Lucas 8:1-56
8 Katapos gud hito, kinadto hi Jesus ha mga syudad ngan mga baryo basi magsangyaw ngan magpasamwak han maopay nga sumat han Ginhadian han Dios. Kaupod niya an 12 nga apostol,
2 ngan an pipira nga kababayin-an nga gintalwas tikang ha magraot nga espiritu ngan gintambal an mga sakit, hi Maria nga gintatawag nga Magdalena nga pito nga demonyo an ginpagawas ha iya;
3 hi Juana nga asawa ni Cusa, an tinaporan ni Herodes; hi Susana, ngan damu pa nga kababayin-an nga naggamit han ira panag-iya ha pag-asikaso kan Jesus ngan ha iya mga apostol.
4 Han nagtirirok an damu nga tawo ngan an mga nag-inupod kan Jesus han kinadto hiya ha mga syudad, naghatag hiya hin ilustrasyon:
5 “Usa nga magsarabwag an ginawas basi magsabwag hin binhi. Samtang nagsasabwag hiya, an iba hito nahulog ha ligid han dalan ngan gintamak-tamakan, ngan ginpanuktok ito han nagkakalupad nga katamsihan.
6 An iba nahulog ha daku nga bato, ngan han pagtubo, nauga kay waray tubig.
7 An iba nahulog ha katunokan, ngan natabonan ito han mga tunok nga dinungan pagtubo.
8 An iba nahulog ha maopay nga tuna, ngan han pagtubo, namunga hin 100 ka pilo.” Katapos niya ig-istorya ini, nagsiring hiya ha daku nga tingog: “Hiya nga may mga talinga ha pagpamati, mamati.”
9 Pero ginpakianhan hiya han mga disipulo kon ano an kahulogan hini nga ilustrasyon.
10 Binaton hiya: “An sagrado nga mga tinago han Ginhadian han Dios iginpapasabot ha iyo, kondi ha iba, mga ilustrasyon la. Salit bisan kon nagkikinita, diri hira nakakakita, ngan bisan kon nagpipinamati, diri hira nakakasabot han kahulogan.
11 Ini an kahulogan hini nga ilustrasyon: An binhi amo an pulong han Dios.
12 An nahisabwag ha ligid han dalan amo an mga namati, katapos inabot an Yawa ngan ginkuha an pulong ha ira kasingkasing basi diri hira tumoo ngan diri matalwas.
13 An nahisabwag ha daku nga bato amo an mga malipayon nga nagkarawat han pulong han hinbatian nira ito, kondi waray makagamot; tinoo hira hin madaliay la, pero pag-abot han pagsari waray na hira tumoo.
14 Mahitungod han nahisabwag ha katunokan, hira an namati, pero tungod kay nahisimang hira han kabaraka, karikohan, ngan kaliawan ha kinabuhi, natabonan hira ngan waray mahinog an mga bunga.
15 Ngan an nahisabwag ha maopay nga tuna amo an nagtitipig han pulong ngan namumunga nga may pagpailob katapos nira mamati nga may makinarawaton nga kasingkasing.
16 “Waray nagdadagkot hin lampara ngan gintatakloban o iginbubutang ito ha ilarom han katre, lugod iginbubutang ito ha burutangan han lampara basi an mga nasulod ha balay makakita han kalamrag.
17 Kay waray nakatago nga diri mabubuhayhag o waray gintahoban hin maopay nga diri hibabaroan ngan diri mahigagawas.
18 Salit tagi hin atensyon kon paonan-o kamo namamati, kay an may-ada na, dudugangan pa, pero an waray, kukuhaon bisan an iya ginhuhunahuna nga aada ha iya.”
19 Kinadto kan Jesus an iya nanay ngan kabugtoan, pero waray hira makadaop ha iya kay damu an tawo.
20 Salit may nagsiring ha iya: “Nagtitinindog ha gawas an imo nanay ngan kabugtoan kay karuyag nira makigkita ha imo.”
21 Binaton hiya: “Ini hira nga namamati han pulong han Dios ngan nagbubuhat hito amo an akon nanay ngan an akon kabugtoan.”
22 Usa ka adlaw, hiya ngan an iya mga disipulo sinakay ha usa nga baluto, ngan nagsiring hiya ha ira: “Kadto kita ha tabok hini nga linaw.” Salit naglayag hira.
23 Kondi han naglalayag na hira, nahingaturog hiya. Ngan nagkaada hin subasko ha linaw, ngan an baluto nasusudlan hin tubig salit nameligro hira.
24 Salit ginpukaw nira hiya: “Magturutdo, Magturutdo, magkakamatay na kami!” Pagmata niya, ginsaway niya an hangin ngan an mabalud nga katubigan, salit naglinaw ngan nagkalma ito.
25 Katapos nagsiring hiya ha ira: “Hain an iyo pagtoo?” Kondi tungod kay nahadlok hira ngan nahipausa, nagsiring hira: “Hin-o gud ba ini, kay ginsusugo niya bisan an hangin ngan an tubig, ngan nasugot ito ha iya?”
26 Dinuong hira ha baybayon han rehiyon han mga taga-Gerasa ha tabok han Galilea.
27 Kondi paghaw-as niya, gintapo hiya hin lalaki tikang ha syudad nga ginsaniban hin mga demonyo. Maiha na nga diri hiya nagbabado, ngan diri hiya naukoy ha balay kondi ha lubnganan.
