya.
9 “Mag-ampo kamo ha sugad hini nga paagi:
“ ‘Amay namon ha langit, pagbaraanon an imo ngaran.
10 Kumanhi unta an imo Ginhadian. Matuman an imo kaburut-on dinhi ha tuna sugad han ha langit.
11 Tagi kami hin pagkaon* para yana nga adlaw,
12 ngan pasayloa kami han amon mga sala, sugad han amon pagpasaylo ha nakakasala ha amon.
13 Buligi kami nga diri madaog han pagsulay, ngan talwasa kami tikang ha usa nga maraot.’
14 “Kay kon pasayloon niyo an mga tawo han ira mga sala, papasayloon liwat kamo han iyo Amay ha langit.
15 Pero kon diri niyo pasayloon an mga tawo han ira mga sala, diri liwat papasayloon han iyo Amay an iyo mga sala.
16 “Kon magpupuasa kamo, ayaw pagsubad ha pakita la nga kasubo han mga hipokrito, kay ginpapabay-an nira an ira hitsura basi makita han mga tawo nga nagpupuasa hira. Ha pagkamatuod, susumatan ko kamo: Gindadayaw hira han mga tawo pero waray hira balos tikang ha Dios.
17 Kondi kon nagpupuasa ka, paghiram-os ngan paghiso
18 basi diri makita han mga tawo nga nagpupuasa ka, ngan an imo la Amay ha langit an makakita. Tungod hito, an imo Amay nga sekreto nga nagkikita magbibendisyon ha imo.
19 “Ayaw na kamo pagtinirok hin bahandi ha tuna, kay kukutkuton la ito han mga insekto o tatauyon ngan kakawaton.
20 Lugod, pagtirok kamo hin bahandi ha langit, kay didto diri ito kukutkuton han mga insekto, diri tatauyon ngan diri kakawaton.
21 Kay kon hain an imo bahandi, aadto liwat an imo kasingkasing.
22 “An lampara han lawas amo an mata. Salit kon an imo mata simple,* magigin malamrag an imo bug-os nga lawas.
23 Pero kon an imo mata maraot,* magigin masirom an imo bug-os nga lawas. Kon an kalamrag nga aada ha imo kasisidman ngay-an, masirom gud ito!
24 “Waray makakagserbi ha duha nga agaron kay masisina hiya ha usa ngan hihigugmaon an usa, o magpapabilin hiya ha usa ngan babayaan an usa. Diri niyo mahimo pagdunganon an pagpauripon ha Dios ngan ha Karikohan.*
25 “Tungod hini nasiring ako ha iyo: Ayaw na kamo pagkinabaraka han iyo kalag* kon ano an iyo kakaunon o iinumon, o kon ano an iyo igbabado. Diri ba mas importante an kalag kay ha pagkaon ngan an lawas kay ha bado?
26 Obserbari hin maopay an mga tamsi. Diri hira nagtatanom o nag-aani o nagtitirok han mga inani ngadto ha bodega, pero ginpapakaon hira han iyo Amay ha langit. Diri ba mas importante kamo kay ha ira?
27 Hin-o ha iyo an makakadugang hin bisan gutiay la nga kahilaba* han iya kinabuhi tungod ha kabaraka?
28 Mahitungod liwat han iyo igbabado, kay ano nga nababaraka kamo? Mahibaro kamo hin leksyon tikang ha mga bukad ha kapatagan kon paonan-o hira nabubuhi. Diri hira nagtatrabaho o nagtatahi hin bado,
29 pero susumatan ko kamo nga hi Solomon, bisan kon harangdon, waray makagbado hin sugad kaopay han mga bukad.
30 Kon ginbabadoan han Dios an mga tanom ha kapatagan nga aanhi yana kondi buwas ilalabog ha kalayo, diri ba mas pagbabadoan gud kamo, kamo nga gutiay an pagtoo?
31 Salit ayaw gud kamo kabaraka nga masiring, ‘Ano an amon kakaunon?’ o ‘Ano an amon iinumon?’ o ‘Ano an amon igsusul-ot?’
32 Kay ini ngatanan an gintitinguha gud han mga tawo ha kalibotan. An iyo Amay ha langit maaram nga ginkikinahanglan niyo ini ngatanan.
33 “Kon sugad, padayon nga unaha niyo an pagpamiling han Ginhadian ngan han iya katadongan, ngan ini ngatanan idudugang ha iyo.
34 Salit ayaw gud kamo kabaraka mahitungod han sunod nga adlaw, kay an kada adlaw may kalugaringon nga mga kabaraka. An problema la yana nga adlaw an hunahunaa.
Mga footnote
^ Ha literal, “ayaw pagpatunog hin trumpeta ha imo unahan.”
^ Ha literal, “tinapay.”
^ O “sinsero; nakapokus.”
^ O “aw-anon.”
^ O “Kayamanan.”
^ O “kinabuhi.”
^ Ha literal, “usa ka siko,” nga mga 17.5 ka pulgada an kahilaba.