28 Pakakita niya kan Jesus, ginuliat hiya ngan hinapa ha iya atubangan ngan nagsiring hin makusog: “Ano an imo tuyo ha akon, Jesus, Anak han Gihitaasi nga Dios? Nakikimalooy ako ha imo, ayaw ako pagpasakiti.”
29 (Kay ginsinugo ni Jesus an maraot nga espiritu nga gumawas ha lalaki. Maiha na nga kontrolado hiya hito nga demonyo. Agsob hiya gapuson hin kadena ha mga kamot pati ha mga tiil ngan ginbabantayan pirme, pero gin-uutod niya ito ngan gindadara hiya han demonyo ngadto ha mga lugar nga mamingaw.)
30 Ginpakianhan hiya ni Jesus: “Ano an imo ngaran?” Binaton hiya: “Lehiyon,” kay damu nga demonyo an sinulod ha iya.
31 Ngan nagpinakimalooy hira ha iya nga diri hira pakadtoon ha kahiladman.
32 May panon hin damu nga baboy nga nangangaon ha bukid, salit nakimalooy hira nga pasudlon hira ha mga baboy. Ngan iya gintugotan hira.
33 An mga demonyo ginawas ha lalaki ngan sinulod ha mga baboy, ngan an panon nagdadlagan ngadto ha pangpang, nanlayog ha linaw ngan nagkalulumos.
34 Pero han nakita han mga nag-aataman hito an nahitabo, nagdadlagan hira ngan nanumat ha syudad ngan ha kaumhan.
35 Katapos kinadto an mga tawo basi makita an nahitabo, ngan dinaop hira kan Jesus ngan nakita nira nga nakabado ngan maopay na an panhunahuna han lalaki nga gin-gawsan hin mga demonyo. Nalingkod hiya ha may tiil ni Jesus, ngan nahadlok gud hira.
36 An nagpakakita hito nagsumat ha ira kon paonan-o nag-opay an lalaki nga ginsaniban hin mga demonyo.
37 Salit ginhangyo hi Jesus han damu nga tawo ha Gerasa nga bumaya hiya kay nahahadlok gud hira. Tungod hito sinakay hiya ha baluto ngan binaya.
38 Pero an lalaki nga gin-gawsan hin mga demonyo nagpinakimalooy nga paupdon hiya, kondi waray hiya tuguti ni Jesus, lugod ginsidngan hiya:
39 “Uli ha iyo, ngan isumat ha ngatanan an ginbuhat han Dios para ha imo.” Salit inuli hiya ngan iginsumat ha bug-os nga syudad an ginbuhat ni Jesus ha iya.
40 Pagbalik ni Jesus ha Galilea, gin-abiabi hiya hin maopay han mga tawo, kay hira ngatanan nagpapamulat ha iya.
41 Pero inabot hi Jairo nga punoan nga opisyal han sinagoga. Hinapa hiya ha may tiil ni Jesus ngan nakimalooy nga kumadto ha iya balay,
42 kay tikamatay na an iya usa la nga anak nga babaye nga mga 12 anyos an edad.
Samtang tikadto hi Jesus, ginsusuok hiya han damu nga tawo.
43 Ngan may babaye nga 12 ka tuig na nga gindidinugoan, nga waray bisan hin-o nga nakakatambal.
44 Hinirani hiya ha luyo ni Jesus ngan ginkaptan an sidsid han iya pantungbaw nga panapton, ngan inundang dayon an pagdinugui ha iya.
45 Salit nagpakiana hi Jesus: “Hin-o an kinapot ha akon?” Han waray nagsusumat kon hin-o, nagsiring hi Pedro: “Magturutdo, ginpapalibotan ngan ginsusuok ka han mga tawo.”
46 Kondi nagsiring hi Jesus: “May kinapot ha akon, kay inabat ko nga may gahum nga ginawas ha akon.”
47 Pakasabot han babaye nga hinbaroan an iya ginbuhat, nangungurog nga dinaop hiya ngan hinapa ha atubangan ni Jesus ngan iginsumat ha ngatanan kon kay ano nga iya ginkaptan hi Jesus ngan kon paonan-o hiya natambal dayon.
48 Pero nagsiring hi Jesus ha iya: “Anak, tungod han imo pagtoo nag-opay ka. Lakat nga mamurayawon.”
49 Samtang nagyayakan pa hi Jesus, may inabot nga lalaki tikang ha balay han punoan nga opisyal han sinagoga ngan nagsiring: “An imo anak namatay na! Ayaw na pagdisturboha an Magturutdo.”
50 Pakabati hini ni Jesus, nagsiring hiya: “Ayaw kabaraka, tumoo ka la, ngan mabubuhi* hiya.”
51 Pag-abot niya ha balay, waray bisan hin-o nga igin-upod niya ha sulod labot la kanda Pedro, Juan, Santiago, ngan han mga kag-anak han daragita.
52 Kondi nananangis an mga tawo ngan ginpupukpok an ira dughan tungod ha kasubo. Salit nagsiring hi Jesus: “Ayaw na kamo pagtinangis, kay waray hiya mamatay, kondi nakaturog la hiya.”
53 Tungod hito, nakakatamay nga gintinawaan nira hiya, kay maaram hira nga patay na an daragita.
54 Pero iya ginkaptan an kamot han daragita ngan nagsiring: “Daragita, buhát!”
55 Ngan binalik an espiritu* han daragita ngan binuhát dayon hiya. Nagsugo hi Jesus nga tagan hiya hin pagkaon.
56 Nahipausa gud an iya mga kag-anak, kondi gintugon hira ni Jesus nga diri isumat ha bisan hin-o an nahitabo.
